Read Toraja-Sa'dan KADADIAN 35 Bible Online

KADADIAN 35 - Toraja-Sa'dan bible

KADADIAN 35

¹Ma’kadami Puang Matua lako Yakub Nakua: Ke’de’ko male sau’ Betel, ammu torro dio sia garagai dio tu misa’ inan pemalaran lako to Kapenomban umpa’pekitanan Kalena lako kalemu tommu mallai dio mai Esau, kakammu!

²Nakuami Yakub lako repokna sia mintu’ to nasolan: Tibei tu mintu’ balo’ to salian lembang dio mai kalemi sia seroi tu kalemi sia sondai mintu’ tamangkalemi.

³Maikomi tamale sau’ Betel, belanna la unggaragana’ misa’ inan pemalaran lako tu Kapenomban untandingina’ talinga tonna lambi’na’ kamaparrisan sia urrondongna’ dio lu lalan kuolai.

⁴Nasorongi lako Yakub tu mintu’ balo’ to salian lembang dio kalena sia mintu’ baba’ dio talinganna, anna lamun nasangi Yakub rokko padang dio to’ garonto’ kayu tarpin tu sikandappi’ tondok Sikhem.

⁵Ke’de’mi tu tau iato mai, anna parampoi kamatakuran Puang Matua tu tondok naolai, natae’ pole naula’i tu mai anakna Yakub.

⁶Susimito anna rampo tu Yakub sia mintu’ to nasolan lako tondok Lus, dio tondok Kanaan, iamotu Betel.

⁷Indemo to nanii unggaragai tu misa’ inan pemalaran na iatu inan iato nasangai El-Betel, belanna indemo to Nanii Puang Matua umpaombo’ Kalena lako tonna mallai tu Yakub dio mai kakanna.

⁸Iatu Debora to mantaranakna Ribka tonna mate nadilamun rampe sau’na Betel, diong to’ garonto’ kayu jati, tu disangai jati Parran uai mata.

⁹Umpa’pekitanan poleomi Kalena tu Puang Matua lako Yakub te mangkanna sae dio Padan-Aram sia Napassakke.

¹⁰Ma’kadami tu Puang Matua lako: Iatu sangammu Yakub, apa tae’mo anna la disa’bu’ Yakub, sangadinna Israelmo tu la sangammu. Nasangaimi Israel.

¹¹Nakua tu Puang Matua lako kalena: Akumote tu Puang Matua tu Umpoissan angge maritik. Membati’moko sia memba’ka’ko. Namisa’ bangsa, ontongrika buda bangsa la bu’tu dio mai kalemu sia iatu mai datu la bu’tu dio mai tarukmu.

¹²Iate padang tu Kuba’giammo Abraham sia Ishak la Kuba’gian dukako sia iatu bati’ undimmu la Kuba’gi duka padang iate.

¹³Soro’mi langngan tu Puang Matua dio mai to’ inan Nanii ma’kada lako Yakub.

¹⁴Naosokmi Yakub misa’ tanda dianna batu silambi’ dio to’ inan Nanii Puang ma’kada lako kalena, iamo batu, tu misa’ tanda dianna batu silambi’ anna pato’doi anggoro’ dipennoloan sia nabolloi minna’.

¹⁵Na iatu inan Nanii ma’kada Puang Matua lako nasangai Betel Yakub.

¹⁶Ke’de’mi tu tau iato mai dio mai Betel, tae’mora nasangapa anna lambi’mo Efrata, kianakmi tu Rahel, lendu’ maparri’na.

¹⁷Lan to kamaparrisanna kianak to, nakuami to ma’pakianak lako: Da mumataku’, belanna unnappa’ poleomoko misa’ pia muane.

¹⁸Tonna kadakemo nasa’ding — belanna la mate — nasangaimi Ben-oni, apa nasangai ambe’na Benyamin.

¹⁹Susimoto tu kamateanna Rahel, dilamunmi dio randan lalan lako Efrata, iamotu Betlehem.

²⁰Naosokmi Yakub tu misa’ tanda dianna batu silambi’ dao to’ lamunanna; iamo tanda lamunanna Rahel tu denpa sae lako totemo.

²¹Ke’de’mi tu Israel inde to dio mai, anna osok tendana sambali’ lamban lianna Migdal-Eder.

²²Den pissan tonna pa’tondokkimi Israel tu padang iato, malemi tu Ruben ussangamparan Bilha, gundi’na ambe’na, napekarebami Israel tu iannato. Iatu muane, tu anakna Yakub sangpulo dua.

²³Mintu’ muane tu anakna Lea iamo Ruben, pa’bunga’na Yakub, namane Simeon, Lewi, Yehuda, Isakhar na Zebulon.

²⁴Iatu muane anakna Rahel: Yusuf na Benyamin.

²⁵Iatu muane anakna Bilha, pa’dua’na Rahel: Dan na Naftali.

²⁶Iatu muane anakna Zilpa, pa’dua’na Lea: Gad sia Asyer. Mintu’nate iamo anakna Yakub tu nadadian dio Padan-Aram.

²⁷Rampomi tu Yakub lako Ishak, ambe’na lan Mamre dio Kiryat-Arba, iamo Hebron, nanii Abraham sola Ishak mentiruran.

²⁸Iatu Ishak saratu’mo karua pulona taun dadinna.

²⁹Ka’tumi angin dipudukna tu Ishak, ronta’mi tondon to batangna tonna matua indukmo banu’ karurungan, nadipatama batu dilobang dipasola rapunna, nakasara’i Esau na Yakub, anakna.