Read Toraja-Sa'dan KADADIAN 13 Bible Online

KADADIAN 13 - Toraja-Sa'dan bible

KADADIAN 13

¹Tassu’mi tu Abram lan mai tondok Mesir sola bainena sia mintu’ tu apa naampui ma’palusau’ Padang lo’na lu sisola duka Lot.

²Iatu Abram lendu’ ia sugi’na, sugi’ patuoan sia salaka sia bulaan.

³Malemi urrundu’ lalan dolona lo’ mai pollo’na uai melayo dio to’ kapelayoan dolona rampo lako Betel, tu, inan bunga’ naninna tendana paralla’na Betel anna Ai.

⁴Rampo lako to’ inan pemalaran mangkamo nagaraga tonna dolona; menombami dio tu Abram ussa’bu’ sanganNa PUANG.

⁵Iatu Lot tu male sola Abram, unnampui duka domba, sapi sia tenda.

⁶Tae’ anna alai padang tu tau iato mai, ke torroi sisola, belanna lendu’ budanna tu patuoanna, iamoto anna tae’ nama’din la torro sola.

⁷Sia den pissan nabu’tu kasipakkanna mintu’to mangkambi’na Abram anna to mangkambi’na Lot. Iatonna attu iato to Kanaan sia to Feris ma’tondok lan tana iato.

⁸Ma’kadami tu Abram lako Lot nakua: Da naden kasipakkanta sia kasipakkanna to mangkambi’ta, belanna kita te, to sangdadiangki’.

⁹Tang nata’pairaka matammu te padang kalua’? Messarakko dio mai kaleku. Iake lu lakoko kairi, lu lakona’ kanan, na iake lu lakoko kanan, lu lakona’ kairi.

¹⁰Nabangunammi Lot tu matanna, natiroi tu mintu’ lili’na Yordan, narumpei nasang salu iato sae lako Zoar — tonna tang ussanggangpi PUANG tu tondok Sodom na Gomora — , iamo butung pa’lak PUANG sia butung to tana Mesir.

¹¹Iamoto anna pilei Lot tu lili’na Yordan, nake’de’ ma’palulako rampe matallo; sisarakmi sola duai.

¹²Torromi tu Abram dio tondok Kanaan, apa iatu Lot ma’tondok dio lu tondok Padang, anna osok tendana sae lako Sodom.

¹³Iatu mintu’ pa’tondokan lan Sodom kadakemo gau’na’ sia ma’liu alukmo dio oloNa PUANG.

¹⁴Tonna mangka sisarak Lot tu Abram, ma’kadami PUANG lako Abram susite: Bangunanni tu matammu, tiroi dio mai to’ inan munii bendan rekke ulunna salu, sia sau’ pollo’na uai, tama matallo sia rokko matampu’;

¹⁵belanna mintu’ tu padang mutiro, la Kuba’giangko sia Kuba’gian lanto mimi’mu tontong sae lakona.

¹⁶La Kupapada budanna barra’-barra’ tu lanto mimi’mu. Iake dikulle umbilangi tu barra’-barra’, maneri dikulle umbilangi tu lanto mimi’mu.

¹⁷Ke’de’ko ammu lingkai mintu’ padang iato dio mai lambe’na sia babana, belanna iamo la Kuba’giangko.

¹⁸Napalelemi Abram tu tendana, saemi unnosok tendana dao to’ kayu tarpin Mamre, sikandappi’ tondok Hebron, nagaragami inde to dio tu misa’ inan pemalaran lako PUANG.