Read Toraja-Sa'dan KADADIAN 39 Bible Online

KADADIAN 39 - Toraja-Sa'dan bible

KADADIAN 39

¹Iatu Yusuf nabaa tau lako Mesir, na iatu Potifar, parea mase’ponna Firaun, pangulu pekampa tongkonan layuk, iamo misa’ to Mesir mangka unnallii dio mai to Ismael, tu to umbaai rokko.

²Iatu Yusuf Narondong PUANG naurunganni maupa’ lan mintu’na sia torro mengkarang lah banuanna puangna, iamotu to Mesir.

³Iatonna tiroi puangna Narondong PUANG sia PUANG umpamaupa’i tu mintu’ napogau’na tete dio Yusuf,

⁴naporaimi tu Yusuf, nasuai umparakai sia nadullu umpoissan mintu’ barang apa nasorong lako Yusuf.

⁵Tonna mangka undullui la umpoissan apa lan banuanna sia mintu’ tu naampuinna, Napamasakkemi PUANG tu lanna banuanna to Mesir iato, belanna diona Yusuf, ondongpi Napamasakke PUANG tu mintu’ apa naampui la daona banua, la diona lu padang.

⁶Mintu’ tu naampuinna nasorong tama limanna Yusuf, naurunganni tae’mo na ia umpoissan lenni sangadinna ia mannamo tu kande nakande lu rokko. Iatu Yusuf melo pa’kaleanna sia melo tu pantarisanna.

⁷Denmi pissan tonna mangkamo tu mintu’nate mailu matami lako Yusuf tu bainena puangna nama’kada nakua: Tasangampa’.

⁸Apa noka tu Yusuf anna ma’kada lako bainena puangna nakua: Iatu puangku tae’mo angku sola umpoissanni tu mintu’ apa lan banua, sangadinna iatu mintu’ apa naampui mangkamo nasorong tama limangku.

⁹Ia duka ia tu ia lan te banua tae’ anna mandu madoan na aku sia mintu’ barang apa tae’ napasalian lako kaleku sangadinna kamu manna, belanna bainenakomi; ma’apai angku la umpogau’i te kakadakean kapua sia kasalan langngan Puang Matua!

¹⁰Moi nakuan bang tu Yusuf kiallo-kiallo tae’ duka naperangii la sangampa’ ba’tu la lako kalena.

¹¹Denmi sangallo namale tu Yusuf tama banua la ungkarang pengkaranganna, na iatu mintu’ tau lan banua tae’ misa’ dioren nasolan.

¹²Nala’ka’imi baine iato tu bayu lamba’na nakuanni: Tasangampa’! Apa nalendokan Yusuf tu bayu lamba’na tu manda’ lan limanna baine iato, namallai sun.

¹³Iatonna tiromi tu baine iato natampemo Yusuf tu bayu lamba’na lan limanna sia mallaimo sun,

¹⁴natambaimi tu mintu’ tau lan banuanna nama’kada lako nakua: Tiromi, nabaangki’ sae te to Ibrani, la umpaningo-ningoiki’, belanna sae lako kaleku la ussangamparanna’, apa metambana’ umpekapuai gamarangku.

¹⁵Iatonna rangimi kupekapuai tu gamarangku metamba, natampemi tu bayu lamba’na dio to’ sa’deku namallai sun.

¹⁶Napadio bangmi to’ sa’dena tu bayu lamba’na Yusuf sae lako saena tu puangna.

¹⁷Napokadami lako tu mintu’na kada iato, nakua: Iate kaunan to Ibrani tu mubaangkan sae, sae lako kaleku umpaningoina’.

¹⁸Iatongku metamba umpekapuai gamarangku, natampemi tu bayu lamba’na dio to’ sa’deku anna mallai sun!

¹⁹Iatonna rangimi puangna Yusuf tu mintu’ kadanna bainena tu napokada lako, nakua: Susimoto tu penggauranna kaunanmu lako kaleku, re’dekmi tu ara’na.

²⁰Naalami puangna tu Yusuf napatamai pa’tarungkuan tu dinii duka untarungku taunna datu tu dirante bassinna. Indemito tu Yusuf lan pa’tarungkuan.

²¹Apa Narondong PUANG tu Yusuf, anNa pa’kamaseanni sia Napabu’tu lan penaanna pangulu pa’tarungkuan tu kamamasean lako Yusuf, naurunganni naporai.

²²Nasorongi pangulu pa’tarungkuan tama limanna Yusuf tu mintu’ to ditarungku, na iatu mintu’ apa la napogau’, naissanpi Yusuf.

²³Tae’ napasalai bangi mata pangulu pa’tarungkuan tu apa napoissan Yusuf, belanna narondong PUANG sia iatu apa napogau’ Napamaupa’ duka PUANG.