Read Tontemboan Wahyu 9 Bible Online

Wahyu 9 - Tontemboan bible

Wahyu 9

¹Wo sengono i malaékat kalima en terompétna, wo sérénku si esa sumesendot an langit owo rumongkorai ang kayo'baan. Wo si sumesendot itu winéan ing kukusi' e muka' im papalen pauntepan ang kepal im papaté.

² Wo wukaan i sumesendot itu em papalen pauntepan ang kepal im papaté, wo kumesotai en tembur asi kepal itu tanuoka pulutna in tembur im pakopraan. Wo si yéndo wo en langit mariréimbeng ampa'paan in tembur si cumesotai ang kepal itu.

³ Wo asi tembur itu owo kumesotai sé komo-komong wo tumumpa ang kayo'baan. Wo sé komong itu winéan kawasa eng kumi'ci' tanuoka ing kame'nget im paki'ciin é kalajengking ang kayo'baan.

⁴ Sé komong itu ka'i pinerénta ra'ica toro luméwo' in dukut, in tina-tinanem kuma'pa in tuu-tuura ing kayu ang kayo'baan, taan asalo sé tou sé an tuintung éra ra'ica wana ségél i Amang Kasuruan.

⁵Wo sé komong ra'ica winéan kaloasan e maté sé tou itu, taan asaloke' mai mokoi séra lima ngaserap eng kauréna. Wo eng kame'nget ing kini'ci' éra meputé ing kame'nget ing kini'ci' é kalajengking.

⁶ Asi lima ngaserap itu, sé tou mangéré woo im papaté, taan ra'ica kinéréan éra, wo masalé' woo maté, taan em papaté itumayango ai séra.

⁷ E modél é komong itu tanuoka kawayo-kawayo sé tu'tulo mangé merang. An do'kos éra awéan tanuoka mahkota mas, wo eng gio éra tanuoka ing gio é tou.

⁸ Wo em buuk éra tanuoka im buuk é wéwéné wo em baang éra tanuoka im baang é singa.

⁹ En da'dak éra awéan pari'dir tanuoka ing karai bési. Wo en téngé im pakatéléw éra tanu in téngéna ing keréta-keréta sé pengawésoon é kawayo e mangé merang.

¹⁰En ipus éra tanuoka in ipus é kalajengking wo awéan kiki'ci'. Wo en ipus éra winéan kawasa e mokoi sé tou lima ngaserap eng kauréna.

¹¹Wo séra awéan kolano si maperénta, siao si malaékat mengatéir ing kepal im papaté. E ngaran i colano itu “Abadon” a nunuwu' é Ibrani, wo “Apolion” a nunuwu' é Yunani.

¹²Eng kawangkuran kataré itu ilumangkoio, taan awéané' rua ka'i kawangkuran eng kumiitai.

¹³ Wo si malaékat kaenem sumengo in terompétna. Wo palinganku awéan suara e makesotai asé epat sungé si an duu-ruuna im pawetaan i raragés a mas owo si aitulir an dior i Amang Kasuruan.

¹⁴Wo en suara itu kumua a si malaékat kaenem si makatimboi in terompét itu, “Wekaro mio' sé epat malaékat sé aiwa'kes an tembir in doyongan Efrat, si royongan wangker itu!”

¹⁵Wo sé epat malaékat sé aitu'tulo itu iwekar wosama' patén éra sé sangapetelu tou ang kayo'baan. Séra itu aitantuo iwekar asi jam, endo, serap, wo asi ta'un itu.

¹⁶Wo kelian sé suraro sé makasaké asé kawayo, wo awéan en cumua a yaku sé suraro itu rua ngaatus yuta eng kakelina.

¹⁷Wo tana'io eng kinaséréanku am pinapaturu'an itu. Sé kawayo wo sé tou makasaké asé kawayo itu e modél éra tana'i, sé tou itu mepaké ing karai bési i pari'dir makakliur réindang tanu api, dongker tanu im batu permata, wo kuni' tanu im balélang. Wo en do'kos é kawayo tanu in do'kos é singa, wo am ba'ba' é kawayo makesotai en api, tembur wo walélang.

¹⁸Sangapetelu é tou ang kayo'baan pinaté é telu kawangkuran siituo en api, tembur wo i walélang sé makesot am ba'ba' é kawayo-kawayo itu.

¹⁹Eng kawasa é kawayo itu am ba'ba' wo ka'i an ipus. En ipus éra tanuoka ro'kos i ula', wo si ipus ituo si paokoi éra sé tou.

²⁰ Taan sé tou walina sé ra'ica imaté ing kawangkuran itu, ra'- ica kiim mape'dis mengéma-ngéma' sé léwo'. Séra ka'i ra'ica kiim mento' makuru en sumiri' a sé roh léwo' wo a sé patong-patong tanumai patong mas, pérak, tambaga, watu wo kayu sé ra'ica maséré, malinga, kuma'pa ka'i mawaya'.

²¹Séra ka'i ra'ica kiim mape'dis mengéma-ngéma' sé léwo' walina tanumai mapaté tou, mariara, mabersina wo marombit.