Read Tontemboan Wahyu 20 Bible Online

Wahyu 20 - Tontemboan bible

Wahyu 20

¹Kekawus in itu sérénku si esa malaékat an sorga owo tumumpa mai ang kayo'baan. Eng kamana makatimboi ing kukusi' ing kepal im papaté wo esa ranté wangker.

² Wo si naga ula' matu'a itu tangkaanna, siao si kikiiten é sétang. Wo ranténna si naga itu sangariwu ngata'un eng kauré.

³Wo si naga itu iténdélna an untep ing kepal im papaté. Wo kusiinna eng kepal im papaté itu wo ségélenna, wosama' ra'io toro sélé'kowna sé bangsa, sa ra'ipé' imalekep en sangariwu ngata'un. Sa imalekepo en sa- ngariwu ngata'un iwekar oka sumawel si naga itu taan en témpona ra'ica uré.

⁴ Kekawus in itu sérénku em palukutan pasiri-siriin, wo sé makalukut am bawona. Séra winéan kawasa e makim. Wo sérénku ka'i sé mu'kur é tou sé imaté pinokolan in do'kos ampa'paan mengasairi in andumoro' i Yesus wo ka'i mengakua in Taar i Amang Kasuruan. Séra sé tou sé ra'ica makuru en sumiri' a si binatang itu wo im patongna, wo ra'ica tumerima in tuusna an tuintung wo ang kama éra. Séra itu tinou sumawel wo merénta mewali-wali wo si Kristus sangariwu ngata'un eng kauréna.

⁵Si anioo eng kataré-taré sé tou imaté tinou sumawel, taan sé tou imaté walina ra'ipé' touen sumawel sa ra'ipé' imalekep eng kauréna in sangariwu ngata'un.

⁶Pakakamangen wo line'naso sé tou sé kataré-taré tinou sumawel! Em papaté karua ra'io kumawasa iséra. Taan séra mamuali oka imam-imam sé mengaselewir a si Amang Kasuruan wo a si Kristus, wo séra ka'i merénta oka mewali-wali wo Sia sangariwu ngata'un eng kauréna.

⁷Wo kekawus in sangariwu ngata'un si kikiiten é sétang icesot oka ang kepal im papaténa.

⁸ Wo mangéna oka isélé'kow sé bangsa sé am pakasa ing kayo'baan, sérao sé patuulen ‘Gog’ wo ‘Magog’. Wo séra li'usen oka i kikiiten é sétang e mangé merang. Eng kakeli éra tanu in dangi'ngis an tembir in ta'sic.

⁹Wo séra meserar am pakasa ing katanaan ang kayo'baan wo mangé éra yémbong eng kota si caupus i Amang Kasuruan wo si paento'an é tou le'nas. Taan tumumpa mai en api an langit tumunu iséra.

¹⁰Wo si kikiiten é sétang si sumélé'kowo sé tou itu, iténdél an untep in ta'sic api wo walélang. An tampa ituo en tinéndélan si binatang wo si nabi ra'ica wutul. Wo am bitu séra niokoi endo wo em bengi akar ing kauré-uré.

¹¹ Wo kaséréanku awéan esa palukutan pasiri-siriin kulo' wangker wo Sia si makalukut am bawona. Wo an dior-Na en tana' wo en langit icatala wo ra'io ka'i peta'up en tampana.

¹²Wo kaséréanku sé tou sé pasiri-siriin wo sé tou ra'ica pasiri-siriin sé imatéo, séra makatulung an dior im palukutan pasiri-siriin itu. An tutuw itu pakasa eng kitap winuka', wo winuka' ka'i eng kitap walina siituo eng kitap ing katouan. Wo sé tou imatéo akimen kumiit im pinengaéma' éra si aipatico asé kitap itu.

¹³Wo isarakan in ta'sic sé tou imaté an untepna, wo isarakan ka'i im papaté wo eng kakolanoan im papaté sé tou imaté an untepna. Wo séra si esa wo si esa akimen kiit sé pinengaéma' éra.

¹⁴Kekawus in itu, em papaté wo eng kakolanoan im papaté iténdél an untep in ta'sic api. En ta'sic api ituo en tampa ukuman si patuulen papaté karua.

¹⁵Wo pakasa sé tou e ngaran éra ra'ica aipatic an untep ing kitap katouan itu, iténdél an untep in ta'sic api itu.