Read Toraja-Sa'dan KADADIAN 41 Bible Online

KADADIAN 41 - Toraja-Sa'dan bible

KADADIAN 41

¹Iatonna ganna’mo duang taun ma’tindomi tu Firaun bendan dio randan salu.

²Pakalan kendekmi pitu sapi diong mai salu tu melo rupanna sia malompo anna undaka’ kande dao randanan.

³Pakalanto kendek poleomi pitu sapi senga’ diong mai salu, megi’giran tu rupanna sia madongkong anna bendan sikandappi’ sapi senga’ dio randan salu.

⁴Na iatu sapi megi’giran rupanna sia madoko pura nakande tu pitu sapi melo rupanna sia malompo. Mangkato pana’dingmi tu Firaun.

⁵Leppeng poleomi tu Firaun anna ma’tindo ma’penduan. Pakalan tuomi pitung buli gandung lobo’ sia malapu’ dio sangbatang dalame.

⁶Pakalanto tuoomi pitung buli gandung tu mambu sia nalayu angin lu lan mai matallo.

⁷Iatu pitung buli mambunna naamma’ tu maloboranna sia malapu’na. Pana’dingmi tu Firaun; a’a ma’tindona’ pale’.

⁸Iatonna melambi’ dio mai ma’bara-barami tu ara’na Firaun na mesua untambai mintu’ to paissan-issan sia to patanda-tandan dio tondok Mesir; napokadami Firaun lako tau iato mai tu tindona, apa tae’ bang misa’ unnissanni ussembanganni Firaun.

⁹Saemi mennolo tu pangulu pa’kampa pangiru’ lako Firaun, nakua: Iate allo kukilalai tu salaku.

¹⁰Belanna lendu’ tongan sengkena tu Firaun lako to ma’parakana anna pattangna’ sola pangulu pa’kampa kande lan banuanna pangulu pa’kampa tongkonan layuk.

¹¹Iato bongi sangbongi pada ma’tindomokan, aku na ia, iatu pa’tindoki pantan den battuananna.

¹²Iatu kisolan dio den misa’ to mangura to Ibrani, kaunanna pangulu pa’kampa tongkonan layuk; kipokadai tu tindoki lako, anna sembangi, napantan umpapatui sembangna susitu tindoki.

¹³Naumba nakua ussembangi susi dukato tu dadi, iatu aku dipasulena’ tama toeku na iatu ia ditoke’.

¹⁴Mesuami tu Firaun umpopetambai tu Yusuf, natassu’i tau madoi’ lan mai lo’ko nadiku’ku’i tu beluakna sia disondai tu pakeanna nasae mennolo lako Firaun.

¹⁵Ma’kadami tu Firaun lako Yusuf: Dikua ma’tindona’ natae’ bang misa’ tau manarang ussembangi, apa kurangi tu karebammu kumua: muranginna tu misa’ tindo muissanna ussembangi.

¹⁶Mebalimi tu Yusuf lako Firaun: Tae’ naaku umpoissanni te, Puang Matua Ia la umpokadai tu la napomelona Firaun.

¹⁷Ma’kadami Firaun lako Yusuf nakua: Iatu lan tindoku bendanna’ dio randan salu.

¹⁸Pakalan kendekmi pitu sapi diong mai salu, malompo sia melo rupanna anna undaka’ kande dao randanan.

¹⁹Pakalan to kendek poleomi pitu sapi senga’, madongkong sia lendu’ megi’giranna tu rupanna sia surrengge-rengge usukna. Lendu’ kadakena tae’ bangpa kutiro lan lili’na tondok Mesir.

²⁰Iatu sapi surrengge-rengge sia megi’giran pura nakande tu sapi malompo pitu tu bunga’-bunga’na kendek.

²¹Mentamami tambukna, apa tae’ napayan kumua lendu’mo rokko tambukna, belanna megi’giran bang sia rupanna, susi dolona. Pana’dingmo’

²²Undinnato kutiro pole’omi lan tindoku: tuo pitung buli gandung dio sangbatang dalame, malappuk sia melo.

²³Pakalanto tuo poleomi pitung buli gandung langko sia mambu sia nalayu angin lu lan mai matallo.

²⁴Iatu buli gandung mambunna naamma’ tu malapu’na. Kupokada nasangmote lako mintu’ to pakita-kita, apa tae’ bangi misa’ unnissanni ussembanganna’.

²⁵Ma’kadami tu Yusuf lako Firaun nakua: Iate tindona Firaun misa’ bangsiari, iatu apa Napaden Puang Matua, Napaissanan Firaun.

²⁶Iatu sapi malompo pitu iamo pitung taun sia iatu buli gandung melo pitu, pitung taun duka, na iate tindo misa’ bangsiari.

²⁷Iatu pitu sapi madongkong sia megi’giran tu undinna kendek; ia dukamo pitung taun sia iatu buli gandung langko sia nalayu angin lu lan mai matallo, la pitung taun ra’pak padang.

²⁸Iamote tu kada kupokada lako Firaun, kumua iatu apa la Napaden Puang Matua Napatiroan Firaun.

²⁹Manassa iate la pitung taun lako la memba’ka’ tu bura padang lan mintu’ lili’na Mesir.

³⁰Apa undinna to la sae tu ra’pak padang pitung taun naurunganni tang dikilalaimo tu mintu’ kamemba’karan bura padang lan tondok Mesir sia iatu ra’pak padang iato iamo la urratoi mintu’ tondok.

³¹Iatu kamemba’karan iato tang dilamban bayo-bayomo lan tondok natumang karorian pannang sae undinna, belanna iatu ra’pak padang iato lendu’ masangna.

³²Iatu tindo iato ma’penduan maro’ sae lako Firaun tu belanna iatu apa iato Napamanassa tongan Puang Matua sia Puang Matua duka la umpalaloi madomi’.

³³Na totemo melo ke nadaka’i Firaun misa’ to manarang sia kinaa naangka’i la umparenta tondok Mesir.

³⁴La susite napogau’ Firaun: la diangka’ mantari’ sikambi’ panaungan, nadiala sangtaa limanna tu bura padang lan tu pitung taun attu kamemba’karan.

³⁵La naduruk tu mintu’ kande lan to taun melo te la sae sia iatu gandung dipopa’misa’ lan paissanna Firaun sia iatu kande la silele tu tondok dipannii.

³⁶Na iatu mintu’ kande iato la diparingkisan tondok lan to pitung taun ra’pak padang tu la dadi lan tondok Mesir, kumua da nasabu’ tu pa’tondokan napobua’ ra’pak padang iato.

³⁷Iatu kadanna Yusuf to natonganni Firaun sola mintu’ to naala parea.

³⁸Ma’kadami tu Firaun lako tu to naala parea: Umba la tanii unnappa’ misa’ tau susite tu natorroi PenaanNa Puang Matua?

³⁹Ma’kadami tu Firaun lako Yusuf nakua: Belanna Napasombo Puang Matua lako kalemu tu mintu’na te, iamoto tae’ tu tau misa’ manarang sia kinaa susi iko.

⁴⁰Iko la kuangka’ pangulu lan tongkonan layukku sia iko la umpasun parenta anna podenni kande nakande mintu’ orangku; ia mannamo te torroangku kunii ullosongiko.

⁴¹Sia nakuapa Firaun lako Yusuf: Kuangka’moko dadi pangulu lan lili’na Mesir.

⁴²Nalossokammi Firaun tu sissinna lan mai limanna anna patamai limanna Yusuf sia mesua umpapakei sampin kasa malannang sia napamanikki rante-rente bulaan.

⁴³Napakendekmi langngan kareta ma’penduan, iamotu karetana, dolomi tu tau metamba-tamba dio olona nakua: Ma’kamandi’komi! Iamote tu to naangka’ Firaun umparenta mintu’ tondok Mesir.

⁴⁴Ma’kadami tu Firaun lako Yusuf nakua: Aku te Firaun, apa tae’ nama’din misa’ tau tumengka ba’tu kumorong lan lili’na Mesir ke tae’ na iko!

⁴⁵Nasangaimi Zafnat Pa’aneah Firaun tu Yusuf sia naben Asnat, anakna Potifera, to minaa dio On napobaine. Sunmi tu Yusuf male ussalong-salongi mintu’ tana Mesir.

⁴⁶Tallungpulomo taun dadinna tu Yusuf tonna mennolo lako Firaun, datu Mesir. Messimanmi tu Yusuf lako Firaun anna male ussalongi tu mintu’ tana Mesir.

⁴⁷Lan to pitung taun kamemba’karan, kendekmi tu burana padang tang dikemba’-kemba’.

⁴⁸Nadurukmi Yusuf tu mintu’ kande dio tana Mesir lan to pitung taun kamemba’karan, anna annai tu pa’paringki’ lan mintu’ tondok; pada napopa’misa lan mintu’ tondok tu bura padang lembangna.

⁴⁹Susimoto nadurukmi Yusuf tu gandung tu pada karangan dio biring tasik, naurunganni tae’mo napalanda’i tau umbilangi, belanna tang dikemba’ budanna.

⁵⁰Tonna tae’pa nalambi’i taun ra’pak padang, dadimo da’dua tu anakna Yusuf, pia muane, napadadianni Asnat, anakna Potifera, to minaa dio On.

⁵¹Iatu anak pa’bunga’na Yusuf nasangai Manasye belanna nakua: Napa’deimo Puang Matua lan mai penaangku mintu’ kamaparrisangku sia mintu’ to lan banuanna ambe’ku.

⁵²Iatu anak ma’penduanna nasangai Efraim, nakua: Belanna Napopembati’mo’ Puang Matua lan tu tondok kunii dipakario-rio.

⁵³Iatu pitung taun nanii kamemba’karan dio tana Mesir ganna’mo.

⁵⁴Randukmi sae tu pitung taun ra’pak padang, susitu napokada Yusuf; ra’pak padang nasang lan mintu’ tondok, apa lan mintu’ tondok Mesir den ia kande.

⁵⁵Belanna iatonna sipangeloan nasangmo tu pa’tondokan dio Mesir sia sumarro lako Firaun umpalaku kande, ma’kadami tu Firaun lako mintu’ to Mesir, nakua: Lulakokomi Yusuf: pogau’i tu apa napokadangkomi.

⁵⁶Iatonna rampoi ra’pak padang tu mintu’ tondok iato, nabungka’mi Yusuf tu mintu’ pa’pannian gandung anna balukki lako mintu’ to Mesir, belanna masang tongan tu ra’pak padang lan tondok Mesir.

⁵⁷Pantan saemi dio mai mintu’ tondok tu tau male lako Mesir unnalli gandung lako Yusuf, belanna masang tongan tu ra’pak padang lan mintu’ tondok.