Read Toraja-Sa'dan KADADIAN 2 Bible Online

KADADIAN 2 - Toraja-Sa'dan bible

KADADIAN 2

¹Susimoto tu langi’ sola lino sia mintu’ issinna mangka dipatepu.

²Iatonna allo ma’pempitu tonNa patepumi Puang Matua tu pengkaranganNa tu mangka Nakarang, Natorroimi tonna allo ma’pempitu ungkarangi tu mintu’ pengkarangan mangka Nakarang.

³Napassakkemi Puang Matua tu allo ma’pempitu sia Napamadatu, belanna ia Nanii untorroi ungkarang pekaranganNa tu mangka Nakarang tonNa padadii.

⁴Susimoto tu ulelean diona tipamulanna langi’ sola lino, tonna mangka dipadadi. IatonNa garagai tipamulanna PUANG Kapenomban tu langi’ sola lino,

⁵— anna mintu’ kayu dao kuli’na padang tonna tae’pa lan lino sia mintu’ tananan dao kuli’na padang tonna tang mentarukpa, belanna tae’pa anNa pasaei PUANG Kapenomban tu uran tama lino sia tae’pa tau la umposara’i tu litak,

⁶sangadinna kendek tu ambun diong mai padang anna sakka’i tu mintu’ kuli’na padang — ,

⁷Nakombongmi PUANG Kapenomban tu tolino dio mai litak, Napamurru’i tama to’tok illongna tu penaa napotuo, susimoto tu tolino mendadi misa’ a’gan tuo.

⁸Nagaragaomi PUANG Kapenomban tu Pa’lak dio Eden, dio rampe matallo, indemoto Napannianni tu tolino mangka Nakombong.

⁹Indeto dio Nanii PUANG Kapenomban umpatuo ma’rupa-rupa kayu, naporai tau untiroi sia melo la dikande, sia den duka tu kayu katuoan, lan tangnga pa’lak iato, sia kayu kapaissanan diona melo na kadake.

¹⁰Dio mai Eden nanii lolong salu la ussakka’i pa’lak iato, indemoto nanii tipa’a’pa’ tu salu.

¹¹Iatu salu bunga’na disanga Pison, ussalungku tondok Hawila, tu nanii bu’tu bulaan.

¹²Iatu bulaanna padang iato matasak tongan, sia den duka dio tu lite busarungngu’ sia ake’ ido.

¹³Iatu salu ma’penduanna disanga Gihon, iamo ussalungku tondok Etiopia.

¹⁴Iatu salu ma’pentallunna disanga Hidekel, iamo lolong lu tama rampe matallona Asyur, na iatu salu ma’penna’pa’na disanga Efrat.

¹⁵Naalami PUANG Kapenomban tu tolino, Napalanni pa’lak Eden, kumua anna posara’i sia anna kampai.

¹⁶Ma’kadami PUANG Kapenomban lako tolino Nakua: Iatu buanna mintu’ kayu lan te pa’lak, ma’din mukande unturu’ pa’poraiammu,

¹⁷apa iatu kayu kapaissanan diona melo anna kadake da mukandei, belanna randuk allo iato ke mukandei, la ma’lalan mateko.

¹⁸Sia ma’kada tu PUANG Kapenomban susite: Tae’ anna melo, ke misa-misa bangri tu tolino. La Kukombongan to umbalii, tu nasangkalammaran.

¹⁹Belanna iatonna mangkamo Napadadi PUANG Kapenomban tu mintu’na olo’-olo’ dao kapadanganna sia mintu’ manuk-manuk dao lu langi’ dio mai litak, Napopentingayo nasangmi lako tolino, la Natiro umba nakua tolino la ussangai; umba nasanganni tolino tu mintu’ a’gan tuo, susi dukamoto tu sanganna.

²⁰Nasangaimi tolino tu mintu’ patuoan sia mintu’ manuk-manuk dao lu langi’ sia mintu’ olo’-olo’ dio lu kapadanganna, apa iatu tolino tae’ anna appa’i tu to nasibalian tu nasangkalammaran.

²¹Napamamma’ kalupi-lupiammi PUANG Kapenomban tu tolino, anna leppeng Naalami tu usukna sangbamban, Napakemunni duku’ tu pangalaian.

²²Nakombongmi PUANG Kapenomban misa’ baine tu usuk Naala lan mai kalena tolino, Nasolanni lako tolino.

²³Nakuami tolino: Buku lu dio pale’ mai bukungku sia duku’ lu dio mai duku’ku; la disanga baine, belanna diala dio mai muane.

²⁴Iamoto anna la untampe ambe’na sia indo’na tu muane anna la’ka’ lako bainena, anna mendadi sangbatang kale sola duai.

²⁵Ma’kale-kale bang sola duai ma’baine tu tolino, apa tae’ namasiri’.