Read Toraja-Sa'dan KADADIAN 29 Bible Online

KADADIAN 29 - Toraja-Sa'dan bible

KADADIAN 29

¹Ke’de’mi tu Yakub inde to dio mai, ma’palulako padang to rampe matallo.

²Natiromo den misa’ bubun dio padang iato; naden tallung tuntunan bembe’ sola domba tisambo’ dio sa’dena, belanna dio bubun iato tu nanii tau umpairu’i tu mintu’ bembe’ sola domba; den misa’ batu kapua dao baba bubun iato.

³Naramba nasangmi tau lako tu mintu’ bembe’ sola domba ma’baanan anna lolinni tu batu dao mai baba bubun, napairu’i tu mintu’ bembe’ sola domba, mangkato napasulemi langngan baba bubun tu batu lako inanna.

⁴Nakuami tu Yakub lako: E mintu’ siulu’, lu umbarokomi nii te? Mebalimi nakua: Lu diokan mai Haran.

⁵Nakuami lako tau iato mai: Mitandairaka tu Laban, ampona Nahor? Mebalimi tu tau iato nakua: Kitandai.

⁶Nakuami lako: Malaga’-laga’ siaraka? Mebalimi tu tau iato mai nakua: Malaga’-laga’ sia; tiromi, iamo Rahel to dio, anakna baine, sae ussolan bembe’na sia dombana.

⁷Ma’kadami tu Yakub nakua: Tiroi, kulla’pa tu allo, tae’pa naattunna la dipebala tu patuoan; pairu’mi tu bembe’ sola domba ammi pakandei sule!

⁸Mebalimi tu tau iato mai nakua: Tae’ nama’din, ke tae’pi anna ma’misa nasang tu bembe’ sola domba, nalolinni tau tu batu dao mai baba bubun, kimane umpairu’ nasangi tu domba sola bembe’.

⁹Marassanpa sipa’kada-kada tau iato mai, saemi tu Rahel urramba bembe’na sia dombana ambe’na, belanna to manglaa duka ia.

¹⁰Iatonna tiroi Yakub tu Rahel, anakna Laban, anak muanena indo’na, sia iatu bembe’na sia dombana Laban, anak muanena indo’na, saemi tu Yakub urreke’i anna lolinni tu batu dao mai baba bubun, napairu’i tu bembe’na sia dombana Laban, anak muanena indo’na.

¹¹Sia naudung Yakub tu Rahel, anna ma’urrukan tumangi’.

¹²Belanna napokada Yakub lako Rahel kumua sangdadianna ambe’na, iamo anakna Ribka, ma’dondo-dondomi tu Rahel male umpokadanni ambe’na.

¹³Iatonna rangii Laban, kumua sae tu Yakub, anakna anak daranna, ma’dondo-dondomi umpessitammui, anna raka’i sia naudung nasolanni tama banuanna. Naulelean nasangmi Yakub lako Laban mintu’ apa dadi lako kalena.

¹⁴Nakuami tu Laban lako: Manassa ikomo tu sangrara sangbukungku! Torromi tu Yakub sola, ganna’ bang sangbulan.

¹⁵Mangkato nakuami tu Laban lako Yakub: Belanna sangdadiangkuko, la sipaturokoka mengkarang punala bang dio kaleku? Pokadanna’ umbara nakua tu saromu?

¹⁶Iatu Laban den da’dua baine tu anakna, iatu kakanna disanga Lea, na iatu adinna disanga Rahel.

¹⁷Iatu Lea ma’mata mallun, apa iatu Rahel makari’dik tu kalena sia melo tu pantarisanna.

¹⁸Iatu Yakub Rahel tu nakasinnai, iamoto anna kuai: Da’ito angku mengkarang bangmo lako kalemi pitung taun diona Rahel, anakmi, tu bongsunna.

¹⁹Ma’kadami tu Laban nakua: La’bi’ ke iko kuben, ke la tau senga’mora la kuben; tatorromo sola.

²⁰Mengkarangmi tu Yakub pitung taun tu belanna Rahel, na iato pitung taun sangattu’ bangri nasa’ding, belanna kamasinnanna lako Rahel.

²¹Ma’kadami tu Yakub lako Laban kumua: Benmo’ tu baineku, angku sangampa’ belanna ganna’mo tu attungku.

²²Narampunmi Laban tu mintu’ to ma’tondok, anna pogau’ pa’maruasan.

²³Iato bongi iato, nasolammi Laban tu Lea, anakna, lako Yakub anna sangampa’ Yakub.

²⁴Iatu Lea naben Laban misa’ baine sabua’na disanga Zilpa la napopa’dua’.

²⁵Iatonna melambi’ dio mai, natiromi, Lea ia; iamoto anna ma’kada tu Yakub lako Laban nakua: Ma’apai ammi pasusina’ to? Tang dionaraka Rahel angku mengkarang dio kalemi? Ma’apai ammi pakenana’?

²⁶Mebali tu Laban nakua: Tae’ ia biasanna lan te tondokki tu la umpa’benganni dolo tu adinna, ke tae’pi tu kakanna.

²⁷Paganna’i pitung allo lako te anakku, angku ben dukako tu pia iato belanna pengkarangan la mukarang polepa dio kaleku pitung taun.

²⁸Napogau’mi Yakub susito, napaganna’i pitung allo lako baine iato, namane umbenni Laban lako tu Rahel, anakna la napobaine.

²⁹Iatu Rahel naben Laban misa’ baine sabua’na, disanga Bilha la napopa’dua’.

³⁰Sipatonangan polemi kurin Yakub tu Rahel sia mandu napakaboro’ na iatu Lea. Mengkarangmi tu Yakub lako Laban pitung taun polepa.

³¹Iatonna tiroi PUANG kumua iatu Lea naerean penaa, Nabungka’mi tu inan taunna, apa iatu Rahel tamanang.

³²Ma’tambukmi tu Lea, anna dadian misa’ pia muane, nasangai Ruben nakua: Natiro PUANG tu kamasussangku, iamoto totemo la napakaboro’na’ muaneku.

³³Ma’tambuk poleomi, anna dadian misa’ pia muane, nakuami: Belanna Narangi PUANG kumua diereanna’ penaa, Nakamasei poleomo’ te totemo. Nasangaimi Simeon tu pia iato.

³⁴Ma’tambuk poleomi, anna dadian misa’ pia muane, nakuami: Totemo, pissanna te, la la’ka’mo tu muaneku lako kaleku, belanna tallumo tu muane kupadadianni. Iamoto anna sangai Lewi tu pia iato.

³⁵Ma’tambuk poleomi, anna dadian misa’ pia muane, na ma’kada nakua: Pissanna te la umpudina’ PUANG. Iamoto anna sangai Yehuda tu pia iato. Radanmi ma’dadian tau.