Read Toraja-Sa'dan KADADIAN 23 Bible Online

KADADIAN 23 - Toraja-Sa'dan bible

KADADIAN 23

¹Iatu Sara saratu’ duangpulo mpitu taunna, iamo angge tuona Sara.

²Matemi tu Sara dio Kiryat-Arba, iamotu Hebron lan lili’ Kanaan; anna sae tu Abraham umbatingi sia untangi’i.

³Bendanmi tu Abraham dio mai to’ batang rabukna bainena, anna sipa’kada to Het, nakua:

⁴Iatu aku te to saena’ sia to mentiruranna’ lan tondokmi; benna’ dikka’ liang kupomana’ dio tondokmi, angku sisi’i tu to mateku.

⁵Mebalimi tu to Het lako Abraham nakua:

⁶Perangii tu kadangki, puang! kamumo tu misa’ datu tarompo’ tongan lan tondokki; umbanna tu liangki mala’bi’, iamo minii umpeliangi tu to matemi; tae’kan misa’ tang la umpa’bengan liangna la dinii umpeliangi tu to matemi tama.

⁷Ke’de’mi tu Abraham anna tukku dio to’ tingayona to sipopadang padang iato, iamotu to Het.

⁸Sipa’kadami Abraham tu mai tau iato, nakua: Iake miringnganni tu naala penaammi angku sisi’i tu to mateku, perangiina’, sia tulungna’ mipalakuanna’ lako Efron, anakna Zohar:

⁹anna benna’ tu lo’ko’ Makhpela, tu lo’ko’na dio randan pa’lakna, anna benna’ pada tu allinna siamo, la kupoliang mana’ lan tondokmi!

¹⁰Iatu Efron dio duka unno’ko’ sola to Het. Nabalimi Efron, to Het, narangii talinga ma’dandanna to Het sia mintu’ to tama sun lan kota iato, nakua:

¹¹Tae’ nasusi to! Perangiina’: iatu padang kubenkomi sia lo’ko’ lan kuben dukakomi, natingayoi mintu’ sangrara sangbukungku angku benkomi, peliang siai dio tu to matemi.

¹²Tukkumi tu Abraham dio tingayona mintu’ to ma’tondok.

¹³Ma’kadami lako Efron dio tingayona mintu’ to ma’tondok nakua: Iake naalai penaammi, la miperangii te kadangku. La kubaya’ tu alli padang; karangi tu doi’ dio mai kaleku, angku mane ma’din umpeliangi tu to mateku dio.

¹⁴Mebalimi tu Efron lako Abraham nakua:

¹⁵La miperangii te kadangku: iatu angga’na padang iato, a’pa’ratu’ sikele’ salaka,[1] apaora to tu kitanna sola dua? Iamoto peliang bangmi dio tu to matemi.

¹⁶Napasituru’mi Abraham tu kadanna Efron, anna timbanganni pada tu napokadanna dio tingayona mintu’ to Het, tu a’pa’ratu’ sikele’ salaka, tu naangga’na to ma’baluk.

¹⁷Susimoto tu padangna Efron dio Makhpela dio rampe matallona Mamre, iamotu padang sola lo’ko’ lan sia mintu’ kayu dio padang iato,

¹⁸diben nasangmo Abraham to, dio tingayona to Het sia to tama sun dio babangan tondok, la napoapa.

¹⁹Mangkato napeliangmi Abraham tu Sara, bainena lan lo’ko’ dio padang Makhpela, dio rampe matallona Mamre, iamo Hebron dio lili’na Kanaan.

²⁰Susimoto tu padang iato sola lo’ko’ lan nasorongmo to Het lako la napoliang misa.