Read Toraja-Sa'dan KADADIAN 1 Bible Online

KADADIAN 1 - Toraja-Sa'dan bible

KADADIAN 1

¹Iatonna tipamulanna, Napadadii Puang Matua tu langi’ sola lino.

²Iatu lino tang tibori’pa sia tae’ bangpa apa-apa lan sia misa’pa tasik pidun-pidunan; na iatu PenaanNa Puang Matua sumayo daona lu uai.

³Ma’kadami tu Puang Matua kumua: La den tu masiang. Denmi tu masiang.

⁴Natiroi Puang Matua tu masiang kumua melo, Napasisarakmi Puang Matua tu masiang na malillin.

⁵Nasangaimi Puang Matua allo tu masiang, na bongi tu malillin. Tonna mangkato, makaroenmi sia melambi’, iamo allo bunga’na to.

⁶Ma’kadami tu Puang Matua kumua: La den tu batara lan to’ tangnga uai, anna pasisarakki tu uai.

⁷Napadenmi Puang Matua tu batara, anNa pasisarakki tu uai diongna lu sia daona lu; dadimi susito.

⁸Nasangaimi Puang Matua langi’ tu batara. Tonna mangkato makaroenmi sia melambi’, iamo allo ma’penduanna to.

⁹Ma’kadami tu Puang Matua: La ma’misa rokko misa’ inan tu mintu’ uai nasambo langi’, anna sombo tu karangkean. Dadimi susito.

¹⁰Nasangaimi Puang Matua kapadanganna tu karangkean sia iatu nanii ma’misa uai Nasanga tasik; Natiroi Puang Matua, kumua melo.

¹¹Ma’kadami tu Puang Matua: Iatu padang la untuoan riu sia tananan kelise’ sia kayu membua situru’ a’ganna, tu kelise’ lanna lu dao kuli’na padang. Dadimi susito.

¹²Natuoammi padang tu riu sia tananan kelise’ situru’ a’ganna sia kayu membua, tu kelise’ lanna lu situru’ a’ganna. Natiroi Puang Matua, kumua melo.

¹³Tonna mangkato, makaroenmi sia melambi’, iamo allo ma’pentallunna to.

¹⁴Ma’kadami tu Puang Matua: La den pira-pira apa parrang lan batara dao langi’, anna pasisarakki tu allo na bongi sia mendadi tanda sia pentaunan sia umpamanassa allo sia taun,

¹⁵sia kumua anna mendadi apa mangarrang lan batara dao langi’ la unnarrang lino. Dadimi susito.

¹⁶Napadenni Puang Matua da’dua apa parrang kapua, iatu apa parrang tu kapuana la umparenta masiang, na iatu apa parrang tu bitti’na la umparenta bongi, sia mintu’ duka bintoen.

¹⁷AnNa palanni batara dao langi’ Puang Matua la unnarrang lino,

¹⁸sia la umparenta allo sia bongi sia la umpasisarak masiang na malillin. Natiroi Puang Matua, kumua melo.

¹⁹Tonna mangkato, makaroenmi sia melambi’, iamo allo ma’penna’pa’na to.

²⁰Ma’kadami tu Puang Matua: La sibi’tokan lan mintu’ to’ uai tu ba’tu pira-pira kepenaanna sia la den manuk-manuk sitiaran lan lino sia lan batara dao langi’.

²¹Napadadimi Puang Matua tu bale kapua sia mintu’ olo’-olo’ sisayoan, tu sibi’tokan lan to’ uai, situru’ a’ganna, sia mintu’ manuk-manuk kepani’ situru’ a’ganna. Natiroi Puang Matua, kumua melo.

²²Napassakkemi Puang Matua Nakua: Membati’ kalle-kalleangkomi sia samemba’ka’-ba’ka’nakomi sia ponnoi tu uai lan tasik, na iatu manuk-manuk la memba’ka’ lan lino.

²³Tonna mangkato makaroenmi sia melambi’, iamo allo ma’pellimanna to.

²⁴Ma’kadami tu Puang Matua kumua: Iatu lino la umpabu’tu panampa kepenaa situru’ a’ganna, iamotu patuoan sia olo’-olo’ mendonglo’ sia iatu mariranna, situru’ a’ganna; dadimi susito.

²⁵Napadadimi Puang Matua tu mintu’ olo’-olo’ marira situru’ a’ganna, sia mintu’ patuoan situru’ a’ganna sia mintu’ olo’-olo’ mendonglo’ dao kuli’na padang situru’ a’ganna. Natiromi Puang Matua, kumua melo.

²⁶Ma’kadami tu Puang Matua kumua: Melo ke umpadadiKi’ tolino Tapasusi rupanTa, umparundu’i a’ganTa, dikua anna parentai tu mintu’ bale lan tasik sia mintu’ manuk-manuk dao lu langi’ sia mintu’ patuoan sia mintu’ issinna lino sia mintu’ olo’-olo’ mendolonglo’ tu mendonglo’ diong padang.

²⁷Napadadii Puang Matua tu tolino Napasusi rupanNa, Napadadii susi rupanNa Puang Matua; Napadadimi tu muane sia baine.

²⁸Napassakkemi Puang Matua sola duai, Nama’kada lako Nakua: Membati’komi sia memba’ka’komi sia ponnoi te lino, sia taloi sia parentai tu mintu’ bale lan tasik sia mintu’ manuk-manuk dao lu langi’ sia mintu’ tu olo’-olo’ mendonglo’ lan lino.

²⁹Sia Nakua Puang Matua: Tonganna tongan kumua mintu’ tananan kelise’ narande tana sia mintu’ kayu kelise’ buanna Kubenmokomi la mikande.

³⁰Apa iatu mintu’ olo’-olo’ marira lan lino sia mintu’ manuk-manuk dao lu langi’ sia mintu’ olo’-olo’ mendonglo’ lan lino, tu kepenaanna, Kubenmo tu mintu’na daun-daun maido la nakande. Dadimi susito.

³¹Natiro Puang Matua tu mintu’ apa Napadadi, kumua lendu’ tongan melona. Tonna mangkato, makaroenmi sia melambi’, iamo allo ma’pennannanna to.