Read Toraja-Sa'dan KADADIAN 19 Bible Online

KADADIAN 19 - Toraja-Sa'dan bible

KADADIAN 19

¹Rampomi tu malaeka’ sola duai lako tondok Sodom tonna makaroen; attu iato siappa’ unno’ko’ tu Lot dio to’ babangan tondok Sodom. Iatonna tiromi Lot, ke’de’mi male umpessitammui, tukkumi rapa’ rokko padang.

²Nama’kada nakua: Melo ke lempangi tu puang lako to’ banuangku anta ma’bongi dio, nadibaseimora tu lentekna puang, namasiangpa melambi’ anta ke’de’ male umpatarru’ lalanta. Mebalimi sola duai nakua: Tae’, sangadinna la ma’bongi diokan to’ pasa’.

³Tontong bangmi nalono’, naurunganni lempang sola duai lako natama banuanna, anna toratui, nagaragan pa’ranggina tang diragii; kumandemi sola duai.

⁴Tae’ bangsia anna bambangan kalena la mamma’, saemi tu mintu’ pa’tondokan, iamotu mintu’ muane lan Sodom, to matua to mangura, mintu’ to sanggundangan rambu tae’ pa’de rupanna umpatama limbu banua iato.

⁵Metambami lako Lot nakua: Umbamira tu to sae tama banuammi te bongi? Solanni sun, angki pogau’ pa’poraiangki lako kalena.

⁶Sunmi tu Lot lako tangdo’ la lao lako, anna rapa’i tu tutu’ ba’ba.

⁷Nakuami ma’kada: E siulu’ku, da mipogau’ kakadakean susito.

⁸Den tu anakku baine da’dua, tae’ bangpa nalako muane, da’ito anna ia kutassurangkomi, pogau’i lako tu misanganna melo, podo da ammi patumba lenni te muane, belanna la ungkaritutui kalena, nasurruk tama ongan banuangku.

⁹Ma’kadami tu to buda nakua: Mallaiko! sia nakua: Misa’i to sae tinde anna la ma’parenta lenno! Totemo la mandupoko kikadakei anna iatu tau sola duai! Nalumpa’imi tau iato mai tu Lot, sia pantan lako la untesse-tesse ba’ba.

¹⁰Apa iato tau sola duai umpopengkorong limanna, nariu’i tu Lot tama banua anna salli’i tu ba’ba.

¹¹Napasuleimi te tau sola duai tu mintu’ to dio to’ ba’ba, la bitti’na la kapuanna, napamaraun tu matanna naurunganni bo’yo’ undaka’i tu ba’ba.

¹²Nakuami tinde tau sola duai lako Lot: Iake denpi minintummu indete ba’tu anakmu muane ba’tu baine ba’tu mintu’raka solamu lan kota iate, solanni sun lan mai inan iate.

¹³Belanna la kisanggang te tondok, apa kapuamo tu sarro kendek dio oloNa PUANG, sia nasuamokan PUANG ussanggangi.

¹⁴Sunmi tu Lot anna sipa’kada-kada minintunna, tu la sibali anakna baine, nakua: Ke’de’komi, tassu’komi lan mai te inan iate, belanna la Nasanggang PUANG te tondok iate! Apa nasanga minintunna kumua nabarrugai.

¹⁵Iatonna passisimo randan langi’, naparuku-rukumi malaeka’ sola duai tu Lot, nakua: Millikmoko, solanni tu bainemu sia iatu anakmu baine da’dua tu musiban inde, daammu sabu’ lan kasanggangan buntu tumangna kota iate.

¹⁶Apa torro bangpa ma’dempa-dempa, natoemi tinde malaeka’ sola duai tu limanna sia limanna bainena sia limanna anakna sola duai, belanna la nakaturu-turui duka PUANG, nasolammi sun, nabaai lako salian tondok.

¹⁷Iatonna solammi sun, ma’kadami tu misa’ nakua: Pallaiangko kalemu ke la ungkatirinnaiko katuoammu; da ammu messaile len sia da ammu torro len lan lili’na Padang; mallaiko langngan buntu, da ammu sabu’.

¹⁸Ma’kadami tu Lot lako nakua: Da ammi pasusikanto, o puang!

¹⁹Iake mikaturu-turuimo’, la mipakapua pissan tu kamamaseammi, tu mipa’pekitanammo lako kaleku, la ungkatirinnai sunga’ku, belanna tang kubela la mallai langngan buntu, nalambiranna’ manii kasanggangan iato, angku matemo.

²⁰Tiromi to dio kota, mandappi’ sia kubela sia mallai lako; sia ia dukamo misa’ kota bitti’, da’ito angku male bangmo ussurrukan ulungku lako, angku tuo mana’pa. Tang kota bitti’raka?

²¹Nakuami lako Lot: Iate ianna te kukadoimo tu palakummu, tae’ angku la ussanggangi tu kota mupokada.

²²Madomi’ko male umpallaian kalemu lako, belanna tae’pa kuma’din umpogau’ misa’ apa, ke tae’pi ammu rampo lako. Iamoto anna sangai Zoar tau tu kota iato.

²³Dellekmo dio randan langi’ tu allo tonna tamamo kota Zoar tu Lot.

²⁴Mangkato napaurannimi PUANG dao mai langi’ uran solo’ sia api lu dio mai PUANG, tu kota Sodom na Gomora.

²⁵Nabaliangammi Puang tu mintu’ kota iato sia mintu’ lili’ Padang sia mintu’ lisa’na kota sia tanan-tananan.

²⁶Messailemi sule tu bainena Lot, namendadi lentong sia.

²⁷Iatonna melambi’ dio mai to allo iato, millikmi tu Abraham namale lako to’ inan pura nanii bendan dio oloNa PUANG.

²⁸Namentiro lako to’ sipatunna Sodom na Gomora sia lako to’ sipatunna lili’ bambana Padang, anna tiroi tu rambu kendek diong mai, susi rambu sun lan mai panglallangan.

²⁹IatonNa sanggangi Puang Matua tu mintu’ kota dio lili’ Padang, Nakilalaimi tu Abraham, iamoto anNa patassu’i tu Lot lan mai kasanggangan, tonNa balianganni tu kota tu pura nanii Lot.

³⁰Tassu’mi tu Lot lan mai tondok Zoar anna torro dio lu buntu sola tu anakna baine da’dua, belanna mataku’ mari’pi lan tondok Zoar; torro lanmi misa’ lo’ko’ sola tu anakna da’dua.

³¹Ma’kadami tu anak bunga’na lako adinna: Iatu ambe’ta matuamo natae’ bang misa’ muane lan tondok iate la tasilambiran susitu aluk malutena lino.

³²Maiko anta pairu’i uai anggoro’ tu ambe’ta anta sangampa’, anta padenan bati’ ambe’ta.

³³Tonna bongi iato napairu’mi uai anggoro’ tu ambe’na, anna sangampa’ ambe’na tu pa’bunga’na, tae’ bangmi nasa’dingi ambe’na tonna mamma’ rokko sia iatonna millik.

³⁴Iatonna masiang dio mai ma’kadami tu kakanna lako adinna nakua mangkamo’ sangampa’ ambe’ku sangmai’ bongi; maiko anta pairu’ polei uai anggoro’ te bongi iate, ammu lao duka sangampa’, anta padenan bati’ ambe’ta.

³⁵Napairu’mi uai anggoro’ tu ambe’na to bongi ia dukato, nalao tu adinna sangampa’ ambe’na; tae’ bangmi nasa’dingi Lot tonna mamma’ rokko sia iatonna millik.

³⁶Ma’tambukmi sola duai tu anakna Lot nakia’tangi ambe’na.

³⁷Kianakmi tu kakanna undadian misa’ pia muane, nasangaimi Moab, iamo nanii bu’tu mintu’ to Moab sae lako totemo.

³⁸Na iatu adinna undadian duka misa’ pia muane, nasangaimi Bin-Ami, iamo nanii bu’tu mintu’ to Amon sae lako totemo.