Read Toraja-Sa'dan KADADIAN 16 Bible Online

KADADIAN 16 - Toraja-Sa'dan bible

KADADIAN 16

¹Iatu Sarai, bainena Abram tae’ nama’dadian tau. Denmi misa’ kaunan baine dio mai Mesir nakurinni, disanga Hagar.

²Nakuami Sarai ungkuan Abram: Tonganna tang Napoelo’na’ PUANG la ma’dadian tau, iamoto melo ke sangampa’komi kaunanku, napadenan siana’ manii bati’. Napasituru’mi Abram tu pa’palakunna Sarai.

³Iatonna sangpulomo taunna tu Abram, untorroi tondok Kanaan, naalami Sarai tu Hagar, kaunanna dio mai Mesir, nabenni Abram muanena la napobaine.

⁴Sangampa’mi Abram tu Hagar, anna ma’tambuk. Iatonna sa’dingmi tu kalena kumua ma’tambukmo, natapa’mi tu puangna.

⁵Ma’kadami Sarai lako Abram: Iatu siri’ku diong riammi; kusorongmo tu kaunanku mati’, na randukna naissan tu kalena kumua ma’tambukmo, natapa’mo’, iamoto PUANG la umpaolaiki’ salunna.

⁶Nakuami tu Abram lako Sarai: Iatu kaunanmu poissanmu, pogau’i lako umba tu pa’poraiammu. Naa’ga asumi Sarai anna male mallai.

⁷Nakabu’tuimi Malaeka’Na PUANG sikandappi’ misa’ kalimbuang lan padang pangallaran, iamotu sikandappi’ kalimbuang dio to’ lalan lako tondok Syur.

⁸Nakuami: E Hagar, kaunanna Sarai, bu’tu umbako nii naumba la muola? Mebalimi: Mallaimo’ dio mai puangku Sarai.

⁹Nakuami tu Malaeka’Na PUANG lako: Suleko lako puangmu sia mengkanorongko lako.

¹⁰Sia Nakua polepa tu Malaeka’Na PUANG lako: La Kupopemba’ka’ tongan tu bati’mu, naurungan tang dikemba’ bilanganna.

¹¹Sia Nakua pole siapa tu Malaeka’Na PUANG lako: Tonganna ma’tambukko sia la undadiangko misa’ pia muane, ammu sangai Ismael, belanna Natanannimoko talinga PUANG lan kamaparrisammu.

¹²Iatu pia iato la susi keledai lampung, sia la unnea mintu’ tau, anna mintu’ tau la unnea dukai: la ma’tondok sitingoan naninna mintu’ siulu’na.

¹³Nagente’mi Hagar tu PUANG, tu mangka ma’kada lako kalena: Kapenomban metiro lumbang, belanna nakua tu Hagar: Tonganna inde dukaraka te kunii untiroi tu Puang, tu untiro lumbangna’?

¹⁴Iamoto anna sangai tu kalimbuang iato: kalimbuang Lahai-Roi; tu lan kasiallaranna Kadesh, anna Bered.

¹⁵Napadadiammi Hagar misa’ pia muane tu Abram, anna iatu anakna Abram tu nadadian Hagar, nasangai Ismael.

¹⁶Iatonna attu undadian Ismael tu Hagar, karuamo pulona nnannan taunna tu Abram.