Read Toraja-Sa'dan KADADIAN 34 Bible Online

KADADIAN 34 - Toraja-Sa'dan bible

KADADIAN 34

¹Denmi pissan iatu Dina, anakna Lea tu napadadian Yakub, male sitanda-tandan anak dara lan tondok iato.

²Natiromi Sikhem, anakna Hemor, to Hewi, datu lan tondok iato, nala’ka’i anna sangamparanni nabanga’i.

³La’ka’mi tu penaanna sia masinna lako anak dara iato, nasede-sedemi tu penaanna anak dara iato.

⁴Ma’kadami tu Sikhem lako Hemor, ambe’na, nakua: Alanna’ te anak dara iate la kupobaine.

⁵Tamami talinganna Yakub tu kareba kumua mangka nagau’ sala Sikhem tu Dina, anakna, tonna dio lu padang tu mai anakna muane ullaai patuoanna; ma’loko-lokomi tu Yakub sae lako saena.

⁶Malemi tu Hemor, ambe’na Sikhem lako Yakub la sipa’kada.

⁷Iatonna saemo tu anakna Yakub dio mai padang anna rangii tu iannato, mapa’di’mi tu penaanna sia re’dek tongan tu ara’na, belanna mangkamo tu Sikhem ma’gau’ baga dio to Israel, nagau’ sala tu anakna Yakub, tu inang tang sipatu napogau’.

⁸Sipa’kadami Hemor nakua: Nakasinnai anakku Sikhem tu anakmi; melo ke mibenmi napobaine.

⁹Melo ke sisula’ sirrinki’, benkanni tu mai anakmi baine ammi alai tu mai anakki baine.

¹⁰Melo ke torroki’ sola; iate padang tiballa’ dio tingayomi, torroi sia lelei sia alai tu apa lan.

¹¹Sia nakuapa Sikhem lako ambe’na sia siulu’na anak dara iato: Melo ke mikamaseina’, na iatu apa mipalaku la kubenkomi!

¹²Padami budanna tu somba sia pamengan mipalaku lako kaleku, padami kubenkomi, podo mibenna’ tu anak dara la kupobaine!

¹³Nabalimi anakna Yakub tu Sikhem sola Hemor, ambe’na, napakena, belanna nagau’ salamo tu Dina, siulu’na.

¹⁴Ma’kadami lako nakua: Tae’ kima’din umpogau’i susinnato, la umpa’ben siulu’ki lako to tang ma’sunna’, belanna kipomasiri’.

¹⁵Ia manna te misa’ ma’din kinii untarimakomi, iake susikomi kami mintu’ muane disunna’.

¹⁶Susipi to kimane ma’din umbenkomi anakki baine sia anakmi baine kiala, sia la sibaaki’, susito ma’dinmiki’ la sirapu.

¹⁷Apa iake tae’i mipasiolai tu kadangki, la kiala sule tu anakki angki male.

¹⁸Mintu’ kadanna naala penaanna Hemor, sola Sikhem, anakna Hemor.

¹⁹Iatu pia muane tae’mo anna ma’dempa-dempa umpogau’i te iannate, belanna nakasinnai tongan tu anakna Yakub, sia ia polepa mala’bi’na, tu mintu’ to lan banuanna ambe’na.

²⁰Saemi tu Hemor sola Sikhem, anakna lako babangan kota, anna sipa’kada pa’tondokan sola duai, nakua:

²¹Mintu’i tu tau iato mai to rapa’ penaanna, iamoto melo ke torroki’ sola lan tondok iate, sia ma’lele-lele lan, belanna padang iate malona’ tiku lao lako tau iato mai, na iatu anakna la taala tapobaine sia iatu anakta baine la taben tau iato mai.

²²Apa misa’ri la taallu’, namane unturu’i tu pa’porainta sia torro sola kita la sangrapu, ke mintu’ki’ muane disunna’ susi tau iato mai.

²³Iatu mintu’ patuoanna sia mintu’ barang apanna sia mintu’ tu nalaainna tang la tapobarang apaoparaka undinna? podo ke taturu’i tu pa’porainna, anta torro sola.

²⁴Naturu’mi mintu’na muane tu ma’dinnamo untongkonni kombongan kalua’ dio babangan tondok tu kadanna Hemor sola Sikhem, anakna, anna pantan disunna’ tu muane ma’dinnamo untongkonni kombongan kalua’ dio babangan tondok.

²⁵Iatonna ma’tallung alloammo tonna sikularammo tu mai tau, pantan unnalami la’bo’na tu anakna Yakub da’dua, iamotu Simeon sola Lewi, kakanna Dina, anna tama tondok ullaoi tu tau anna patei nasangi tu muane.

²⁶Iatu Hemor sola Sikhem anakna napatei duka bassi mataran, naalai tu Dina lan mai banuanna Sikhem anna sun sola duai male sule.

²⁷Iatonna mangkamo dipatei tu mintu’ tau iato, saemi tu anakna Yakub tu mai pia muane ussarrinni sisalingna lan tondok iato, belanna mangkamo nagau’ sala tau tu siulu’na.

²⁸Mintu’ domba sia bembe’ sia sapi sia keledainna sia barang apa lan kota sia barang apa dio duka lu padang narampa nasang,

²⁹sia mintu’ iananna sia mintu’ anakna sia mintu’ bainena narampa sia nasarrin tu mintu’ apa lan banua.

³⁰Nakuami Yakub lako Simeon sola Lewi: Mipa’petumanganna’ sia mipalele kadake tu sangangku lako mintu’ pa’tondokan iate, iamotu lako to Kanaan sia to Feris; kita te to tang pirariki’, iake natambai nasangi tu solana, sae unneaki’, manassa natalona’ sia napasisanggangna’ mintu’ repokku.

³¹Mebalimi nakua: Pato’raka la napasusi baine bualang tu adingki?