Read Toraja-Sa'dan KADADIAN 28 Bible Online

KADADIAN 28 - Toraja-Sa'dan bible

KADADIAN 28

¹Natambaimi Ishak tu Yakub anna passakkei sia napakare’na nakua: Da mupobaine baine bu’tu dio mai to Kanaan.

²Ke’de’ko sia maleko lako Padan-Aram, lako banuanna Betuel, ambe’na indo’mu; alai dio mai tu misa’ baine la mupobaine, to bu’tu dio mai Laban, anak muanena indo’mu.

³Na Puang Matuamora tu Umpoissan angge maritik umparongko’ko umpopembati’ko sia umpopemba’ka’ko, anna iko nanii garonto’na ba’tu pira-pira bangsa.

⁴Sia Ia la umba’giko rongko’na Abraham sia lako duka bati’mu ammu pomana’i tu padang munii mentiruran sia tu mangka napa’ba’gian Puang Matua lako Abraham!

⁵Susimoto tu kanasuanna Ishak ke’de’ male tu Yakub, malemi lako Padan-Aram umpellambi’i Laban, anakna Betuel, to Aram, iamo anak muanena Ribka, indo’na Yakub sola Esau.

⁶Iatonna tiroi Esau kumua napassakke Ishak tu Yakub sia nasua male lako Padan-Aram la unnala baine dio mai la napobaine sia iatonna passakkemi anna pakare’nai nakua: Da mupobainei tu mai to Kanaan;

⁷sia naturu’ Yakub tu kadanna indo’ ambe’na anna male lako Padan-Aram,

⁸na iatonna tiroi Esau kumua iatu Ishak, ambe’na, tang naporai tu anak dara to Kanaan,

⁹malemi tu Esau lako Ismael, anna alai tu Mahalat, anakna Ismael, to nadadian Abraham, sangbainena Nebayot, anna pobainei, boko’tu baine inang dennamo.

¹⁰Tonna mangkato, tassu’mi tu Yakub lan mai Bersyeba, namale lako Haran.

¹¹Rampomi lako misa’ inan, anna ma’bongi inde to belanna lambunmo tu allo; naalami tu batu misa’ to mintu’ batu dio inan iato, napoallonan, anna bambangan kalena inde to la mamma’.

¹²Mangimpimi den misa’ eran bendan lan lino sumpu langngan langi’; natiromi, ba’tu pira-pira malaeka’Na Puang Matua lu langngan lu dao mai eran iato.

¹³Manassa den tu PUANG bendan dao anNa ma’kada Nakua: Akumo tu PUANG, Kapenombanna Abraham, nene’mu, sia Kapenombanna Ishak, na iate padang munii mamma’ la Kubenko sia la Kuben bati’mu.

¹⁴Iatu bati’mu la susi barra’-barra’ sia la tumale’ko lako matallo matampu’, rekke ulunna salu sia sau’ pollo’na uai, nalan kalemu sia lan bati’mu nanii tu mintu’ suku lan lino unnappa’ karongkosan.

¹⁵Manassa la Kurondongko sia la Kurinding pala’ko umba-umba muola sia la Kupasuleko indete padang iate, belanna tae’ angKu la untampeko sae lako Kupogau’na tu apa mangka Kuallu’ lako kalemu.

¹⁶Pakalan anna pana’dingmo tu Yakub, na ma’kada nakua: Den pale’ tu PUANG indete inan iate, natae’ angku issanni!

¹⁷Saemi mataku’na anna ma’kada nakua! Lendu’ masangna inan iate! Tangia senga’na sangadinna banuanNa Puang Matua na iamote tu ba’ba suruga!

¹⁸Mebongngi’mi millik tu Yakub, anna alai tu batu naallonni, napabendan la dadi misa’ tanda dianna batu silambi’, anna bolloi minna’.

¹⁹Nasangaimi Betel tu inan iato, apa iatu sanga dolona tondok iato, disanga Lus.

²⁰Mangallonammi tu Yakub nakua: Iake Narondong siana’ Puang Matua sia Narinding pala’na’ dio lalan, tu kuolai totemo te sia Nabenna’ la kukandena sia tamangkale la kupake,

²¹angku sule marampa’ lako to’ banuanna ambe’ku, manassa PUANGmo tu Kapenombangku.

²²Iate batu tu kupabendan la dadi misa’ tanda dianna batu silambi’ iato, mendadi banuanNa Puang Matua, angku penombangKomi sangtaa sangpulona tu mintu’ barang apa Mikamaseanna’.