Read Toraja-Sa'dan KADADIAN 20 Bible Online

KADADIAN 20 - Toraja-Sa'dan bible

KADADIAN 20

¹Ke’de’mi inde to dio mai tu Abraham nama’palusau’ Padang lo’na lu, torromi dio kasiallaranna tondok Kadesh anna Syur sia mempue dio tondok Gerar.

²Napokadami Abraham tu diona Sara, bainena nakua: siulu’ku. Mesuami tu Abimelekh, datu Gerar umbaai sae tu Sara.

³Apa sae tu Puang Matua lako Abimelekh bongi iato lan tindona ma’kada kumua: Tonganna tongan la mateko, bannang dio te baine mangka muala, belanna bainenamo tau!

⁴Apa tae’pa narumbu lenni Abimelekh, iamoto anna ma’kada nakua: O Puang, la Mipateiraka tu bangsa tang sala?

⁵Tang Abraham kalenaraka umpokadanna’ susite, kumua: Iate baine, siulu’ku? sia ia duka kalenamo tu baine iato ma’kada susite kumua: Iate muane siulu’ku. Mangkamo kupogau’ tu iannato naturu’ bannang pute sia lima mapindanku!

⁶Ma’kadami tu Puang Matua lako kalena lan tindo: Kuissan sia kumua bannang pute tu penaammu mangka umpogau’i to, sia mangkamoko Kugagai umpogau’ kasalan lako kaleKu, iamoto angKu tang untangga’ko urrumbui tu baine iato.

⁷Totemo pasuleanni tu bainena muane iato, belanna nabi tu muanena, anna passambayangangko, mumarendeng, apa iake tae’i ammu pasuleanni, issan bangmi, tae’ tang matemu sola tu mintu’ solamu!

⁸Millikmi tu Abimelekh tonna melambi’, anna tambai tu mintu’ solana lan banuanna, napokadai te mintu’ kada lako tau iato mai, lendu’mi mataku’na sola nasangi tinde tau.

⁹Natambaimi Abimelekh tu Abraham, nama’kada nakua: Penggauran apara te migaurangkan sia apara salaku lako kalemi, ammi pabu’tuanra’ kasalan kapua sola to kuparenta? mangkamo mipogau’ lako kaleku ba’tu pira-pira penggauran tang sipatu dipogau’.

¹⁰Sia nakua siapa tu Abimelekh lako Abraham: Apara tu nakita penaammi, ammi pogau’ri tu susinna to?

¹¹Mebalimi tu Abraham: Belanna iatu passangangku, iake tae’i lan tondok iate tu to ungkataku’ Puang Matua, manassa la napateina’ diona baineku.

¹²Tonganna anak darangku duka sia, anakna ambe’ku, apa tangia anakna indo’ku, na iamo kupobaine.

¹³Susimoto, tonna suana’ Puang Matua tassu’ lan mai banuanna ambe’ku male lako padang tau, kukuami lako: Inde tu tanda kamamaseammu lako kaleku, tu la mupasomboanna’ umba-umba tu inan tarampoi, pokadai kumua siulu’muna’.

¹⁴Nasusi to naalami Abimelekh tu ba’tu pira-pira domba sia sapi sia muane sabua’ sia baine sabua’, nabenni Abraham sia iatu Sara, bainena Abraham napasule dukamo.

¹⁵Ma’kadami Abimelekh nakua: Tiroi, iatu padangku nata’pai nasang matammi, umbanna tu naala penaammi iamo minii torro.

¹⁶Nakuami lako Sara: Iatu siulu’mi mangka kuben sangsa’bu sikele’ salaka la misamboan siri’mi lako mintu’ to misisolan anna payan kumua tae’ misala.

¹⁷Napassambayangammi Abraham tu Abimelekh sola ma’baine sia mintu’ baine sabua’, anna kianak pole sule.

¹⁸Belanna napapirri’ PUANG tu inan taunna mintu’ baine lan banuanna Abimelekh, belanna pa’katumanganna Sara, bainena Abraham.