Read Toraja-Sa'dan KADADIAN 21 Bible Online

KADADIAN 21 - Toraja-Sa'dan bible

KADADIAN 21

¹Nabuaimi PUANG lako Sara to apa mangka Naalluranni sia Napogau’ PUANG lako susitu kadanNa.

²Belanna ma’tambukmi tu Sara, anna padadianni misa’ pia muane tu Abraham tonna matuamo, iamoto attu mangka Napamanassa Puang Matua lako kalena.

³Nabenmi sanga Abraham tu anakna, dadi dio kalena tu napadadianni Sara, nasanga Ishak.

⁴Nasunna’mi Abraham tu Ishak, anakna, tonna karuamo allona dadinna susitu pepasanNa Puang Matua lako kalena.

⁵Iatonna didadian tu Ishak, saratu’mo taunna tu Abraham.

⁶Nakuami Sara: Napopetaana’ Puang Matua, naurunganni mintu’ tu to urrangii la kusolan metaa.

⁷Sia nakua siapa: Mindara la ma’din umpokadai to lendu’namo lako Abraham, kumua la umpasusu pia-pia’ tu Sara? Na kupadadian duka siai misa’ pia muane lan attu matuanna.

⁸Iatu pia sakapua-puana nasumarak susu. Iatonna sumarak susumo tu Ishak, umpogau’mi pa’maruasan kapua tu Abraham.

⁹Natiromi Sara tu anakna Hagar, baine to Mesir, tu mangka napadadian Abraham marassan ma’be’se.

¹⁰Iamoto anna kua Sara lako Abraham: Rambai lao te baine sabua’ iate sola anakna, belanna iate anakna baine sabua’ iate, tae’ nama’din la sidulu mana’ anakku Ishak.

¹¹Iate kada iate lendu’ kadakena nasa’ding Abraham, diona tu anakna.

¹²Apa ma’kada tu Puang Matua lako Abraham: Da na kadake musa’ding diona te pia iate sia diona kaunanmu; iatu mintu’ napokadanna Sara perangii, belanna lan Ishak la dinii ussa’bu’i tu bati’mu.

¹³Na iatu anakna te baine kaunan la Kupadadi misa’ bangsa, belanna bati’mu duka.

¹⁴Millikmi tu Abraham tonna melambi’, naalai tu roti na misa’ kiriba’ nanii uai lan, nabenni Hagar, napatoppo’i dao palempengna, naben dukai tinde pia, anna suai male. Malemi, anna pusa lan padang Bersyeba.

¹⁵Iatonna puramo tu uai lan kiriba’ napamamma’mi tu pia dio to’ kakayuanna.

¹⁶Malemi unno’ko’ lako to’ sipatunna agi-agi sangpassumpiran, anna ma’kada nakua: Tang kusara untiroi te pia mate. Unno’ko’mi sipatu pia iato lako, anna tumangi’ ma’urrukan.

¹⁷Iatu gamaranna tinde pia narangi Puang Matua, Nametamba tu Malaeka’Na Puang Matua dao mai suruga ma’kada lako Hagar Nakua: Matumbaroko Hagar? Da mumataku’, belanna Naperangiimo Puang Matua tu gamaranna tinde pia dio mai to’ inanna.

¹⁸Ke’de’ko, mubangunanni tu pia, mutoei, belanna iatinde pia la Kupopendadi misa’ bangsa kapua.

¹⁹Nabungka’mi Puang Matua tu matanna Hagar; anna tiroi tu misa’ bubun, malemi umponnoi uai tu kiriba’, napairu’i tinde pia.

²⁰Narondongmi Puang Matua tinde pia, naurunganni kapua, natorro ma’tondok lan padang pangallaran mendadi to ma’pana.

²¹Untorroimi padang Paran, naalammi indo’na misa’ baine dio mai tondok Mesir, la napobaine.

²²Ma’kadami tonna attu iato lako Abraham tu Abimelekh sola Pikhol, pa’baraninna, nakua: Iatu kamu narondongkomi Puang Matua lan mintu’ penggauran mipogau’.

²³Iamoto menggatakomi totemo lako kaleku ussa’bu’ sanganNa Puang Matua kumua tae’ ammi la ungkadakean lenna’ penaa, ba’tu bati’ku, ba’tu rapungku, sangadinna la mipogau’ lako kaleku sia lako tondok minii mempue lan, tu sitinayanna kameloan mangka kupogau’ lako kalemi.

²⁴Ma’kadami tu Abraham nakua: Kumenggatamora.

²⁵Naparapa’mi Abraham lako Abimelekh tu diona bubun mangka narampa solana Abimelekh.

²⁶Nakuami tu Abimelekh: Tae’ aku kuissanni minda mangka umpogau’i tu penggauran iato. Sia tae’ duka ammi pokadan lenna’, sia tae’ duka kurangi lenni tu iannato, sangadinna iamira te totemo.

²⁷Naalami Abraham ba’tu pira-pira tu domba sia bembe’ sola sapi, anna benni Abimelekh. Sibassemi sola duai.

²⁸Nasarakkimi Abraham tu pitu domba birang dio mai mintu’ domba.

²⁹Ma’kadami tu Abimelekh lako Abraham nakua: Apa la dipapatui te pitu domba birang, tu mangka mipopessarak?

³⁰Mebalimi Abraham: Iate pitu domba la mikarang dio mai limangku la kupotananan sa’bi, kumua aku umbo’bokki te bubun iate.

³¹Iamoto anna sangai tau Bersyeba tu inan iato, belanna inde to nanii mangka sibasse sola duai.

³²Susimoto tu kasibasseanna dio Bersyeba sola duai; mangkato, ke’de’mi tu Abimelekh na Pikhol, pa’baraninna, nasule lako tana Filistin.

³³Natananmi Abraham tu sangto’ kayu esele dio Bersyeba anna menomba ussa’bu’ sanganNa PUANG, Kapenomban matontongan.

³⁴Torromi tu Abraham dio padang to Filistin ba’tu pirang-pirang allo.