Read Toraja-Sa'dan KADADIAN 12 Bible Online

KADADIAN 12 - Toraja-Sa'dan bible

KADADIAN 12

¹Ma’kadami tu PUANG lako Abram Nakua: Tassu’ko lan mai tondokmu sia lan mai pa’rapuammu sia lan mai banuanna ambe’mu, ammu male lako tondok tu la Kupakitangko dako’.

²AngKu popendadiko misa’ bangsa kapua sia angKu parongko’ko angKu pa kaleleanni tu sangammu; la dadiko misa’ karongkosan.

³La Kuparongko’ minda-minda tu umpassakkeko sia la Kutampakki ropu minda-minda tu ullangdoko; lan duka kelemu nanii mintu’ suku lan te lino unnappa’ karongkosan.

⁴Ke’de’mi tu Abram susitu kadanNa PUANG lako kalena, sia ia duka tu Lot male sola; iatonna ke’de’ dio mai tana Haran tu Abram pitungpulomo llima taun dadinna.

⁵Nasolammi Abram tu Sarai, bainena, sia iatu Lot, pa’anakanna sia mintu’ iananna, tu mangka napasinu’du sia mintu’ tau, to tau kullena dio tana Haran, ke’de’mi sola nasangi la male lako tana Kanaan; rampomi lako tana Kanaan.

⁶Iatu Abram ullendu’i tana iato, anna rampo lako tondok Sikhem, rampo lako to’ kayu tarpin More. Attu iato nanii to Kanaan tu tana iato.

⁷Ta’kala anNa payanmo tu PUANG lako Abram, Nama’kada Nakua: Iate tana la Kuba’giammo lanto mimi’mu. Nagaragami Abram inde to dio tu misa’ inan pemalaran lako PUANG mangka payan lako kalena.

⁸Tilelemi inde to dio mai lako ma’buntunna rampe matallona Betel, naosokmi tu tendana, na iatu Betel dio rampe matampu’na, na iatu Ai, dio rampe matallona; nagaragami inde to dio tu misa’ inan pemalaran lako PUANG, anna menomba ussa’bu’ sanganNa PUANG.

⁹Nasusi to ke’de’mi tu Abram inde to dio mai nama’palusau’ pollo’na uai.

¹⁰Saemi karorian lan tana iato, anna male rokko Mesir tu Abram, la mempue dio butung to sae, belanna karorian pannang lan tana iato.

¹¹Denmi pissan tonna la rampomo lako tana Mesir, nama’kada lako Sarai bainena, nakua: Kuissan tongan kumua iatu iko te to melo pantarisammu:

¹²iamoto, iake natiroko to Mesir, manassa la nakua: Iamo bainena te; napateina’, apa iatu iko la napatuoko.

¹³Iamoto la musangana’ siulu’mu angku maupa’ tete dio iko; sia angku tuo belanna iko.

¹⁴Ta’kala dadimi susito; iatonna rampomo tu Abram tama tondok Mesir, natiromi to Mesir tu baine iato misa’ to melo tongan pantarisanna.

¹⁵Natiromi to kapuanna Firaun tu baine iato, natendengmi dio olona Firaun. Nasolammi tau tu baine iato tama tongkonan layukna Firaun.

¹⁶Dibenmi apa tu Abram belanna diona baine iato; naampuimi Abram tu domba sia sapi sia keledai sia kaunan muane sia kaunan baine sia keledai birang sia unta.

¹⁷Naparompoimi ba’tu pira-pira parri’ kapua PUANG tu Firaun sia mintu’ to lan tongkonan layukna, natumang Sarai, bainena Abram.

¹⁸Natambaimi Firaun tu Abram, nakuami kumua: Umba nakua te gau’mu lako kaleku? Ma’apai ammu tang umpokadanna’ kumua iate baine bainemu?

¹⁹Ma’apai ammu kua siulu’ku, kuurunganni umpobainei? Indemo tu bainemu; solammi mumale!

²⁰Nakuammi Firaun tu taunna tu diona Abram kumua anna lao ussolanni sola bainena sia mintu’ tu apa naampui.