Read Toraja-Sa'dan KADADIAN 27 Bible Online

KADADIAN 27 - Toraja-Sa'dan bible

KADADIAN 27

¹Den pissan tonna matuamo tu Ishak sia maraunmo, anna tang pakitamo, natambaimi tu Esau, anak pa’bunga’na, anna kuanni nakua: E anakku! Mebalimi nakua: Inde siana’.

²Ma’kadami nakua: Matuamo’, tae’ kuissan tu sunga’ku.

³Totemo baai tu pareamu, tambilamu anna panamu, ammu sun lako padang umpangularanna’.

⁴Ammu posarasanna’ kande mammi’ susitu kuporainna, baanna’ mai angku kandei sia anna ponno penaangku umpassakkeko kumane mate.

⁵Narangimi Ribka tu apa napokada Ishak lako Esau, anakna. Malemi tu Esau lako padang la moasu tu la napakandeanni.

⁶Nakuami tu Ribka lako Yakub, anakna: Kurangi tu ambe’mu ma’kada lako Esau, siulu’mu, nakua:

⁷Banna’ pangula’mu sia posarasanna’ kande mammi’, angku kandei kupassakkeko dio oloNa PUANG kumane mate.

⁸Iamoto totemo, e anakku, perangii tu kadangku ammu pogau’i tu apa kupokadangko.

⁹Laoko lako to’ bembe’ ma’baanan, alanna’ da’ dua anak bembe’ laki malompo dio mai, angku posarasanni kande mammi’ tu ambe’mu susitu naporainna.

¹⁰La mubaan ambe’mu, anna kandei, napassakkeko, namane mate.

¹¹Nakuami tu Yakub lako Ribka, indo’na: Iatu Esau, kakangku kebulu tu kalena, na aku te malana tu kuli’ku.

¹²Nakaka’na’ manii ambe’ku angku butung to ma’telle dio olona, angku pabu’tuammo tampak ropu kaleku, tangia rongko’.

¹³Nakuami ungkuanni: Lu lako ia kaleku tu tampak ropummu, e anakku, perangii siai tu kadangku ammu lao unnalanna’.

¹⁴Malemi naala nabaai lako indo’na, naposarasanni indo’na kande mammi’ susitu naporainna ambe’na.

¹⁵Naalami Ribka tu tamangkalena Esau, anak pa’bunga’na, iamotu me’lokna tu napalanna banua, anna papasangi tu Yakub anak bongsunna.

¹⁶Na iatu limanna patomali sia kale malananna lan barokona nasapu’ balulang anak bembe’ laki iato.

¹⁷Napatangkeimi kande mammi’ sia roti, to naposara’, tu Yakub, anakna.

¹⁸Saemi lako ambe’na, anna ma’kada nakua: O ambe’! Nakuami tu Ishak: Inde siana’, mindaroko, e anakku?

¹⁹Nakuami tu Yakub lako ambe’na: Akumo Esau te, anak pa’bunga’mi, kupogau’mo susitu mipokadanna’. Millikmokomi unno’ko’, ammi kandei tu pangula’ku, anna ponno penaammi umpassakkena’.

²⁰Nakuami tu Ishak lako: Umba mukua madomi’ unnappa’i, e, anakku! Mebalimi: Belanna, Napasiappa’na’ PUANG, Kapenombammi.

²¹Nakuami tu Ishak lako Yakub: Inde-indeko, angku kaka’ko, e anakku, ba’tu la tongannai ikomo anakku Esau, ba’tu tangiaraka.

²²Nareke’mi Yakub tu Ishak, ambe’na, anna kaka’i Ishak, nama’kada nakua: Iate gamara, gamaranna bang Yakub, apa iatu limanna, limanna Esau.

²³Apa tae’ anna tandai, belanna iatu limanna kebulu duka, susi limanna Esau, kakanna, napassakkemi.

²⁴Nakuami Ishak: Tongannaraka iko siamo anakku Esau te? Nakuami: Tonganna.

²⁵Nakuami Ishak: Painde-indeanna’, angku kandei tu pangula’na anakku sia anna ponno penaangku umpassakkeko. Napadio-dioammi, anna kandei Ishak. Nabenmi uai anggoro’, anna iru’i.

²⁶Nakuami lako tu Ishak, ambe’na: Inde-indeko, udungna’, e anakku.

²⁷Nareke’mi anna udungi tu ambe’na. Naudukmi Ishak tu bau busarungngu’na tamangkalena, napassakkemi, nakua: Iatu busarungngu’na baunna anakku susi busarungngu’na padang, tu Napamasakkemo PUANG.

²⁸Na Puang Matuamora la umpasaeangko ambun dao mai langi’ sia lompona padang sia gandung manglokkon sia uai anggoro’!

²⁹Anna ba’tu pira-pira bangsa la mengkaunan lako kalemu sia ba’tu pira-pira to sangpetayanan la tunduk dio olomu; sia la dadiko puangna mintu’ siulu’mu. Anna la tunduk tu mintu’ to nadadian indo’mu dio olomu. La narua tampak ropu tu to untampakkiko ropu. Na minda-minda umpassakkeko la rongko’!

³⁰Iatonna mangkamo tu Ishak umpassakke Yakub sia mane ra’pa’ mallai tu Yakub dio mai tingayona Ishak, ambe’na, ta’kala anna saemo tu Esau sule moasu.

³¹Naposara’mi tu kande mammi’, anna baai lako ambe’na sia ma’kada nakua: Millikmokomi, ambe’, ammi kandei te pangula’na anakmi, anna ponno penaammi umpassakkena’.

³²Nakuami lako tu Ishak, ambe’na: Mindaroko? Mebalimi nakua: Akumo Esau anak pa’bunga’mi.

³³Lendu’ tonganmi tirambanna tu Ishak, nama’kada nakua: Iake susii to, mindamo ia to moasu, anna sae umbanna’? Belanna mangka nasangmo kukande to, mumane sae sia mangka kupassakke, inang la rongko’ ia.

³⁴Iatonna rangimi Esau tu kadanna ambe’na susito, unnurruk-urrukmi tumangi’, na ma’kada lako ambe’na, nakua: Passakkena’, passakke dukana’, ambe’!

³⁵Nakuami tu ambe’na: Mangkamo sae ma’pakena tu adimmu, naalaimoko tu rongko’mu.

³⁶Mebalimi: Tang sipato’raka nasanga tau Yakub? Belanna totemo penduanmo’ napakena: naalaimo’ tu katonganangku anak pa’bunga’, na totemo naalaiomo’ tu rongko’ku! Ma’kadami tu Esau: Tae’moraka pa’passakke minannanna’

³⁷Nabalimi Ishak, nakua lako Esau: Kuangka’mo mendadi puangmu sia mintu’ siulu’na kupadadi kaunanna sia kupaguntu’i gandung sola uai anggoro’; naapapa la kupogaurangko, e anakku?

³⁸Nakuami tu Esau lako ambe’na: Ia mannaraka te misa’ tu pa’passakke miampui, o ambe’? Passakkena’, passakke dukana’! Unnurruk-urrukmi tu Esau tumangi’.

³⁹Nabalimi Ishak, ambe’na nakua: Manassa iatu padang mupa’tondokki la sikambela padang malompo, tae’ na la unto’doi ambun dao mai langi’;

⁴⁰sangadinna pa’dangmuri la munii tuo sia la mengkaunanko lako adimmu. Sia la dadi undinna, ke umberong-berongko, la mulendokan tu ayokana dao mai sokkongmu!

⁴¹Ta’kala anna kabiri’i Esau tu Yakub tu diona pa’passakke nabenni ambe’na. Nakuami tu Esau lan penaanna: Iatu allo dinii umpote bolongi ambe’ku mandappi’mo, na iapa to angku patei tu adingku Yakub.

⁴²Napokadami tau lako Ribka tu kadanna Esau, pa’bunga’na, napopetambaimi tu Yakub, bongsunna, nakuami: La muissan kumua iatu Esau kakammu, la matana penaanna diona iko, ke napateiko.

⁴³Na totemo, e anakku, perangii te kadangku; ke’de’ko, maleko mallai lako Haran, lako Laban anak muaneku.

⁴⁴Torroko ba’tu sangapa-apa sola dio sae lako pa’dena tu kasengkeanna siulu’mu,

⁴⁵sae lako merena tu kasengkeanna siulu’mu lako kalemu sia tang nakilalainna tu penggaurammu lako kalena; mangkato angku mesua untambaiko dio mai. Ma’apai te aku te, anna la sangallo bangri la kunii umposayu’komi sola dua?

⁴⁶Ma’kadami tu Ribka lako Ishak: Masorromo’ tuo, belanna natumang tu mai anak to Het, iake la umpobainepi to Het tu Yakub, susitu mintu’ te to ma’tondok, apaopara gai’na tu katuoan lako kaleku?