Read Toraja-Sa'dan KADADIAN 25 Bible Online

KADADIAN 25 - Toraja-Sa'dan bible

KADADIAN 25

¹Kebaine polemi tu Abraham umpobaine misa’ baine disanga Ketura.

²Nakianak te undadian Zimran sia Yoksan sia Medan sia Midian sia Isybak na Suah.

³Na Yoksan undadian Syeba sola Dedan. Iatu bati’na Dedan iamotu to Asyur sia to Letushim na to Leum.

⁴Iatu mintu’ muane nadadian Midian iamotu Efa sia Efer sia Henokh sia Abida na Eldaa. Mintu’ te, muane bati’na nasang Ketura.

⁵Lako ia Ishak nanii nasang ussorongi Abraham tu mintu’ apa naampui.

⁶Apa lako anak tang nabolai naben pa’pakatana, mangkato nasua nasangmi mallai dio mai Ishak, anakna; tonna tuopa tu Abraham nasuai lako rampe matallo, lako Padang matallo.

⁷Inde sia tu lambe’na sunga’na Abraham, angge tuona saratu’ pitungpulo llima taunna.

⁸Ka’tumi angin dipudukna Abraham sia ronta’mi tondon to batangna tonna matua indukmo banu’ karurungan, nadipatama batu dilobang dipasola rapunna.

⁹Napeliangmi Ishak sola Ismael, anakna, tama lo’ko’ Makhpela dio padangna Efron, anakna Zohar, to Het, sitingoan Mamre.

¹⁰Dio to padang naalli Abraham lako to Het. Indeto nanii umpalumpunni tu Abraham sola Sara, bainena.

¹¹Napamasakkemi Puang Matua tu Ishak, anakna tonna matemo tu Abraham; torro diomi sikandappi’ bubun Lahai-Roi.

¹²Inde sia tu sanganna mintu’ anakna Ismael, anakna Abraham sola Hagar, baine to Mesir, pa’kurinanna Sara, tu umpadadian pia Abraham.

¹³Inde sia tu sanganna mintu’ muane nadadian Ismael, situru’ kadadianna: iatu pa’bunga’na Ismael iamo Nebayot, namane Kedar sola Adbeel sia Mibsam.

¹⁴Sia Misyma sia Duma sia Masa,

¹⁵sia Hadad sia Tema sia Yetur sia Nafish na Kedma.

¹⁶Inde sia tu mintu’ anak muane nadadian Ismael sia inde sia tu mai sanganna, pada unnii tondokna sia inanna, tu sangpulo dua datu pantan umpobangsa bangsana.

¹⁷Inde sia tu lambe’na sunga’na Ismael: saratu’ tallungpulo mpitu taunna; ka’tumi angin dipudukna sia ronta’mi tondon to batangna, nadipatama batu dilobang dipasola rapunna.

¹⁸Torromi tu tau iato mai randuk dio mai tondok Hawila sae lako Syur, matallona Mesir, ma’palulako Asyur. Na iatu tau iato ma’tondok sitingoan naninna mintu’ siulu’na.

¹⁹Inde sia tu tuna’na diona bati’na Ishak, anakna Abraham. Na Abraham undadian Ishak.

²⁰Patangpulo taunna tu Ishak tonna pobainei tu Ribka, anakna Betuel, to Aram dio mai Padan-Aram, anak daranna Laban, to Aram.

²¹Iatu Ishak malaku tongan langngan PUANG diona bainena, belanna tamanang: Napalalomi PUANG tu palakunna, ma’tambukmi tu Ribka, bainena.

²²Iatu pia’-pia’ sita’du-ta’du lan pa’tambukanna, iamoto anna ma’kada nakua: Iake susite, ma’apari narampoira’ te iannate? Malemi umpekutananni lako PUANG.

²³Ma’kadami tu PUANG lako Nakua: Den da’dua bangsa lan pa’tambukammu, iatu da’dua to sangpetayanan sisarak sun lan mai inan taummu; iatu misa’ la mawatang ia na iatu misa’na sia iatu kakanna la napokaunan adinna.

²⁴Tonna lambi’mi allona la kianak, den tonganmi da’dua pia rindu lan inan taunna.

²⁵Tassu’mi tu bunga’na, mararrang, tae’ bang silaenanna to balulang kebulu: nasangaimi Esau.

²⁶Tassu’mi tu siulu’na, pia muane sia, manda’ untoe kambutu’na Esau; nasangaimi Yakub. Iatu Ishak annanmo pulona taunna tonna dadi tu pia sola duai.

²⁷Sakapua-puanami tu pia sola duai; iatu Esau manarang moasu sia tang rapa’ torro dio to’ banua, apa iatu Yakub misa’ to rapa’ penaa torro lan tenda.

²⁸Iatu Esau napakaboro’ Ishak, belanna naporai Ishak ungkandei tu apa naala ke laoi moasu, apa iatu Ribka Yakub ia tu napakaboro’.

²⁹Denmi pissan namangka tu Yakub ma’pare’de, saemi tu Esau dio mai padang bo’yo’ tongan.

³⁰Nakuami tu Esau lako Yakub: Benna’ dikka’ kukandei titi’ pa’pare’de mararang-rarang, belanna bo’yo’ tonganna’te. Iamoto nasangai tau Edom.

³¹Ma’kadami tu Yakub lako Esau: Balukanni lako kaleku te allo ia bangsiamote tu katonganammu anak pa’bunga’.

³²Nakuami tu Esau: Manassa aku te inang la mateku, apara gai’na lako kaleku tu katonganan anak pa’bunga’.

³³Nakuami tu Yakub: Massumpako lako kaleku te totemo. Massumpami lako kalena, anna balukki tu katonganan anak pa’bunga’ lako Yakub.

³⁴Mangkato nabenmi Yakub roti sola pare’de kadong barra’ tu Esau. Iatonna mangka kumande sia mangiru’, ke’de’mi male. Susimoto tang napakeangga’na Esau tu katonganan anak pa’bunga’na.