Read Toraja-Sa'dan KADADIAN 26 Bible Online

KADADIAN 26 - Toraja-Sa'dan bible

KADADIAN 26

¹Saemi tu karorian pannang lan tondok iato, senga’ ia na iatu karorian bunga’na tonna linona Abraham, iamoto anna male tu Ishak lako Abimelekh, datu to Filistin dio Gerar.

²Ombo’mi tu PUANG lako kalena anna ma’kada Nakua: Da mulao rokko Mesir; torromoko dio padang la Kupokadangko.

³Torromoko butung to sae lan tondok iate, Aku la urrondongko sia umparongko’ko, belanna mintu’ te tana iate la Kuba’giangko sia lako bati’mu, sia la Kupalanda’ tu sumpa mangka Kuposumpa lako Abraham, ambe’mu.

⁴Sia la Kupopemba’ka’ tu bati’mu susi bintoen dao langi’ sia la Kuba’gian bati’mu mintu’ tana iate; lan bati’mu mintu’ bangsa lan te lino la unnappa’ karongkosan.

⁵Tu belanna naturu’mo Abraham tu kadangKu sia nakaritutui tu pangalukangku, iamotu pepasanKu sia tu apa Kupondok sia Sukaran alukKu.

⁶Torromi tu Ishak dio Gerar.

⁷Nakutanaimi pa’tondokan tu diona bainena, namebali nakua: Siulu’ku, belanna mataku’ umpokadai kumua bainena, nakua: Napateina’ manii pa’tondokan diona Ribka, belanna melo pantarisanna.

⁸Den pissan tonna masaimo torro dio mentiromi tu Abimelekh, datu to Filistin dao mai pentiroanna, anna ta’pai matanna tu Ishak marassan sibarruga Ribka, bainena.

⁹Natambaimi Abimelekh tu Ishak anna kuanni: Manassa bainemi te baine iate, ma’apai ammi kua: siulu’ku? Mebalimi tu Ishak lako nakua: Belanna kusanga la kupomate.

¹⁰Nakuami Abimelekh: Ma’apai ammi pogau’i susito lako kaleki? Maraa bangsia te mai bangsa iate sangampa’ bainemi, apa susirito kumua la minii umpabu’tuangkan misa’ sala!

¹¹Napa’parentammi Abimelekh lako makalima’na tau iato, nakua: Minda-minda umpatumbai lako te tau iate ba’tu iatu bainena, la mate dipongko.

¹²Mangambo’mi tu Ishak lan tondok iato, nalan taun ia dukato, natammumi manglokkon pessaratu’, belanna Napamasakke PUANG.

¹³Sugi’mi tu tau iato, samasai-sainna sasugi’-sugi’nami naurungan mandu tongan sugi’.

¹⁴Den bembe’ sola domba tu daka’na, sapi sia kaunan buda, naurunganni nakemburu to Filistin.

¹⁵Mintu’ bubun nabo’bok kaunanna ambe’na tonna linona Abraham, ambe’na, nabumbunmo to Filistin, naponnoimo litak rokko.

¹⁶Nakuami tu Abimelekh lako Ishak: Mallaikomi dio mai kaleki, belanna mandu paamokomi anna kami.

¹⁷Soro’mi tu Ishak inde to dio mai, anna pabendan tendana dio lombok Gerar, anna torro dio.

¹⁸Tonna iato nakaroi polemi Ishak tu mintu’ bubun dibo’bok tonna linona Abraham ambe’na, tu mangka nabumbun to Filistin, tonna matemo tu Abraham anna mintu’nato nasangai Ishak susitu nasanganni ambe’na.

¹⁹Iatonna marassan tu mintu’ kaunanna Ishak mangkali-kali dio lombok iato, naappa’mi tu misa’ kalimbuang tang mate.

²⁰Sipakkami to manglaa to Gerar tu to manglaana Ishak nakua: Uaingki kami te. Iamoto anna sangai Esek tu bubun iato, belanna sipakkamo tau iato mai.

²¹Nabo’bok poleomi tu bubun senga’, sipakka poleomi diona bubun iato, iamoto anna sangai Sitna tu bubun iato.

²²Tilelemi inde to dio mai tu Ishak anna bo’bok bubun senga’, natae’mo nasipakkai, nasangaimi Rehobot, anna ma’kada nakua: Totemo nabenmoki’ kamalonaran PUANG sia la memba’ka’ki’ lan te tondok.

²³Undinnato malemi inde to dio mai langngan Bersyeba.

²⁴Iatonna bongi iato, ombo’mi tu PUANG lako kalena, anna ma’kada Nakua: Akumo tu Kapenombanna Abraham, ambe’mu; da mumataku’ belanna Kurondongko sia la Kupamasakkeko sia la Kupopemba’ka’ tu bati’mu tete dio Abraham, taungKu.

²⁵Napabendanmi Ishak tu inan pemalaran inde to dio, anna massambayang ussa’bu’ sanganNa PUANG, sia napabendan tu tendana dio. Nabo’bok polemi kaunanna Ishak misa’ bubun inde to dio.

²⁶Saemi tu Abimelekh dio mai Gerar sola Ahuzat, sangmuanena na Pikhol, pa’baraninna, umpessitiroi Ishak.

²⁷Nakuami tu Ishak lako: Ma’apai ammi sae umpessitiroina’ na mikabiri’na’ sia misuamo’ mallai lan mai tondokmi?

²⁸Mebalimi nakua: Payan mentolino lako kaleki kumua narondongkomi PUANG, kikuami: Sipatu la den tu basse tang simallaran ba’teng dio patomalinta, iamotu kamu anna kami sia la untanankan basse lako kalemi, kumua:

²⁹tae’ ammi la umpogau’ kadake lako kaleki, susi dukato tu kaminna tae’ kirumbu lenkomi sia moi misa’ tae’ kipogau’ lako kalemi sangadinna kameloanri, na iatonna pirangbongi’ tongki suakomi male, mipomelo duka sia. Manassa Napamasakke tongankomi PUANG totemo.

³⁰Natoratumi Ishak tu tau iato mai, anna kumande sia mangiru’.

³¹Mela’bikmi millik tu tau iato mai, anna sibasse tang la simallaran ba’teng; naelorammi Ishak male sule, namale marampa’ tu tau iato mai.

³²Iato allo iato saemi tu mintu’ kaunanna Ishak umpokadanni tu diona bubun nabo’bok nakua: Kikabu’tuimo tu uai.

³³Nasangaimi Syeba, iamoto anna disanga Bersyeba tu tondok iato sae lako totemo.

³⁴Nasusi to, iatonna patangpulomo taunna tu Esau, umpobainemi Yudit, anakna Beeri, to Het, sia Basmat, anakna Elon, to Het.

³⁵Iatu iannato umparosso penaanna Ishak sola Ribka.