Read Toraja-Sa'dan KADADIAN 22 Bible Online

KADADIAN 22 - Toraja-Sa'dan bible

KADADIAN 22

¹Pakalan denmi pissan, iamo tonna mangka tu mintu’nato, Natobami Puang Matua tu Abraham, Nakua lako: E Abraham! Ma’kadami: Inde siana’, Puang!

²Ma’kadami Puang: Totemo alai tu anak tungga’mu, iamo Ishak tu mupakaboro’, solanni lako tana Moria, ammu pemalaranni dio la mendadi pemala’ ditunu pu’pu’ dao misa’ buntu, tu la Kupakitangko.

³Melambi’mi millik tu Abraham, nalapikki tu keledainna anna solanni tu solana da’dua sia iatu Ishak, anakna, sia napiak tu kayu la napantunuan pemala’ ditunu pu’pu, anna ke’de’ male lako to’ inan mangka Napokadanni Puang Matua.

⁴Iatonna ma’tallung alloammo nabangunammi Abraham tu matanna anna tiro mambelai tu inan iato.

⁵Ma’kadami tu Abraham lako solana: Torromokomi sola keledai inde te, na iatu aku sola te pia la male inde to lako; iake mangkamokan menomba, la sule siakan sae.

⁶Naalami Abraham tu kayu la dipantunuan pemala’ ditunu pu’pu’, anna papassanni tu Ishak, anakna, anna ia kalena untangke ruaya sia piso, namale sola duai.

⁷Ma’kadami tu Ishak, lako Abraham, ambe’na, nakua: O ambe’! Mebalimi nakua: Apara, anakku? Nakuami tu Ishak: Tiromi te api sia kayu, apa umbara tu anak domba la ditunu pu’pu’?

⁸Mebalimi tu Abraham, nakua: E anakku, Puang Matua Ia umpadenanni Kalena tu anak domba la ditunu pu’pu’. Malemi sola duai.

⁹Rampomi lako inan mangka napokadanni Puang Matua, anna garagai Abraham tu misa’ inan pemalaran, napalangnganni tu kayu anna pungoi tu Ishak, anakna, napandanni dao inan pemalaran daona lu kayu.

¹⁰Nabenammi Abraham tu limanna la unnala piso, la nareresan anakna.

¹¹Apa metamba lako kalena tu malaeka’Na PUANG dao mai suruga Nakua: E Abraham, Abraham. Mebalimi nakua: Inde siana’, Puang!

¹²Ma’kadami tu Malaeka’ Nakua: Da mupata’pai lima tu pia, sia da mupatumba lenni, apa Kuissanmo totemo tu kaungkatakurammu Puang Matua, belanna ia duka ia tu anakmu, anak tungga’, tae’ ammu pessinampei lako Kaleku.

¹³Nabangunammi Abraham tu matanna, natiroi tu misa’ domba lako dio to’ boko’na tikadang tu tandukna lan to’ kayu, malemi naala Abraham, anna pemalaranni mendadi pemala’ ditunu pu’pu’ ussonda anakna.

¹⁴Nasangaimi Abraham tu inan iato: PUANG umpadenni. Iamoto anna sae lako totemo nakua tu tau: Dao buntu Nanii PUANG la umpadenni.

¹⁵Metamba ma’penduannami tu Malaeka’Na PUANG dao mai langi’ lako Abraham.

¹⁶Nakua: UmbasseNa’ kada ussa’bu’ Kaleku, kadanNa PUANG: tu belanna mupogau’ te iannate sia tae’ ammu pessinampei lako Kaleku tu anakmu, iamotu anak tungga’mu,

¹⁷manassa la Kubenko karongkosan kapua sia la Kupopemba’ka’ kalle-kallean tu bati’mu pada bintoen dao langi’ sia pada karangan dio biring tasik, sia la nalapa’ nasang bati’mu tu babanganna ualinna.

¹⁸Anna lan mai tarukmu la nanii unnappa’ karongkosan mintu’ bangsa lan te lino, belanna mupengkaolai tu kadangKu.

¹⁹Mangkato sulemi tu Abraham lako to’ inanna solana, situru’mi sule lako Bersyeba, anna torro dio Bersyeba.

²⁰Iatonna mangka tu mintu’nato, napokadami tau lako Abraham kumua: Iatu Milka denmo ba’tu pira-pira pia muane napadadian Nahor, siulu’mu.

²¹Iamo Us, pa’bunga’na, sia Bus adinna sia Kemuel, ambe’na Aram.

²²Na Kesed na Hazo na Pildash na Yidlaf na Betuel.

²³Betuel undadian Ribka; iamote tau karua tu nadadian Milka dio Nahor, siulu’na Abraham.

²⁴Na iatu baine tang nabolainna, tu disanga Reuma, undadian Tebah na Gaham na Tahash na Maakha.