Read Toraja-Sa'dan KADADIAN 18 Bible Online

KADADIAN 18 - Toraja-Sa'dan bible

KADADIAN 18

¹Undinna ombo’mi tu PUANG lako Abraham dio to’ kayu tarpin Mamre, sirupang unno’ko’ tu Abraham dio to’ ba’ba tendana tonna sarrang allo.

²Anna bangunan matanna, natiroi den muane tallu bendan dio tingayona; iatonna tiromi, ma’dondomi dio mai to’ ba’ba tendana male untammui tu tau iato mai, anna tukku rapa’ rokko padang.

³Nama’kada nakua: O Puangku, iake denni kamamaseanta lako kaleku, da talendu’i bangna’.

⁴Da’ito anna baangki’ uai tau sidi’ la tabasean lette’ta, tasissare-sare indete to’ garonto’ kayu.

⁵La kubaangki’ roti sangsasa’ anna mole tu ta’ka’ta tamane tarru’; inang siappa’ dukamoki’ lempang dio to’ lantangku! Mebalimi tu tau iato: Pogau’mi susitu mupokadanna.

⁶Sasa-sasami male tama tendana tu Abraham lako Sara, nama’kada nakua: Madomi’ko unnala ta’pung manisak tallung bakku’, la’pa’-la’pa’i ammu rangginai.

⁷Ma’dondomi tu Abraham lako to’ inan sapi, naalami misa’ tu anak sapi kamalumemme’-memmeranna sia melo rupanna, anna benni solana, nasarra’i natollo’.

⁸Naalaomi Abraham tu dadi’ sola bumbungan na iatu anak sapi mangka ditollo’, napalenna’i dio tingayona tau iato mai; nabendan diong to’ garonto’ kayu sikandappi’ tau iato mai, tonna kumande tu tau.

⁹Nakuami tu tau iato mai lako Abraham: Umbami tu Sara, bainemu? Mebalimi nakua: Lan sia tenda.

¹⁰Nakuami: Tae’ nasalai tang sae pole’na’ lako kalemu, ketaun pole, attu susite, la denmo pia muane nadadian Sara, bainemu! Iatu kada iato narangi Sara tu bendan dio to’ ba’ba tenda Naboko’i.

¹¹Iatu Abraham sola Sara matuamo, matessek tonganmo, na iatu Sara radanmo tu kanalambiranna bulanna.

¹²Iamoto anna metaa tu Sara nama’kada lan penaanna nakua: Ma’dinparaka la diong mai penaangku ke tang pa’belamo’ sia iatu muaneku matua dukamo?

¹³Ma’kadami tu PUANG lako Abraham: Ma’apari anna metaara tu Sara, nakua lan penaanna: Ma’din tonganpara’ka kianak, te matuamo’?

¹⁴Denraka apa tang dadi ke PUANG? Iake attu susite taun pole’ la saeNa’ lako kalemu, la denmo pia muane nadadian Sara.

¹⁵Meonganmi tu Sara kumua: Tae’ kumetaa, belanna mataku’. Nakuami tu Puang: Tae’, manassa metaako.

¹⁶Ke’de’mi tu tau sola tallui inde to dio mai anna ma’palulako tondok Sodom, anna male tu Abraham ussolanni.

¹⁷Nakuami tu PUANG: Ma’apari angKu la umbunianri Abraham tu apa la Kupogau’?

¹⁸Belanna iatu Abraham la dadi misa’ bangsa kapua sia kuasa, tu napobannang dinii umparongko’i tu mintu’ bangsa lan telino.

¹⁹Belanna mangkamo Kuturo ta’ba, dikua anna patudui tu mai anakna sia bati’na, la ungkaritutui lalanNa PUANG, la umpogau’ kamaloloan sia kamalamburan anNa palanda’i PUANG lako kalena tu apa mangka Napokadanni.

²⁰Ma’kadami tu Puang Matua nakua: Tu belanna kapuamo tu sarro diong mai Sodom na Gomora sia belanna kakadakeanna tau iato mai lendu’ tonganmo,

²¹iamoto angKu mengkalao totemo la lao untiroi ba’tu napogau’ nasangmi susitu sarrona rampo lako Kaleku ba’tu tae’i, angKu issanni!

²²Sepangmi tu tau sola duai nama’palulako Sodom, apa iatu PUANG torropa sola Abraham.

²³Saemi tu Abraham umpentireke’i anna ma’kada nakua: Ma’apari na la umpasisabu’iri PUANG tu to malambu’ sola to kadake?

²⁴Umbai den limangpulo tu to malambu’ lan tondok iato, ma’apari anNa la ussabu’iri Puang, natae’ Nakarimmanni tu tondok iato bannang dio te limangpulo to malambu’ lan?

²⁵Toyang ia tondonna lalan dio mai Puang la umpogau’i tu susinnato, la umpasipatei to kadake tu to malambu’, butung Napasangtinti to kadake tu to malambu’; toyang ia tondonna lalan dio mai Puang to. Ma’apari Ia tu To Ma’paolai salunna te mintu’ lino anna tae’ra Nala umpasalunnai tu salunna?

²⁶Ma’kadami tu PUANG kumua: Iake denni limangpulo to malambu’ Kukabu’tui lan tondok Sodom, manassa Kukarimmanni mintu’ tondok iato bannang dio tau iato.

²⁷Ma’kada polemi tu Abraham nakua: Tonganna tongan losso’ sia barubuk balingku, kupengkabatta’imo sipa’kada Puang.

²⁸Umbai iato limangpulo to malambu’ sosso’ lima, ma’apai anNa la ussanggangi dukai Puang tu tondok iato, belanna sosso’ lima tau? Nakuami Puang: Iake denni Kuappa’ patangpulo llima lan, tae’ angKu sanggangi tu tondok iato.

²⁹Napasilambi’mi Abraham ma’kada lako Puang: Umbai den patangpulo tu to malambu’ lan. Mebalimi Puang Nakua: Tae’ angKu la umpogau’i belanna bannang dio to tau patangpulo.

³⁰Ma’kada tu Abraham nakua: Da Naposengkei Puang te kadangku: Umbai den tallungpulo tu to malambu’ lan. Nakuami Puang: Iake denni tallungpulo tau Kuappa’ lan, tae’ angKu la umpogau’i.

³¹Ma’kadami tu Abraham: Umpengkabatta’i tonganmo’ kaleku ma’kada lako Puang: Umbai den duangpulo to malambu’ lan. Ma’kadami Puang: Belanna bannang dio to duangpulo tau, tae’ angKu la ussanggangi.

³²Nama’kada pole tu Abraham, nakua: Da Naposengkei Puang te kadangku ia mannamo te pissan: Umbai den sangpulo tau lan. Nakuami Puang: Belanna bannang dio to sangpulo tau, tae’ angKu ussanggangi.

³³Iatonna upu’mo kadanNa lako Abraham, malemi tu PUANG; sulemi tu Abraham lako inanna.