Read Toraja-Sa'dan KADADIAN 15 Bible Online

KADADIAN 15 - Toraja-Sa'dan bible

KADADIAN 15

¹Ta’kala tonna mangka tu mintu’nato, saemi kadanNa PUANG lako Abram lan patiro mendeata Nakua: Da mumataku’, e Abram, belanna Akumo tu balulang toto’mu sia rongko’ kapuamu.

²Ma’kadami Abram nakua: O PUANG Puangku, apara tu la Mikamaseanna’, belanna la tontong bangna’ susito, tang la keanak, na iatu Eliezer, to Damsyik, iamo la umpomana’ barang apangku?

³Sia nakuapa tu Abram: Tae’ tongan Mikamaseina’ bati’, manassa denni misa’ tu pa’kurinangku la umpomana’ barang apangku.

⁴Ta’kala saemi tu kadanNa PUANG lako kalena Nakua: Tangia tau iato la umpomana’ barang apammu, sangadinna misa’ to sun dilassakmu tu la umpomana’ barang apammu!

⁵Nasolammi Puang sun lako salian, Nama’kada Nakua: Mentingarako langngan langi’, bilangi tu mintu’ bintoen, ke mubelai umbilangi. Nakuami ungkuanni: Susi dukamoto tu bati’mu.

⁶Napatonganmi Abram tu PUANG, iamoto tu Nabilang Puang napomalolo Abram.

⁷Ma’kadami tu Puang lako kalena Nakua: Akumo tu PUANG, mangka ussolangko sun lan mai Ur, tondok to Kasdim, la umbenko te padang iate la musiosso’i.

⁸Ma’kadami tu Abram nakua: O PUANG Puangku, apara tu la ma’din kunii untandai kumua iate padang la kusiosso’i?

⁹Ma’kadami Puang lako kalena: AlanNa’ misa’ sapi birang tu tallung taun dadinna, sia misa’ bembe’ birang tu tallung taun dadinna, sia misa’ domba laki tu tallung taun dadinna sia bu’ku’ misa’ na burung misa’!

¹⁰Nabaami tu mintu’nato, nasesean nasangi, anna pasitingayoanni, apa iatu manuk-manuk napakalebu.

¹¹Ta’pami tu pa’duku’ dio to’ passampan iato, apa narambai Abram.

¹²Iatonna lambunmo allo, ta’kala mamma’mi tu Abram, natarru’ leppengna narampoimi katirambanan sia nakabu’ kamapattangan kapua.

¹³Ma’kadami Puang lako Abram: La muissan tongan-tongan kumua iatu bati’mu la torro mempue to lan tondok tang napotondok sia la napokaunan to ma’tondok sia la napakario-rio a’pa’ ratu’ taunna.

¹⁴Apa iatu bangsa umpokaunanni, la Kupaolai salunna, namangkato la tassu’mi umbaa ianan sanda makamban.

¹⁵La sule marampa’ko sangtondok to dolomu, sia iapi ammu dipatama batu dilobang, ke lellenganna siamoko.

¹⁶Iatu bati’ ma’patang papa’mu la sule indete, belanna tae’pa nasundun langngan lolokna tu kakadakeanna to Amori.

¹⁷Ta’kala iatonna lambunmo allo sia malillinmo dio mai, denmi tu misa’ dapo’ merambu sia misa’ sulo ma’lana-lana urruak tangnga mintu’ passampan.

¹⁸Allo ia dukamoto anNa basse kada tu PUANG sola Abram, Nakua: Kubenmo bati’mu tu padang iate, angge dio mai salu Mesir landa’ lako salu kapua iamotu salu Efrat:

¹⁹tu naninna to Keni sia to Kenizi sia to Kadmon,

²⁰sia to Het sia to Feris sia to Refaim,

²¹sia to Amori sia to Kanaan sia to Girgasi sia to Yebus.