Read Tontemboan Wahyu 21 Bible Online

Wahyu 21 - Tontemboan bible

Wahyu 21

¹ Wo kaséréanku en langit wo eng kayo'baan weru, ampa'paan en langit wo eng kayo'baan kataré aicatalao wo en ta'sic ra'io wana ka'i.

² Kaséréanku ka'i eng kota le'nas, siituo en Yerusalem weru, tumumpamai an sorga asi Amang Kasuruan owo. Eng kota itu tu'tulo kaputé i esa pengantén wéwéné si pinasungo en sumungkul si pengantén tuama.

³ Wo kalingaanku en suara taangko' keli am palukutan pasiri-siriin itu makua, “Séréno! Intarépé' em paento'an i Amang Kasuruan an unero é tou. Sia mai oka mento' mewali-wali wo iséra, wo séra mamuali oka tou-Na. Sia in esa mewali-wali oka wo iséra, wo mamuali Amang Kasuruan éra.

⁴ Wo pisin-Na oka waya en dano im beren éra, wo ra'io wana ka'i em papaté. Ra'io wana ka'i e mala'lu kuma'pa e maamé' kuma'pa eng kawenduan, ampa'paan am baya-waya sé uré itu lumangkoio.”

⁵Wo Sia si makalukut am palukutan pasiri-siriin itu kumua, “Séréno, Yaku ang karoro'an imaéma' im baya-waya maweru!” Wo icua-Na ka'i, “Ipatico mio' waya en itu, ampa'paan sé nunuwuun anio' ro'na percayan wo wutul.”

⁶ Icua-Na ka'i a yaku, “Pakasa imamualio. Yakuo si Alfa wo si Omega, si Kumataré wo si Ka'karan. Si séike' si maré'om, sia wéan-Ku oka elepen si asalo aitambér, asi palemboian in dano si mawéé ing katouan.

⁷ Si séi e muntung, kéréanna oka waya en anio'. Wo Yaku mamuali oka Amang Kasuruanna, wo sia mamuali oka toyaang-Ku.

⁸Taan sé tou toloindé' mengasairi andumoro' i Yesus, sé tou ra'ica maéman, sé tou mengaéma' ing kaléwo-léwo'an sé karican oka mai, sé tou mengapaté tou, sé tou mengasundal, sé tou mengasihir, sé tou mengaapo' a sé opo-opo' wo pakasa sé tou kotowo, séra im baya yuntep oka an untep in ta'sic api walélang si mengembu-ngembung. Si anioo em papaté karua.”

⁹Kekawus in itu, mai si esaan asé pitu malaékat si makatimboi im pitu paelepan si mawuta-wuta im pitu kawangkuran sosomoi. Icuana a yaku, “Mayoo am bia'i, ituru'ku oka ai co si pengantén wéwéné, penanaan i Toyaang i Domba.”

¹⁰ Wo aku kinawasa i Roh i Amang Kasuruan wo iwalina am puruk ing kuntung wangker wo rangka'. Am bitu turu'na a yaku eng kota le'nas, Yerusalem weru si itumumpa mai an sorga, asi Amang Kasuruan owo.

¹¹Eng kota itu wuta i rarayo wo in sisiri' i Amang Kasuruan wo matélang tanuoka im permata si lumoo-loor, tanuoka im permata yaspis wo kulo' weresi tanuoka ing kristal.

¹² Wo eng kota itu lini'cir i ri'dir mésel rangka' wo kura'ber, wo awéan sangapulu' rua papalen wangker. Susur im papalen itu awéan esa malaékat. Am bawo im papalen-papalen itu, pinatican i ngara-ngaran é sangapulu' rua suku Israel.

¹³Sé papalen wangker itu a micona awéan telu, a mongéna awéan telu, a mékona awéan telu wo a makona awéan telu.

¹⁴Wo e ri'dir ing kota itu winangun am bawo é sangapulu' rua watu pandasi. Wo asé watu pandasi itu pinatican i ngara-ngaran é sangapulu' rua ruru'du'an i Toyaang i Domba.

¹⁵ Si malaékat i numuwu' a yaku, sia awéan esa weka' mas pengaukur. Pakénna em beka' itu e mukur ing kota, im papalen-papalen wangker ang karapi i ri'dir mésel.

¹⁶Eng kota itu epat e ruuna, eng kalambotna wo eng kawelarna puté. Wo ukurenna eng kota itu maké im beka' mas, eng kalambotna rua ngariwu epat ngaatus kilometer, taniitu ka'i eng kawelar wo eng karangka'na.

¹⁷Wo ukurenna ka'i e ri'dir mésel itu, enem ngapulu' meter. Em paukur si pinaké i malaékat itu puté wo im paukur pengapakén é tou.

¹⁸ E ri'dir mésel itu niéma' am batu permata yaspis. Wo eng kota itu niéma' a mas tulén wo masélap tanuoka ing kaca eng kaweresina.

¹⁹Em batu-watu pandasi ing kota itu pinerongan im membam-balinaan watu permata. Em batu pandasi kataré niéma' am batu yaspis owo, watu pandasi karua am batu nilam, watu pandasi katelu am batu mirah, wo watu pandasi kaepat am batu zamrud,

²⁰em batu pandasi kalima am batu unam, watu pandasi kaenem am batu sardis, watu pandasi kapitu am batu ratna campaka, watu pandasi kawalu am batu beril, watu pandasi kasiow am batu krisolit, watu pandasi kasangapulu' am batu krisopras, watu pandasi kasangapulu' esa am batu lazuardi, wo watu pandasi kasangapulu' rua am batu kecubung owo.

²¹Sé sangapulu' rua papalen wangker asi kota itu niéma' asé sangapulu' rua mutiara owo, anaé esa papalen niéma' asi esa mutiara owo. Wo pakasa en lalan asi kota itu niéma' a mas tulén masélap meputé ing kaweresina ing kaca.

²²Ra'io kaséréanku mai em Balé Le'nas an untep ing kota itu, ampa'paan em Balé Le'nas ituo si Amang Kasuruan in esa, si Casuruan Si Makakawasa wo ka'i si Toyaang i Domba itu.

²³ Eng kota itu ra'io ka'i maperlu si yéndo wo si serap en sumendot, ampa'paan si Amang Kasuruan si wuta in darayo wo in sisiri', iméé mai in sendot, wo si Toyaang i Domba ituo en sosoloanna.

²⁴ Wo sé bangsa maya' oka an sendot itu, wo paalin oka é kolano ang kayo'baan eng kasiyaan éra ang kota itu,

²⁵ wo em papalen-papalen wangker ing kota itu ra'io ka'i patutu-tutuwen, ampa'paan endo wo em bengi ra'io wana ka'i a mangé mbitu.

²⁶Eng kasiyaan wo en siri' é bangsa paalin éra oka ang kota itu.

²⁷ Taan sapake' mangé sé najis kuma'pa sé tou mengaéma' sé karican oka mai kuma'pa kotowo ra'ica toro muntep asi kota itu. Sé ro'na muntep asi kota itu, wayake' sé tou e ngaran éra aipatico an untep ing kitap katouan i Toyaang i Domba itu.