Read Toraja-Sa'dan KADADIAN 33 Bible Online

KADADIAN 33 - Toraja-Sa'dan bible

KADADIAN 33

¹Nabangunammi Yakub tu matanna natiroi, sae tonganmo tu Esau sia a’pa’ratu’ muane nasolan. Napapantan torromi Yakub tu mintu’ anakna, naben Lea sia Rahel sia lako da’dua baine kaunanna.

²Napadoloi tu baine kaunanna da’dua sola anakna sia iatu Lea sola anakna napaundi-undi sidi’ na iatu Rahel sola Yusuf napaundi’-undi’na.

³Dolomi dio tingayona tau iato mai anna tukku rokko padang pempitu sae lako la nalambi’na tu siulu’na.

⁴Ma’dondomi tu Esau sae umpellambi’i, natoei sia naraka’ tu barokona sia naudung anna sitangiran sola duai.

⁵Iatonna bangunanni Esau tu matanna, natiromi tu mintu’ baine sola anakna, ma’kadami nakua: Mindara te mai musolan. Mebalimi Yakub nakua: Iamote tu mintu’ pia tu Napa’kamaseammo Puang Matua lako kaleku.

⁶Iatu baine kaunanna sola anakna sae mentireke’ anna tukku mekatabe’.

⁷Sae dukami tu Lea sola anakna mentireke’ anna tukku mekatabe’; namane sae tu Yusuf sola Rahel mentireke’ anna tukku mekatabe’.

⁸Nakuami tu Esau: Apara la dipapatuanni tu mintu’ kusitammuanna ma’baanan? Mebalimi tu Yakub nakua: Iamo la umpamatana penaammi.

⁹Nakuami Esau: E adingku, silasa sia tu dionamo kaleku, paiti’ bangmi tu apammu.

¹⁰Mebalimi tu Yakub: Da misusi to; iake mikamaseimo’, la mikarangi te pa’kasianku; belanna iate kutirona te rupammi samangku to untiro rupanna Puang Matua apa mikatana siana’.

¹¹Karangi te pa’kasiangku tu disorongammokomi, belanna Nakamaseammo’ Puang Matua sia mintu’na apa kuampui nasang. Naparuku-rukumi naurunganni ungkarangi.

¹²Nakuami tu Esau: melo ke ke’de’miki’ male tasituru’mora.

¹³Apa mebali tu Yakub lako nakua: Miissan kumua iate mai pia tang nabela sia den duka tu domba sia bembe’ sia sapi sumusupa tu anakna; iake sangallori nanii umpalingkai tau manassa mate nasang.

¹⁴Melo ke dolo bangmokomi, la umparanta’ pela’na’ kaleku unturu’ lingkana patuoan kuramba sia lingkana te mai pia, sae lako kikarampoimmi dio Seir.

¹⁵Nakuami tu Esau: Da’ito kupatorroangko ba’tu pira-pira te to kusolan. Nakuami Yakub: Ma’apai nasusi to! Da napomatana’i penaammi to!

¹⁶Mangkato sulemi tu Esau to allo iato unnola lalan lu lako Seir.

¹⁷Ke’de’mi tu Yakub lako Sukot, nagaragami tu misa’ banua dio la nanii sia nagaragan lantang tu mintu’ patuoan. Iamoto anna sangai Sukot tau tu inan iato.

¹⁸Rampo mana’pami tu Yakub lako Sikhem, misa’ tondok dio tana Kanaan, tonna sulemo dio mai Padan-Aram; ma’tendami dio matallona tondok iato.

¹⁹Unnallimi padang sangbidang, tu naninna siamo unnosok tenda lako bati’na Hemor, ambe’na Sikhem, saratu’ batu salaka.[2]

²⁰Indemoto nanii umpabendan misa’ inan pemalaran, nasangai: Kapenombanna Israel tu Kapenomban tongan.