Read Toraja-Sa'dan KADADIAN 37 Bible Online

KADADIAN 37 - Toraja-Sa'dan bible

KADADIAN 37

¹Iatu Yakub torro dio padang nanii ambe’na mentiruran dio tana Kanaan.

²Inde sia tu ulelean diona bati’na Yakub. Iatu Yusuf tonna sangpulo pitumo taun dadinna, manglaami sola mintu’ siulu’na-namangurapa-sibaa anakna Bilha sia anakna Zilpa, tu da’dua bainena ambe’na, naparampomi Yusuf lako ambe’na tu kareba diona kakadakeanna siulu’na.

³Iatu Yusuf mandu napakaboro’ Israel na iatu mintu’na anakna, belanna iamo dadi tonna matuamo, napopegaragammi bayu lamba’ ma’borong-borong.

⁴Tonna tiroi siulu’na, kumua mandu napakaboro’ ia ambe’na, na iatu mai siulu’na nasikabiri’imi, tae’ napa’kadai meloi lako.

⁵Ma’tindomi tu Yusuf misa’ tindo anna pokadai lako siulu’na, mandu pissanmi nasikabiri’i.

⁶Ma’kadami tu Yusuf lako nakua: Perangiri kamu te tindo mangka kupa’tindo.

⁷Dikua marassanki’ dio lu bela’ manguyun gandung, bangunmi tu panguyunku anna bendan, anna sae tu panguyunmi untalimbungi sia tukku lako panguyunku.

⁸Nakuami tu siulu’na lako: La mudatuirakannika ba’tu la muparentarakannika? Mandu pissanmi nakabiri’ belanna diona tu tindona sia iatu kadanna.

⁹Ma’tindo poleomi misa’ tindo senga’ anna pokadan siaoi siulu’na nakua: Ma’tindo poleomo’ misa’ tindo, dikua iatu allo sia bulan sia sangpulo misa bintoen tukku lako kaleku.

¹⁰Iate tindo napokada Yusuf lako ambe’na sia lako mintu’ siulu’na, apa nata’tan ambe’na nakua: Apaora patunna tu tindo mupa’tindoan? La sae tonganrakannika, te aku na indo’mu sia mintu’ siulu’mu la tukku sae rokko padang lako kalemu?

¹¹Nakemburumi siulu’na, apa iatu ambe’na napalan penaa bang tu iannato.

¹²Den pissan namale tu mintu’ siulu’na ullaai dombana sia bembe’na ambe’na sikandappi’ Sikhem.

¹³Nakuami Israel lako Yusuf: Iatu siulu’mu tang dioraka lu sikandappi’ Sikhem ullaai patuoan? Maleko mai angku suako lao lako. Mebalimi tu Yusuf nakua: Io.

¹⁴Ma’kadami tu Yakub lako Yusuf nakua: Laoko untiroi tu siulu’mu ba’tu la malaga’-laga’ siai sola tu mai mintu’ domba sia bembe’, ammu sule umpokadanna’. Susimoto tu Yakub ussuai dio mai rante Hebron, anna sae lako Sikhem.

¹⁵Denni misa’ tau nasitammuan, belanna pusa tu Yusuf dio lu padang, anna kutanai tau iato nakua: Apara mudaka’?

¹⁶Mebalimi nakua: Undaka’na’ siulu’ku, pokadanna’, umbara nanii ullaai tu panglaana.

¹⁷Nakuami tu tau iato: Ke’de’mo male indete, belanna kurangi nakua: talao lako Dotan. Malemi tu Yusuf urrundu’ siulu’na anna kabu’tui dio Dotan.

¹⁸Iatonna tiro mambelami sia iatonna tae’pa narampo lako sipa’kadami sola nasang undaka’ tangnga’ la umpatei.

¹⁹Sipa’kada-kadami: Tiromi tu to pa’tindoan saemo.

²⁰Iamoto malekomi mai anta patei sia ba’tu umbanna te bubun misa’ tanii umpembuanganni rokko, anta pokadamira kumua: mangka nakande olo’-olo’ masuru tatiroi umba nakua dadinna tu tindona.

²¹Iatonna rangii Ruben tu iannato, la narampananmi Ruben nama’kada nakua: Da tapatei.

²²Sia nakuapa tu Ruben: Da mipatibollo rara, parokko bangi misa’ bubun lan te padang pangallaran sia da mipata’pai lima. Ia sia nama’kada susito tu Ruben kumua anna rampananni tu Yusuf anna solanni sule lako ambe’na.

²³Iatonna rampomo tu Yusuf lako to’ siulu’na nalalakkimi tu bayu lamba’na, iamotu bayu lamba’ ma’borong-borong tu napake dio.

²⁴Nala’ka’imi anna parokkoi bubun apa iatu bubun marangke tae’ uai lan.

²⁵Mangkato nno’ko’mi sola nasangi la ungkande roti. Nabangunammi tu matanna anna tiroi, tu to ma’patteke’ unta, to Ismael lu dio mai Gilead sibaa untana napatteke’i lite sia pebangki’ sia kamanian, la ma’palulako Mesir.

²⁶Ma’kadami tu Yehuda lako mintu’ siulu’na nakua: Apara bua’na tu adinta la tapatei sia iatu rarana la tabuni?

²⁷Maikomi anta balukki lako to Ismael, da anta pata’pai lima lako, belanna adinta sia sangrara sangbukuki’. Naturu’mi siulu’na tu kadanna.

²⁸Iatonna lendu’ tu to Midian diriu’mi tu Yusuf diong mai bubun anna dibaluk lako to Ismael duangpulo sikele’. Nabaami tau iato tu Yusuf lako Mesir.

²⁹Iatonna sulemo tu Ruben lako to’ bubun, natiroi, a’a ta’demo tu Yusuf diong bubun, naserek-serekmi tu pakeanna.

³⁰Sulemi lako to’ siulu’na nakua: Iatu to mangura pa’demo na iate aku te umbamora tu la kuola?

³¹Naalami tau iato mai tu bayu lamba’na Yusuf sia narere’ tu anak bembe’ laki misa’ anna otonni tama rarana tu bayu lamba’ iato.

³²Napa’peami tu bayu lamba’ ma’borong-borong iato namesua umbaai lako ambe’na nakua: Den ia inde kikabu’tui, tiroi, ba’tu la bayunnai anakmi te, ba’tu la tangiai.

³³Natandaimi nama’kada nakua: Bayu lamba’na anakku te, manassa nakandemo olo’-olo’ masuru, tae’mo nasalai tang mangka nabesse-besse tu Yusuf!

³⁴Naserekmi Yakub tu tamangkalena, anna pododo karoro’ sia ma’barata ba’tu pirang-pirang allo diona tu anakna.

³⁵Saemi tu mintu’ anakna muane sia anakna baine la umpakatanai, apa noka dipakatana nama’kada nakua: Belanna diona te anakku, angku la ma’pote dibolong sae lako maleku lako lino to mate! Susimoto tu Yusuf natangi’i ambe’na.

³⁶Nabalukmi to Midian tu Yusuf dio tondok Mesir lako Potifar, parea mase’ponna Firaun, pangulu pekampa tongkonan layuk.