Read Toraja-Sa'dan KADADIAN 31 Bible Online

KADADIAN 31 - Toraja-Sa'dan bible

KADADIAN 31

¹Narangimi Yakub tu kadanna anakna Laban tu mai muane, nakua: Naala nasangmo Yakub tu mintu’ apanna ambe’ta, na iatu barang apanna ambe’ta iamo naposugi’.

²Sia natiro Yakub tu lindona Laban, tae’mo namatana susi dolona.

³Ma’kadami tu PUANG lako Yakub, Nakua: Sulemoko lako tondok nene’mu sia lako sangdadiammu, Aku la urrondongko.

⁴Mesuami tu Yakub untambai Rahel sola Lea sae dio padang tu nanii mintu’ patuoanna.

⁵Nakuami tu Yakub lako: Kutiro tu lindona ambe’mi, tae’mo namatana susi dolona, apa Narondong siamo’ Kapenombanna ambe’ku.

⁶Miissan sia kumua kupengkabatta’i tongan sumaro lako ambe’mi.

⁷Apa napakenana’ ambe’mi, pessangpulo nasondai tu saro ra’ta’ku, apa tae’ anNa tiro-tiroi Puang Matua umpogau’ kadake lako kaleku.

⁸Iatonna kuai: Mintu’ domba sia bembe’ saleppang la muposaro, undadian nasangmi saleppang, sia iatonna kuai: Mintu’ domba sia bembe’ balo la muposaro, undadian nasangmi balo.

⁹Susimoto Nanii unnalai Puang Matua dio mai ambe’mu tu patuoan, anNa palulakoi kaleku.

¹⁰Belanna den pissan tonna sirundu’ tu domba sia bembe’, kubangunanni tu matangku, kutiroi lan tindoku, kumua iatu mintu’ bembe’ laki tu urrundu’ bembe’ birang, den balo, den sambo ra’tuk, den saleppang.

¹¹Ma’kadami tu malaeka’Na Puang Matua lako kaleku lan tindo: E Yakub. Mebalimo’: Inde siana’.

¹²Nakuami: Totemo bangunanni tu matammu, tiromi tu mintu’ bembe’ laki, tu urrundu’ bembe’ birang, den balo, den sambo ra’tuk den saleppang, belanna Kutiro nasangmo tu mintu’ penggauranna Laban lako kalemu.

¹³Akumo tu Kapenomban dio Betel, inan munii umbolloi minna’ tu batu tanda, iamotu inan munii mangallonan lako Kaleku; totemo ke’de’moko ammu tassu’ lan mai tondok iate sule lako tondokna sangdadiammu.

¹⁴Mebalimi tu Rahel sola Lea: Denparaka taaki ba’tu mana’ lan banuanna ambe’ki?

¹⁵Tang nasangarakannika kumua to saekan? belanna nabalukmokan sia napepurai tu sombaki.

¹⁶Belanna mintu’ tu kasugiran mangka Naala Puang Matua dio mai ambe’ki, inang apangki siamo, sia apanna anakki; totemo pogau’i tu mintu’ apa Napokadangko Puang Matua!

¹⁷Mangkato, ke’de’mi tu Yakub anna pakendekki tu mintu’ repokna langngan unta.

¹⁸Sia nabaa tu mintu’ patuoanna sia barang apanna, tu napabu’tumo, iamotu patuoan napoapamo, tu napabu’tumo dio Padan-Aram, la male lako Ishak, ambe’na, lako tondok Kanaan.

¹⁹Iatu Laban male toda ia ungku’ku’i bulu dombana; nabokomi Rahel tu balo’ taunna ambe’na.

²⁰Natangnga’ Yakub tu Laban, to Aram, tae’ napokadanni kumua la mallai.

²¹Mallaimi tu Yakub umbaa mintu’ apanna, ke’de’mi anna ullamban salu sia ma’palulako buntu Gilead.

²²Iatonna ma’tallung alloammo napokadami tau lako Laban nakua: mallaimo tu Yakub.

²³Nasolammi Laban tu mintu’ sangdadianna anna ula’i pada mambelanna kalingkan pitung allo, anna lambi’i dio buntu Gilead.

²⁴Apa sae tu Puang Matua lako Laban, to Aram, tonna mabongi lan tindona, Nakua: Kilalai tonganni, da muma’kada lako Yakub la melona la kadakena.

²⁵Mangkato nalambi’mi Laban tu Yakub. Iatu Yakub unnosokmo tendana dao buntu iato, na iatu Laban unnosok toda ia tendana dao buntu Gilead.

²⁶Ma’kadami tu Laban lako Yakub nakua: Umbara susite penggaurammu, ammu tangnga’na’ sia mupallaian tu mai anakku butung to dirampa bassi mataran?

²⁷Apara bannangna ammu mallai kamama’ bangra sia mutangnga’na’ tang mupokadan siamo’, angku issanni lao ussolangko naturu’ kaparannuan sia naturu’ sengo sia oni ganda’-ganda’ sia oni katapi.

²⁸Sia tae’ poleopi ammu tangga’na’ unnudungi tu mati’ bati’ku muane sia baine. Iamoto munii umpogau’mo penggauran baga.

²⁹Maatang duka sia tu limangku la umpata’paikomi kadake, apa sangmai’ bongi Nama’kada lako kaleku tu Kapenombanna ambe’mu Nakua: Kilalai tonganni, da muma’kada lako Yakub la melona la kadakena.

³⁰Totemo inang la malemoko, belanna mamali’ tonganko lako banuanna ambe’mu, nama’apai ammu bokoi tu balo’ku?

³¹Mebalimi tu Yakub lako Laban nakua: Mataku’na’ kukua: Mialai torona’i manii tu mai anakmi.

³²Na minda-minda minii unnappa’i tu balo’mi, damo nadipatuo len. Daka’i dio tingayona mintu’ sangdadianta, ke la denni dio kaleku tu apammi, alai sule. Apa tae’ anna issanni Yakub kumua mangka naboko Rahel.

³³Tamami tendana Yakub tu Laban sia tama tendana Lea sia tendana to baine sabua’ da’dua, natae’ nakabu’tui lenni. Iatonna sunmo lan mai tendana Lea, anna tama tendana Rahel.

³⁴Apa naalamo Rahel tu balo’ tau, anna patamai lapik unta, anna o’ko’i. Napemabillei Laban lan tenda iato, apa tae’ nakabu’tui.

³⁵Nakuami tu Rahel lako ambe’na: Da misengke, ambe’, belanna tae’ kubelai bendan dio tingayomi, pa narampoina’ lalan biasanna baine. Napemadaka’i lan tenda iato, apa tae’ nakabu’tui tu balo’ taunna.

³⁶Re’dekmi ara’na Yakub anna sarabai tu Laban, nakua lako: Apara palendurangku sia kasalangku, ammi sengkera undi unnula’na’?

³⁷Iatommi bille simisa’i tu pareanangku, apara tu pareanammi mikabu’tui? Paindei te tingayona mintu’ sangdadiangku sia sangdadiammi, anna paolaiki’ salunna sola dua.

³⁸Duangpulomo’ taunna torro sola kamu, na iatu domba birangmi sia bembe’ tae’ bangra masala tu anakna, sia iatu lakinna tae’ra angku kandei.

³⁹Iatu tang kulaainnamo tae’ angku patiroangkomi, sangadinna kusonda sia iatu dibokona ke kulla’i allo ba’tu mabongi mipasurungina’.

⁴⁰Nala’da’na’ allo keallo sia iake bongi naparrana’ sangkang, sia maroyana’.

⁴¹Na totemo duangpulomo’ taunna lan banuammi: sangpulo a’pa’na’ taunna ruranan mati’ diona te anakmi da’dua na annan taunna diona dombami sia bembe’mi, anna pessangpulo misondai tu saro ra’ta’ku.

⁴²Iake tang la Narondongna’ Kapenombanna ambe’ku, Kapenombanna Abraham sia To napengkaolai Ishak, manassa totemo misuana’ male ma’pala’ lo’bang. Manassa Natiro Puang Matua tu parri’ku sia kamara’tasangku mengkarang. Iamo umpakilalakomi sangmai’ bongi.

⁴³Mebalimi tu Laban lako Yakub nakua: Iate mai baine anakku sia iate mintu’ pia muane anakku duka, sia mintu’ te patuoan patuoangku duka, pissanni to, mintu’na tu mutirona inde, apangku nasang. Apa totemo la kupatumbai te anakku baine sia mintu’ te pia muane nadadiammo?

⁴⁴Maiko anta tanan basse, la tapotanda-tasikna patomalinta!

⁴⁵Naalami Yakub tu misa’ batu anna osokki, tu la mendadi misa’ tanda dianna batu silambi’.

⁴⁶Nakuami tu Yakub lako mintu’ sangdadianna: Rampunni tu batu. Naalami tu ba’tu pira-pira batu, natombonni anna kumande dao pa’tombonan batu.

⁴⁷Nasangaimi Yegar-Sahaduta Laban, apa nasangai ia Galed Yakub.

⁴⁸Nakuami tu Laban: Iake totemo, iate pa’tombon batu la titanan sa’bi lako kita sola dua. Iamote nasangai Galed.

⁴⁹Sia nasangai siapa Mizpa, belanna nakua: La Nakanandaiki’ PUANG patomalinta, ke tang sikitanammiki’.

⁵⁰Iake mupakario-rioi tu mai anakku sia umpobaineko baine senga’, moi anna tae’ tau dioren: kilalai, kumua Puang Matua la untiroki’ patomali.

⁵¹Sia nakuapa tu Laban lako Yakub: Tiroi te pa’tombon iate sia iate batu dipotanda, tu kuosok tapotanda.

⁵²Iate pa’tombon sia iatu batu dipotanda tu la ditanan sa’bi, kumua tae’ angku la ullendu’i te pa’tombon iate sia tae’ duka ammu la ullendu’i te pa’tombon sia batu dipotanda sae la kadake.

⁵³Kapenombanna Abraham sia Kapenombanna Nahor, pada Kapenombanna ambe’ta umpaolaiki’ salu! Massumpami tu Yakub ussa’bu’ To napengkaolai Ishak, ambe’na.

⁵⁴Napemalarammi Yakub tu misa’ pemala’ dao buntu iato, anna tambai nasangi tu sangdadianna sae kumande sola; kumandemi sola nasangi anna ma’bongi dao buntu iato.

⁵⁵Iatonna mela’bik la ke’de’mi tu Laban, anna udung nasangi tu mai bati’na muane sia baine sia napassakke, anna male sule lako tondokna.