Read Toraja-Sa'dan KADADIAN 11 Bible Online

KADADIAN 11 - Toraja-Sa'dan bible

KADADIAN 11

¹Iatu mintu’ nasambo; langi’ narande tana sangrupari tu basa sia kada.

²Iatonna male lako rampe matallo tu tau iato mai, nakabu’tuimi tu misa’ padang malona’ dio tana Sinear, torromi ma’tondok dio.

³Sipa’kadami tinde mai tau nakua: Maikomi anta garaga batu tela sia tapemeloi tununna. Iatu batu tela napasondana batu tongan na gala-gala napopi’da’.

⁴Sia nakuapa: Maikomi anta bangun misa’ tondok sia misa’ menara tu la sumpu langan langi’ tu lolokna; susimoto la tanii unggaraganni tanda kalelean tu kaleta, da anta sisarak-sarak lan te lino.

⁵Ta’kala mengkalaomi tu PUANG la untiroi tu tondok sia menara tu nabangun ma’rupa tau.

⁶Nakua kadanNa PUANG: Mintu’ torro tolino misa’ bangsari sia misa’ basari; mane randuknari penggauran te; nakua lan penaanna, tae’ natang la dadi tu mintu’ apa nasanga la napogau’.

⁷Melo ke mengkalaoKi’ umpatangma’runduananni tu kadanna anna tangsiissanan.

⁸Susimorato Napasisarak-sarakki PUANG lan lu te lino, natorroimi umbangunni tu tondok iato.

⁹Iamo bannangna to anna sangai Babel tu tondok iato, belanna dio Nanii PUANG umpatangma’runduananni tu kadanna mintu’ to untorroi kuli’na padang. Indemoto dio nanii PUANG umpasisarak-sarakki tu tau iato mai lan lu te lino.

¹⁰Iamote tu mintu’ bati’na Sem. Iatonna saratu’mo taunna tu Sem undadiammi Arpakhsad, tonna duang taunmo mangkanna uai saba’.

¹¹Tonna mangka undadian Arpakhsad tu Sem tuopa lima ratu’ taunna sia undadian ba’tu pira-pira muane na baine.

¹²Iatu Arpakhsad tallungpulomo llima taunna anna dadianni tu Selah.

¹³Tonna mangka undadian Selah tuopa a’pa’ratu’ ntallung taun tu Arpakhsad sia undadian ba’tu pira-pira muane sia baine.

¹⁴Iatu Selah tallungpulomo taunna anna dadianni tu Eber.

¹⁵Tonna mangka undadian Eber a’pa’ratu’pa ntallung taun tuo tu Selah sia undadian ba’tu pira-pira muane sia baine.

¹⁶Iatu Eber tallungpulomo nna’pa’taunna anna dadianni tu Peleg.

¹⁷Tonna mangka undadian Peleg tu Eber tuopa a’pa’ratu’ ntallungpulo taunna sia undadian ba’tu pira-pira muane sia baine.

¹⁸Iatu Peleg tallungpulomo taunna anna dadianni tu Rehu.

¹⁹Tonna mangka undadian Rehu tu Peleg duaratu’pa ngkasera taunna tuo sia undadian ba’tu pira-pira muane sia baine.

²⁰Iatu Rehu tallungpulomo ndua taunna anna dadianni tu Serug.

²¹Tonna mangka undadian Serug tu Rehu duaratu’pa mpitung taun tuo sia undadian ba’tu pira-pira muane sia baine.

²²Iatu Serug tallungpulomo taunna anna dadianni tu Nahor.

²³Tonna mangka undadian Nahor tu Serug tuopa duaratu’ taunna sia undadian ba’tu pira-pira muane sia baine.

²⁴Iatu Nahor duangpulomo ngkasera taunna anna dadianni tu Terah.

²⁵Tonna mangka undadian Terah tu Nahor tuopa saratu’ sangpulo kasera taunna sia undadian ba’tu pira-pira muane sia baine.

²⁶Iatu Terah pitungpulomo taunna anna dadianni tu Abram, Nahor na Haran.

²⁷Iamote tu bati’na Terah: Iamotu Terah undadian Abram, Nahor sia Haran, na Haran undadian Lot.

²⁸Iatu Haran mate dolo anna Terah, ambe’na, dio tondok kadadianna, iamo Ur, tondok to Kasdim.

²⁹Kebainemi tu Abram sola Nahor; na iatu bainena Abram disanga Sarai na iatu bainena Nahor disanga Milka, tu anakna Haran, ambe’na Milka sola Yiska.

³⁰Iatu Sarai tamanang, tae’ anakna.

³¹Nasolammi Terah tu Abram, anakna sola Lot, ampona, iamo anakna Haran sia sola Sarai, minintunna, bainena Abram, anakna, sun sola lan mai Ur, tondok to Kasdim, la lao lako tana Kanaan; saemi lako Haran natorro dio.

³²Iatu Terah duaratu’ llimang taun, namate dio tondok Haran.