Read Toraja-Sa'dan KADADIAN 38 Bible Online

KADADIAN 38 - Toraja-Sa'dan bible

KADADIAN 38

¹Denmi pissan tonna attu ia dukato, natampei Yehuda tu mintu’ siulu’na, namale rokko, torro ma’tondok sola misa’ to Adulam, disanga Hira.

²Natiromo Yehuda inde to misa’ pia baine to Kanaan, disanga Syua, napobainemi, anna sangampa’.

³Ma’tambukmi tu baine iato anna dadian misa’ pia muane tu nasangai Er.

⁴Ma’tambuk pole’mi anna dadian misa’ pia muane tu nasangai Onan.

⁵Kianak poleomi undadian misa’ pia muane, tu nasangai Syela. Iatonna dadianni torro dio tondok Kezib tu Yehuda.

⁶Naalammi Yehuda misa’ baine tu Er, anak pa’bunga’na, na iatu baine iato disanga Tamar.

⁷Apa iatu Er, pa’bunga’na Yehuda tae’ Naporai PUANG tu gau’na, undinna Narabunnimi PUANG.

⁸Nakuami Yehuda lako Onan: Maleko lako to’ bainena kakammu ammu pobainei ussonda kakammu sia padenanni bati’ tu kakammu.

⁹Tu naissan Onan kumua tae’ na ia la umpobati’i, iamoto nabolloan salai rokko padang tu uai mentaunna tonna sangampa’ bainena kakanna, kumua da napadenanni bati’ tu kakanna.

¹⁰Iate penggauranna tang Naporai PUANG, iamoto Narabunni dukai PUANG.

¹¹Nakuami Yehuda lako Tamar, menintunna: Belangpako lan banuanna ambe’mu sae lako kapuanna tu anakku Syela, belanna nakua lan penaanna: podo da namate susito kakanna da’dua. Malemi tu Tamar natorro dio banuanna ambe’na.

¹²Ba’tu sangapa lendu’nato, matemi tu anakna Syua, to bainena Yehuda. Tonna maseromo tu kalena Yehuda, malemi lako to ma’ku’ku’ domba, langngan Timna sola Hira, to Adulam, sangmanena.

¹³Napokadami tau lako Tamar nakua: male langngan Timna tu matusammu la ungku’ku’i dombana.

¹⁴Nalalakkimi baine iato tu pakean balunna anna pakei tu lullung tu urrerung lindona anna nno’ko’ dio to’ babangan tondok Enaim, dio randan lalan lako Timna, belanna natiromo tu Syela kapuamo natae’ nadiben Syela la napobaine.

¹⁵Iatonna tiromi Yehuda nasangami kumua baine bualang, belanna nabungku’ tu lindona.

¹⁶Lendu’mi tu Yehuda lako to baine iato nama’kada nakua: Sia’ko, tasangampa’, belanna tae’ naissanni kumua iatu baine iato menintunna. Mebalimi tu baine iato: Apara tu la mubenna’, ammu sangamparanna’?

¹⁷Nakuami: Kupa’peammoroko anak bembe’ laki misa’. Mebalimi tu baine iato nakua: Melo, ke mubenna’ pa’petamben sae lako mupa’peanna’.

¹⁸Mekutanami tu Yehuda: Apara tu pa’petamben sipatu la kubenko? Mebalimi nakua: Benna’ tu sissin peca’mu sola ulangna sia iatu tekken mutoe. Nabenmi lako nasangampa’, susito nakea’tangimi.

¹⁹Ke’de’mi tu baine iato namale sia nalendokan tu lullungna napakei sule tu pakean balunna.

²⁰Napa’peami Yehuda tu anak bembe’ laki nabaa sangmuanena to Adulam, nasua ulla’bakki tu pa’petambenna dio mai baine iato, apa tae’ naappa’i.

²¹Mekutanami lako tau inde to nakua: Umbamira tu baine sala’kedo, tu nno’ko’ tonnanu inde Enaim dio randan lalan? Nakuami tu tau iato mai: Tae’ ia baine sala’kedo sae inde.

²²Sulemi lako Yehuda nama’kada nakua: Tae’ kuappa’i sia nakua tu tau dio: Tae’ ia baine bualang sae inde.

²³Ma’kadami tu Yehuda: Da’ito napoapai, podo da natellekan tau. Kupa’peamo te anak bembe’ laki lako, apa tae’ muappa’i.

²⁴Denmi agi-agi tallung bulan to, napokadami tau lako Yehuda nakua: Iatu Tamar, minintummu ma’gau’ salamo sia kia’tang bule’mo. Nakuami tu Yehuda: Solanni sae naditambenan kayu buangin.

²⁵Matangngamo nasolan tau nasuai tu tau lako matusanna umpokadai kumua: Iatu kama’tambukangku te, iamotu to sipoapa te apa iate! Ma’kada polemi tu baine iato nakua: Tiroi mindara sissin peca’ sola ulangna sia tekken te?

²⁶Mangakumi tu Yehuda nakua: Tongan iate baine na aku, belanna tae’ kubenni tu anakku Syela. Tae’mi nasangampa’len.

²⁷Iatonna la kianakmo tu baine iato, payan kumua rindu tu pia lan pa’tambukanna.

²⁸Marassanmo mangurria’ denmi tu misa’ umpatassu’ limanna anna alai to ma’pakianak tu bannang rarang anna papontoi, nakua: Iamote tu sun dolo.

²⁹Iatonna riu’i tu limanna tama sule, sunmi tu sangmuanena. Nakuami tu to ma’pakianak: Lendu’ ia tu kapessuangammu! Iamoto nadisangai Peres.

³⁰Undinna sunmi tu sangmuanena tu ma’ponto bannang rarang anna sangai Zerah.