Read Toraja-Sa'dan KADADIAN 3 Bible Online

KADADIAN 3 - Toraja-Sa'dan bible

KADADIAN 3

¹Iatu ula’ mandu matangngaran na iatu mintu’na olo’-olo’ lan lino, tu mangka Napadadi PUANG Kapenomban. Nakuami tu ula’ lako baine iato: Umbai susite tu kadanNa Puang Matua: Da mikandei buanna tu mintu’ kayu lan te pa’lak!

²Mebalimi tu baine lako ula’: Ma’din kikande buanna tu mintu’ kayu lan te pa’lak,

³sangadinna iatu bua kayu lan tangnga pa’lak Nakua Puang Matua: Da mikandei, ba’tu da mirumbui, da mimate.

⁴Nakuami ula’ lako tu baine: Manassa tae’ ammi ma’lalan mate.

⁵Sangadinna Naissan Puang Matua, kumua randuk allo iato, ke mikandei tu bua kayu iato, ta’pa tibungka’ tu matammi, ammi susi Puang Matua unnissan melo sia kadake.

⁶Natiromi tinde baine, kumua melo la dikande tu bua kayu iato sia dipora’dik untiroi, ondongpi iamo misa’ kayu sipatu dikaduangi la umpabu’tu kamanarangan, naalami tu buanna nakandei sia naben duka muanena, anna kandei sola.

⁷Tibungka’mi tu matanna sola duai, naissanmo kumua ma’kale-kale, nalelen-lelenmi tu daun kayu ara, nagaraga dodo.

⁸Nasa’dingmi tu tengkaNa PUANG Kapenomban sumalong-malong lan pa’lak tonna mangiri’ tu angin sarrang allo; umpembuniammi PUANG Kapenomban tu tolino sola duai ma’baine dio mai oloNa PUANG Kapenomban tama to’ kayu makampu-kampu lan pa’lak iato.

⁹Nakambaroimi PUANG Kapenomban tu tolino Nakua: Umbara munii?

¹⁰Mebalimi tolino nakua: Kusa’ding tu tengkaMi lan to’ pa’lak, mataku’mo’, belanna ma’kale-kalena’, iamoto angku membuni.

¹¹Ma’kada Puang, Nakua: Mindara ungkuangko kumua ma’kale-kaleko? Mukanderaka tu bua kayu, tu mangka Kupasanangko kumua da mukandei tu buanna?

¹²Mebali tu tolino: Napa te baine Miparondonganna’ tu umbenna’ bua kayu iato angku kandei.

¹³Ma’kadami PUANG Kapenomban lako tu baine: Apara te mangka mupogau’? Mebali tu baine: Napakenana’ ula’ angku kandei.

¹⁴Ma’kadami PUANG Kapenomban lako tu ula’: Belanna mangka mupogau’ tu susinnato, tampakan ropumoko na iatu mintu’na patuoan sia olo’-olo’ dao kapadanganna, kumua la mendonglo’ko umpopa’lingka tambukmu sia la ungkande dukako barra’-barra’ angge tuomu.

¹⁵La Kupaden tu kasiualiammu na iate baine sia bati’mu anna bati’na; iamo la unnisak-nisakki tu ulummu ammu totokki tu kambutu’na!

¹⁶Nama’kada Puang lako tu baine: La Kupakerangngan lako kalemu tu kamasussan ke ma’tambukko, la mapa’di’ko ke la kianakko, sia la mamali’ko lako muanemu anna parentako.

¹⁷Ma’kadami Puang lako tolino: Belanna muperangiimo tu kadanna bainemu ammu kandei tu bua kayu Kupasanangko, kumua da mukandei, iamoto la narua tampak ropu te kuli’na padang mutumang, anna situangpi kamaparrisan angge tuomu mumane ungkandei tu burana.

¹⁸La napatuoangko duri sola a’da’, na iatu kandemu iamotu utan tuo dio lu padang.

¹⁹La to’dopi tu ma’pu’mu, mumane ungkande kandemu, sae lako sulemu pole lako litak, belanna dio mai dinii unnalako. Apa litakko, dadi la sule lako dukako litak!

²⁰Pakalan nasangaimi tolino Hawa tu bainena, belanna iamo indo’na mintu’ to tuo.

²¹Nagaragami PUANG Kapenomban tamangkale tu balulang, nagaragan tolino sola ma’baine. Napaluangi sola duai.

²²Ma’kada PUANG Kapenomban: Tonganna iatu tolino susi bang to misa’mo dio mai te Kita, naissan tu melo sia kadake; totemo nakorongi manii limanna, naalami tu bua kayu katuoan nakandei natuomo tontong sae lakona.

²³Iamoto anNa suai PUANG Kapenomban sun lan mai pa’lak Eden, kumua anna posara’i tu litak, dinii ungkombongi dio mai.

²⁴Naula’imi tassu’ tu tolino Napannii ba’tu pira-pira karubion mentiro lu lako matallona pa’lak Eden sitetang pa’dang pandillak-dillak dukku-dukku matanna la ungkampai lalan lako to’ kayu katuoan iato.