Read Tontemboan Wahyu 2 Bible Online

Wahyu 2 - Tontemboan bible

Wahyu 2

¹Wo icua i Toyaang i Tou a yaku, “Patico mio' a si malaékat si mengatéir in jamaat an Efesus: Si anioo en taar si ai Sia owo si makatimboi sé pitu sumesendot ang kama kakan-Na wo si mawaya' am paawuun é pitu totombol patuliran in sosoloan si niéma a mas owo.

²Kailekan-Ku sapa sé niéma' miow, kamu tumawoio mai in uter ang kerapi ing kale'tekan. Kailekan-Ku ka'i kamu ra'ica talesen makaséré sé tou léwo'. Tini'tiro miow sé tou sé makua sapaoka séra ruru'du'an, taan en ulitna ra'ica tanu siitu, wo kinailekano miow séra itu kotowo.

³Kailekan-Ku ka'i kamu talesen wo wendu ampa'paan i ngaran-Ku, wo kamu ra'ica mendam in la'lé.

⁴Mandé ka'i in taniitu iséro'-Ku kamu, ampa'paan eng kaupusan iow a Yaku ra'io meputé wo ing kaupusan iow an tutuw iow werupé' maéman a Yaku.

⁵Ampa'paan in itu, ta'néieno am bisa owo en linepokan iow wo mape'diso mangé. Wo émaano mangé tanu sé niéma' miow indior tutuw iow werupé' maéman. Sa kamu ra'ica mape'dis, Yaku maai oka ai camu, wo mindo in totombol patuliran in sosoloan iow an tampana.

⁶Taan awéan sé loor ai camu: Icasuut miow waya sé pengéma-ngémaan é tou sé makiit si Nikolaus. Wo icasuut-Ku ka'i em pengéma-ngémaan éra.

⁷ Si séi si makalunteng, lébé loor sia luminga sapa en aicua i Roh a sé jamaat. Si séi si muntung wéan-Ku oka sia kaloasan eng kuman im bua'na in tuura ing katouan si an untep in Taman Firdaus i Amang Kasuruan.”

⁸ “Ipatico mio' a si malaékat si mengatéir in jamaat an Smirna. Si anioo en taar asi Kumataré wo Si Ka'karan, si matéo wo tinou sumawel:

⁹Kailekan-Ku eng kasusaan iow wo eng kalengéian iow, taan am beren i Casuruan kamu siya'. Kailekan-Ku ka'i e ngaran iow pengawuruken é tou sé mangaku séra tou Yahudi. Taan en ulitna séra ra'ica tou i Amang Kasuruan taan séra itu jamaat i kikiiten é sétang.

¹⁰Tioo kamu maindé-indé' ing kawenduan si musti pendamen iow. Awéan ai camu si téndél oka i kikiiten é sétang an untep im bui em pangepé'an. Wo pendamen iow oka eng kasusaan sangapulu' ngando eng kauréna. Taan kamu musti le'tek maéman a Yaku akar i maté, wo kamu wéan-Ku oka mahkota ing katouan.

¹¹ Si séike' si makalunteng, aweso taré linganna sapa sé aicua i Roh a sé jamaat. Si séi si muntung ra'ica kawisa mawendu in sapa-sapa ampa'paano im papaté karua.”

¹²“Ipatico mio' a si malaékat si mengatéir in jamaat am Pergamus. Si anioo en taar si ai Sia owo si makatimboi in sa'bel rua en telewa:

¹³Kailekan-Ku em paento'an iow, asi tampa pakakawasan i kikiiten é sétang. Taan kamu uli-ulit le'tek maéman a Yaku wo ra'ica sangkalen iow em paémanen iow a Yaku, mandé ka'i sinéré miow si Antipas sairi le'tek-Ku pinaté an dior iow asi tampa pakakawa- san i kikiiten é sétang.

¹⁴ Taan awéan piraan sé ra'ica icasalé'-Ku ai camu: An uner iow awéan sé makiit im pasusui i Bileam. Si Bileam masusui a si Balak tumambisa en tumawér sé tou Israel kuman ing kakanen sé ayumpero a sé opo-opo', wo mengabersina.

¹⁵Taniitu ka'i an uner iow awéan sé makatimboi in sususuien é tou makiit si Nikolaus.

¹⁶Ampa'paan in itu mape'diso mio'! Sa kamu ra'ica mape'dis, yaku makala'us oka maai ai camu wo perangen-Ku oka sé tou itu maké in sa'bel makakesot am ba'ba'-Ku.

¹⁷ Si séi si makalunteng, aweso taré sia luminga sapa en aicua i Roh a sé jamaat: Si séi si muntung, sia wéan-Ku oka kakanen manna si pakaenepé', wo wéan-Ku oka ka'i sia watu kulo' si pinatican i ngaran weru. E ngaran weru itu ra'ica wana e makailek, wayake' si tumerima.”

¹⁸“Ipatico mio' ka'i a si malaékat si mengatéir in jamaat an Tiatira. Si anioo en taar asi Toyaang i Amang Kasuruan owo, em beren-Na mengembu-ngembung kaputé in api wo eng kécéi-Na masélap tanuoka in tambaga patunun:

¹⁹Kailekan-Ku waya en tinawoi miow. Kamu mengaupus sé kakélé miow, wo le'tek maéman a Yaku, tambisa em pakaselewir iow a sé tou wo tambisa eng katalesen iow masaru ing kawenduan. Kailekan-Ku en tinawoi miow intarépé' ilumébé mai en tinawoi miow an tutuw iow werupé' ma- éman a Yaku.

²⁰ Taan iséro'-Ku kamu, ampa'paan aiwayake' miow si esa wéwéné makangaran Izebel. Si wéwéné itu matuul in owakna nabi i Amang Kasuruan, taan sia masusui wo mengasélé'kow sé ata-Ku mengabersina wo mengakan ing kakanen sé ayumpero a sé opo-opo'.

²¹Winéan-Kuo témpo si wéwéné itu e mape'dis, taan ra'ica yento'na mengéma-ngéma' sé andumoro' in cabul.

²²Ta'néien sumama-sama'! Iténdél-Ku oka si wéwéné itu am bawo im patekelan akar sia mendam in sakit. Wo pakasa in tou mengabersina ang karapina, sa séra ra'ica mape'dis émaan-Ku oka séra mendam ing kawenduan wangko'.

²³ Wo patén-Ku oka sé toyaangna. Wo in taniitu kailekan oka waya é jamaat sapaoka Yakuo si makailek im bewerot wo in até é tou, wo suliin-Ku oka kamu si esa wo si esa iciit im paémaan iow.

²⁴Taan awéané' sé tou walina ai camu an Tiatira sé ra'ica makiit in sususuien i Izebel, wo ra'ica masalé' makailek andumoro' si kikiiten é sétang. Wo ra'ica kiim-Ku méé im pamuléngen walina ai camu

²⁵Taan téirano mangé sumama-sama' em paémanen iow itu akar Aku maai.

²⁶ Si séi si muntung wo mengaéma' sapa sé icasalé'-Ku akar asi endo ing ka'karan, wéan-Ku oka sia kawasa e merénta im bangsa-bangsa.

²⁷Wo peréntanna oka séra ang karapi im beka' bési wo tumeri iséra tanu in tumeri ing kuré'. Eng kawasa si aiwéé ai sia puté wo ing kawasa si aiwéé i Amang-Ku a Yaku.

²⁸Wo iwéé-Ku oka ka'i ai sia si lolouren.

²⁹Si séi e makalunteng, aweso taré li- nganna sapa en aicua i Roh a sé jamaat.”