Read Toraja-Sa'dan KADADIAN 24 Bible Online

KADADIAN 24 - Toraja-Sa'dan bible

KADADIAN 24

¹Iatu Abraham matuamo sia masaimo tau, Naparongko’mo PUANG lan mintu’na.

²Ma’kadami tu Abraham lako ruranan matuanna lan banuanna sia umpoissan mintu’ apanna nakua: Padiongi to’ garonto’ pupungku tu limammu.

³Angku popenggatako ussa’bu’ PUANG Kapenombanna langi’ sola lino, kumua da mualanni anakku la napobaine tu misa’ baine dio mintu’ anak to Kanaan, tu kunii duka torro.

⁴Sangadinna la lu lakoko tondokku, lako sangdadiangku la unnalanni baine tu anakku Ishak.

⁵Nakuami tu rurananna lako: Iake manokai tu baine undi urrundu’na’ sae indete tondok iate, ma’dinraka kusolan sule tu anakmi lako tondok mangka mitampe?

⁶Ma’kadami Abraham nakua: Kanandai meloi, da musolan sulei lako tu anakku.

⁷Iatu PUANG, Kapenomban dao suruga, tu mangka ussuana’ sun lan mai banuanna ambe’ku sia lan mai tondokna sangdadiangku sia mangka ma’kada lako kaleku Nabassei kada Nakua: La Kukamasean bati’mu te padang iate, Ia dukamo la ussua malaeka’Na dolo dio to’ mupatunna, ammu alanni baine tu anakku dio mai.

⁸Apa iake manokai undi, masero pindanko dio mai te penggatamu lako kaleku; sangapaoi anna da musolanni lako tu anakku!

⁹Napadiongmi to’ garonto’ pupunna Abraham tu limanna tinde rurananna, anna menggata tu iannato.

¹⁰Naalami tinde kaunan tu untana puangna sangpulo, namale; iatu mai iananna puangna lan pala’na; ke’de’mi male lako Mesopotamia; tondokna Nahor.

¹¹Napanno’ko’mi tu untana dio salian tondok, sikandappi’ misa’ bubun tonna makaroen sae, tonna attunna sun nasang tu baine meuai.

¹²Ma’kadami nakua: O PUANG, Kapenombanna puangku Abraham, pamaupa’na’ te allo iate sia tiroanni kameloan tu puangku Abraham.

¹³Tiromi, la bendan bangmo’ indete to’ bubun, na la sun nasangmo tu anak dara lan te kota meuai.

¹⁴Melo ke susii te dako’, iatu anak dara kukuan lako: Patorroi tu bussomu, angku iru’pi tu uai, namebali: Iru’mi sia ia duka tu untami la kupairu’ duka, iamora to tu Napasiuparanni Puang tu taumMi Ishak, na iannato kunii unnissanni kumua Natiroan kameloan Puang tu puangku!

¹⁵Dadimi susito tonna tang upu’pa ma’kada-kada, sun tonganmi tu Ribka ussompo busso, iamo anakna Betuel, dadi dio Milka, bainena Nahor, tu sangmanena Abraham.

¹⁶Iatu anak dara iato, iamo misa’ anak dara me’lok tongan pantarisanna, tae’pa natandai muane, malemi rokko bubun unnissii bussona, nakendek sule.

¹⁷Ma’dondomi lako tu ruranan iato nama’kada nakua: Benna’ dikka’ kuiru’i sidi’ tu uai lan mai bussomu.

¹⁸Nakuami: Iru’mi, puang! Ta’pa napatorromi tu bussona natoei, anna pairu’i.

¹⁹Iatonna mangka umbenni nairu’, nakuami: E kualan dukai uai tu mintu’ untami anna pemosoi nairu’.

²⁰Nasarra’imi natua’ rokko pa’pairusan tu uai lan bussona, nama’dondo pole lako bubun untimba uai, anna alanni uai tu mintu’ untana.

²¹Kappa bangmi tinde tau untiroi lako, la morai unnissanni kumua Napamaupa’raka PUANG tu kalingkanna, tae’raka.

²²Nasusito, iatonna mangka nasangmo unniru’ uai tu mintu’ unta, naalami tau iato tu baba’ bulaan sangbangunan, sangtangnga sikele’ timbangna, na sangbangunan komba bulaan, sangpulo sikele’ timbangna, napaluangi tu limanna patomali.

²³Nakuami: Mindaroko anak? Pokadanna’. Den siaraka inan dio banuanna ambe’mu, tu ma’din kinii ma’bongi?

²⁴Nakuami tu anak dara lako: Anaknana’ Betuel, anakna Milka, tu napadadian Nahor Milka.

²⁵Sia nakua siapa tu anak dara lako: Den sia dalame sia silasa sia tu kande unta, sia den sia inan dinii ma’bongi.

²⁶Tukkumi tinde tau, umpenombai PUANG.

²⁷Nakua: Mintu’na kadipudian lu langngan nasang PUANG, Kapenombanna puangku Abraham, belanna tang Napamoro’ tu kamasokananNa sia kamarurusanNa lako puangku, Narenden marampa’mo’ PUANG lako to’ banuanna sangdadianna puangku!

²⁸Ma’dondomi te anak dara male umpokada nasangi te ianna te lako to’ banuanna indo’na.

²⁹Den anak muanena Ribka, disanga Laban; ma’dondomi tu Laban lao untammui tu tau iato lako to’ bubun.

³⁰Belanna iatonna tiromi tu baba’ na komba lan limanna anak daranna sia narangimo tu mintu’ kadanna Ribka, anak daranna nakua: Susito tu kadanna tau iato, saemi tu Laban umpessitammui tu tau iato, tu bendan bangpa dio sa’de untana sikandappi’ bubun.

³¹Nakuami Laban: Tamakomi mai, to Napamasakke PUANG. Ma’apari mibendan bangra iti’ salian, namangkamo kupasakka’ tu inan sia inan la nanii tu mintu’ unta!

³²Tamami banua tu tau iato, anna bukai tau tu lapik untana, nabenni dalame sia kande sia nabaan uai la nabasean lentekna sola tu mai to nasolan.

³³Mangkato napalennarammi kande tau, apa nakua: Tae’pa kumorai kumande, ke tae’pi anna pura nasang kupokada tu kadangku dolo. Nakuami tu Laban: Pokadami.

³⁴Nakuami: Aku te ruranannana’ Abraham.

³⁵Napasundun rongko’ tonganmo PUANG tu puangku, naurunganni tarompo’mo, naben PUANG ba’tu sangapa budanna domba, bembe’ sia sapi, salaka, bulaan, kaunan muane baine, unta sia keledai.

³⁶Na Sara bainena puangku, undadian misa’ pia muane tonna matuamo, anna ben nasangi to anakna tu mintu’ barang apanna.

³⁷Nasuamo’ puangku menggata nakua: Da mualanni baine tu anakku dio mai anak dara to Kanaan, te tondok kunii torro.

³⁸Sangadinna laoko lako to’ banuanna ambe’ku sia lako to’ pa’rapuangku, ammu dakaranni baine tu anakku dio.

³⁹Mebalimo’ lako puangku kukua: Umbai anna tae’ namorai tu baine iato undi urrundu’na’.

⁴⁰Nakuami lako kaleku: Iato PUANG kupengkaolaimo, tu la ussua malaeka’Na la musolan sia Ia duka la umpamaupa’ kalingkammu, ammu alanni baine tu anakku dio mai to’ pa’rapuangku sia dio mai banuanna ambe’ku.

⁴¹Iapi ammu masero pindan dio mai te penggatamu lako kaleku, ke rampomoko lako pa’rapuangku anna tae’ nabenko, manassa masero pindanmoko dio mai te penggatamu lako kaleku.

⁴²Nasusi to, iate allo saemo’ lako to to’ bubun, angku massambayang kukua: O PUANG, o Kapenombanna puangku Abraham, pamaupa’i tu lalan kuolainna.

⁴³Tiromi, bendanna’ indete to’ bubun, melo ke susii te: umbanna tu anak dara sun la meuai, angku ma’kada lako: Benna’ kuiru’i sidi’ tu uai lan mai bussomu,

⁴⁴nakuami: Iru’mi sia ia duka tu mintu’ untami la kualan uai, iamoto tu baine Napasiuparanni PUANG tu anakna puangku.

⁴⁵Tae’pa angku upu’ ma’kada lan penaangku, pakalan sunmi tu Ribka ussompo bussona namale rokko bubun unnala uai. Ma’kadamo’ lako kukua: Benna’ dikka’ angku iru’i.

⁴⁶Madomi’mi nalendokan dao mai palempengna anna kuai: Iru’mi puang, sia la kupairu’ duka tu mintu’ untami. Mangkato kuiru’mi na iatu mintu’ unta napairu’.

⁴⁷Kukutanaimi kukua: Mindaroko anak? Mebalimi nakua: Anaknana’ Betuel, anak dadianna Nahor, tu napadadianni Milka. Kupapasangimi baba’ lako, sia kupaluangi komba tu limanna patomali.

⁴⁸Tukkumo’ umpenombai PUANG, angku pudii tu PUANG, iamo Kapenombanna puangku Abraham, tu mangka urrendenna’ lako lalan tongan, la unnalanni anakna sangdadianna tu anakna puangku.

⁴⁹Na totemo, ke mitiroanni kameloan sia maruru’komi lako puangku, la mipokadanna’, angku issanni, kululako kanan, ba’tu lakoraka kairi.

⁵⁰Mangkato mebalimi tu Laban sola Betuel nakua: Iate ianna te, bu’tu dio Ia mai PUANG, tae’ nama’din la kikua lako kalemi kumua melo ba’tu kadake.

⁵¹Iti’ sia tu Ribka, tambaimi misolanni, da’ito anna pobainei anakna puangmi susitu kadanNa PUANG.

⁵²Iatonna rangimi rurananna Abraham tu mintu’ kadanna tau iato mai, tukkumi rapa’ rokko padang umpenombai PUANG.

⁵³Napatassu’mi tu ba’tu sangapa pareanan salaka sia bulaan sia ba’tu sangapa pakean, anna benni Ribka, sia ba’tu sangapa dukapa pareanan ballo nabenni tu anak muanena sia indo’na.

⁵⁴Kumandemi sia mangiru’mi sola solana nama’bongi dio. Mebongngi’mi millik, na ma’kada nakua: La messimanmo’ la sule lako puangku.

⁵⁵Nakuami tu anak muanena sola indo’na: Da’ito angki torropa ba’tu sangapa sola te anak dara, susito, sangpulo allona, mimane male.

⁵⁶Nakuami mebali: Da mitang unneloranna’ na Napamaupa’mo PUANG tu kalingkangku; da’ito kimalemo sule lako puangku.

⁵⁷Nakuami tu mai tau iato: Da’ito kitambai titi’ anak dara, angki pepudukki.

⁵⁸Natambaimi tu Ribka, anna kutanai lako nakua: Morairokoka la male sola tinde tau? Mebalimi nakua: La moraimo’ male.

⁵⁹Naelorammi tu Ribka, anak daranna male sola to massarakna sia iatu rurananna Abraham na mintu’ solana.

⁶⁰Napassakkemi tu Ribka nakua lako: E anak darangki, podo ammu membati’ massa’bu-sa’bu lampana, sia la nalapa’ nasang bati’mu tu babanganna ualinna!

⁶¹Ke’de’mi tu Ribka sola tu mai baine baananna, namale urrundu’i tu tau iato ussakei unta; nasolammi male tu Ribka.

⁶²Ia toda tu Ishak sae lu dio mai bubun Lahai-Roi, belanna torro dio padang lo’na lu.

⁶³Sunmi tu Ishak sumalong dio lu padang ma’tangnga’-tangnga’ tonna solo’ allo, naadonganni tu ulunna, pakalan anna tiroi tu ba’tu pira-pira unta sae.

⁶⁴Naadonganni Ribka tu ulunna; na iatonna ta’paimi matanna tu Ishak, mengkalaomi dao mai untana.

⁶⁵Nakuami tu Ribka lako rurananna Abraham: Mindara titi’ muane male dio padang sae untiroki’? Mebalimi nakua: Iamo puangku to. Naalami tu lullungna anna ma’lullung.

⁶⁶Naulelean nasangmi tinde ruranan lako Ishak tu mintu’ apa mangka napogau’.

⁶⁷Nasolammi Ishak tu Ribka tama tendana Sara, indo’na, napobainemi sia napakaboro’. Susimo kadipakatananna Ishak to tonna matemo tu indo’na.