Read Toraja-Sa'dan KADADIAN 14 Bible Online

KADADIAN 14 - Toraja-Sa'dan bible

KADADIAN 14

¹Ta’kala denmi pissan tonna attunna Amrafel, datu Sinear sia Ariokh, datu Elasar sia Kedorlaomer, datu Elam sia Tideal, datunna bangsa pantan tama,

²iatu mintu’ datu iato sirari Bera, datu to Sodom, sia Birsya, datu Gomora, sia Syinab, datu Adma, sia Syemeber, datu Zeboim, sia datunna Bela, iamo Zoar.

³Sirampunmi sola nasangi diong lombok Sidim iamotu tasik Ma’sin totemo.

⁴Sangpulo duamo taunna tunduk tu mintu’ datu iato mai lako datu Kedorlaomer; iatonna taun ma’pessangpulo tallunnamo unneami tu tau iato mai.

⁵Iatonna taun ma’pessangpulo a’pa’ saemi tu datu Kedorlaomer sola mintu’ tu datu nasiban, anna taloi tu to Refaim dio tondok Asyterot-Karnaim sia to Zuzim dio tondok Ham, sia to Emim dio Syawe-Kiryataim.

⁶Sia to Hori dao buntunna, disanga Seir sae lako padang El-Paran, dio randan padang pangallaran.

⁷Undinna sulemi tu tau iato mai anna sae lako En-Mispat, iamotu Kadesh, untalo mintu’ tana to Amalek sia to Amori duka, tu untorroi Hazezon-Tamar.

⁸Iatonna attu iato sunmi tu datu Sodom sia datu Gomora sia datu Adma sia datu Zeboim, sia datunna Bela, iamo Zoar, anna arra’ tananan ra’ dio Sidim, la unneai,

⁹la unnea Kedorlaomer, datu Elam sia Tideal, datunna bangsa pantan tama sia Amrafel, datu Sinear sia Ariokh, datu Elasar, a’pa’ datu unnea lima datu.

¹⁰Iatu padang Sidim situtu’ limbong aspala’; mallaimi tu datu Sodom sola Gomora natobang rokko; na iatu mintu’ to torropa mallai langngan tanete.

¹¹Narampami tau tu mintu’ ianan dio Sodom na Gomora sia mintu’ kande, namane male.

¹²Narampa duka tu Lot, pa’anakanna Abram sola mintu’ iananna, belanna ma’tondok duka lan Sodom, namale.

¹³Ta’kala saemi misa’ tau tu umpallaian kalena umpokadai tu iannato lako Abram, to Ibrani, torro dio to’ kayu tarpin Mamre, misa’ to Amori, tu siulu’ Eskol sia siulu’na Aner, iamo to sibasse Abram.

¹⁴Iatonna rangimi Abram tu sangdadianna kumua dibaamo dipaalai ulang, napasandaimi pa’buno tu to nasibassean sola kaunanna, iamotu mintu’ to dadi lanmo banuanna, tallu ratu’ sangpulo karua tau, anna ula’i tu uali sae lako Dan.

¹⁵Nataa-taami tu solana ullaoi uali tonna bongi, anna taloi, naula’i sae lako Hoba rampe rekkena Damsyik.

¹⁶Nabaami sule tu mintu’ barang apa sia nabaa sule tu Lot, sangdadianna sia mintu’ barang apanna sia mintu’ baine sia tau kamban.

¹⁷Saemi tu datu Sodom umpa’tentenanni tu Abram tonna sulemo untalo datu Kedorlaomer sia mintu’ datu nasiban, dio lombok Syawe, iamo lombok Datu.

¹⁸Na iatu Melkisedek, datu Salem umbaa roti sia uai anggoro’; iamo misa’ to minaanNa Puang Patodoranna.

¹⁹Napassakkei Melkisedek tu Abram, nama’kada nakua: Napassakkemira Puang Patodoranna, Puang ungkombong langi’ sola lino tu Abram.

²⁰Mintu’ kadipudian lu langngan nasang Puang Patodoranna, tu mangka ussorong ualimmu tama limammu. Nasorongmi Abram lako tu sangtaa sangpulona mintu’ barang apanna.

²¹Ma’kadami datu Sodom lako Abram: Benna’ tu mintu’ tau, apa iatu mintu’ barang apa kamumo.

²²Nakuami tu Abram lako datu Sodom: Kupasa’bian PUANG, Puang Patodoranna, ungkombong langi’ sola lino,

²³kumua inang tae’ angku la morai unnalai tu apammi, moi sanglamba’ bannang ba’tu ulang lapik lentek, da ammi kuai undinna, kumua: aku umpasugi’i tu Abram.

²⁴Moi si’dik damo tu akunna, sangadinna tu apa nakande tu mai solaku sia taana tu to kusolan male, iamotu Aner sia Eskol sia Mamre, da’ito anna alai tu taana.