Read Toraja-Sa'dan KADADIAN 4 Bible Online

KADADIAN 4 - Toraja-Sa'dan bible

KADADIAN 4

¹Sangampa’mi bainena tu tolino, iamotu Hawa, ma’tambukmi, nadadianni tu Kain, nakuami: Kuappa’mo tu misa’ pia muane tete dio pa’tunduanNa PUANG.

²Undinnato nadadiammi tu adinna, iamo Habel; iatu Habel umpatuo bembe’ sola domba, na iatu Kain lumbang dilitak.

³Den pissan tonna kendekmo bura padang nabaami Kain tu bura padangna la dipenomban langngan PUANG.

⁴Ia duka tu Habel naala tu duku’ bembe’ sia domba pa’bunga’na sia lompona. Naalami penaanNa PUANG tu Habel sia iatu pemala’na.

⁵Apa iatu Kain sia penombana tae’ anNa alai penaanNa PUANG. Lendu’mi sengkena tu Kain sia suruk bang.

⁶Nakuami PUANG lako Kain: Ma’apai ammu sengke sia tukku bang?

⁷Iake ma’gau’ meloko tae’ mutang mentingara? Na iake tae’i ammu ma’gau’ melo, tumayamo tu kasalan dio to’ babangan. Nakailuiko apa sipatu la muparenta!

⁸Nakuami tu Kain ungkuan Habel, adinna: (Talao lako padang.) Iatonna diomo lu padang sola duai, nabobo’mi Kain tu Habel, adinna, napatei.

⁹Nakuami PUANG lako Kain: Umbami tu adimmu, Habel? Mebalimi: Tae’kuissanni; akuraka ungkampai adingku?

¹⁰Nakuami PUANG: Apara tu mangka mupogau’? Iatu gamara rarana adimmu metamba diong mai padang lako kaleKu!

¹¹Iamoto nasallamoko padang, tu mangka menganga untimang rarana adimmu dio mai limammu.

¹²Iake muposara’i tu padang, manassa tae’mo na la umpakendekangko burana, la salamba-salaoko lan lu lino!

¹³Nakuami tu Kain lako PUANG: Iatu kasalangku natondon maro’na’.

¹⁴Tonganna totemo Miula’imo’ lan mai padang iate, la kupembunian tu kaleku dio mai oloMi, sia la salamba salaona’ lan te lino; manassa la dadi undinna, ke minda-minda kusitammuan tae’ na la tang umpateina’.

¹⁵Nakuami PUANG lako Kain: Iamoto ke denni tau umpatei Kain, la manglokkon pempitu tu pakkanna! Nabenni tanda PUANG tu Kain kumua da napatei tau, ke denni nasitammuan.

¹⁶Sumoro’mi tu Kain dio mai oloNa PUANG, natorro dio padang Nod, dio matallona Eden.

¹⁷Sangampa’mi tu Kain bainena, nama’tambuk, nadadianni tu Henokh. Ullepongmi tondok tu Kain, nasangaimi Henokh sikona sanganna anakna.

¹⁸Iatu Henokh undadiammi Irad, na Irad undadian Mehuyael na Mehuyael undadian Metusael na Metusael undadian Lamekh.

¹⁹Iatu Lamekh umpada’dua bainena, misa’ disanga Ada na misa’ disanga Zila.

²⁰Iatu Ada undadian Yabal, iamo naponene’ mintu’ to ma’banua tenda sia to umpatuo patuoan.

²¹Iatu adinna disanga Yubal, iamo naponene’ mintu’ pa’katapi sia passuling.

²²Na iatu Zila undadian Tubal-Kain, iamo misa’ pande tambaga sia pande bassi; iatu adinna baine Tubal-Kain, disanga Naama.

²³Nakuami tu Lamekh lako bainena sola duai Ada sola Zila: Perangii sola duakomi tu randan dipudukku, e kamu bainena Lamekh, patananni talinga tu tongka’ dililaku. Tonganna umpateina’ misa’ muane belanna diona bangkeku, sia to mangura belanna diona kaluntorangku.

²⁴Belanna iake pempitui dipassosoan tu Kain, iatu Lamekh la dipassosoan pempitungpulo sipitu!

²⁵Iatu Adam sangampa’ pole’omi bainena, nadadiammi tu misa’ pia muane, nasangai Set nakua: Belanna nabenmo’ Puang Matua tu misa’ taruk senga’ la ussonda Habel, tu mangka napatei Kain.

²⁶Iatu Set undadian misa’ pia muane, tu nasangai Enos; attu iamorato anna randuk tu tau massambayang ussa’bu’ sanganNa PUANG.