Read Toraja-Sa'dan KADADIAN 44 Bible Online

KADADIAN 44 - Toraja-Sa'dan bible

KADADIAN 44

¹Nakuammi Yusuf tu to matappa’na lan banuanna nakua: Patamanni karungna sola nasangi te tau tu kande angge nabelanna nabaa sia patamai baba karungna tu mai doi’na.

²Iatu irusangku, tu irusan salaka, patamai baba karungna to bongsunna, sia doi’ pangalli gandungna. Napogau’mi susitu pepasan napokadanni Yusuf.

³Iatonna masiang melomo dio mai naelorammi tau sola nasangi ke’de’ sola tu mai keledainna.

⁴Iatonna tassu’mo tu tau iato mai lan mai tondok, tae’pa nasangapa mambelanna, ma’kadami tu Yusuf lako to matappa’ lan banuanna: Ke’de’ko ammu undi urrundu’i tu tau iato mai, iake mulambi’i kuako susite: Ma’apai ammi papakkanni kadake tu kameloan?

⁵Tangiaraka irusanna puangku te sia ia duka nanii untiro tanda-tanda? Lendu’ tongan kadakena tu penggauran mipogau’mo.

⁶Nalambi’mi tu tau iato mai anna pokadai lako tu mintu’na kada iato.

⁷Mebalimi lako tu tau iato mai nakua: Ma’apari mima’kada susira to, puang? Toyang kami dio mai kaleki la umpogau’i tu penggauran susito!

⁸Iatu doi’ tu dikabu’tui lan baba karungki kibaamo sule lako kalemi dio mai tana Kanaan, ma’apai angki la umboko salaka ba’tu bulaan lan mai banuanna puangmi?

⁹Indangki sola nasang te minii ungkabu’tui tu irusan, elo’namo nadipatei na iatu kami sola nasang la mipokaunankan.

¹⁰Mebalimi nakua: Totemo melo susitu kadammi, minda-minda dinii ungkabu’tui iamoto tu la kupokaunan, apa iatu kamu senga’na ma’dinkomi tarru’.

¹¹Napopengkalaomi madomi’ tu mai karungna rokko padang anna pantan umbungka’i.

¹²Napemadaka’imi tau iato randuk dio mai matuanna sae lako manguranna, nakabu’tui tu irusan lan karungna Benyamin.

¹³Naserek-serekmi tau iato mai sola nasangi tu tamangkalena, sia pantan napakendek tu karungna langngan keledainna, anna sule tama tondok.

¹⁴Mentamami banuanna Yusuf tu Yehuda sola mintu’ siulu’na, belanna dio siapa tu Yusuf, anna tukku sae rokko padang tu tau iato mai dio olona.

¹⁵Ma’kadami tu Yusuf lako nakua: Penggauran apaora te penggaurammi? Tae’raka miissan kumua iatu to susi aku te to untandai tanda-tanda?

¹⁶Ma’kadami tu Yehuda nakua: Apara tu la kikua lako kalemi, sia umbara la kikua ma’kada sola nasang sia umbara la kikua sola nasang umpa’tutuan kaleki? Nakabu’tuimo Puang Matua tu kasalanna kaunanmi. Iate kami sola nasang mipokaunanmokan, la kami sola nasang, la iatinde to dinii ungkabu’tui irusan.

¹⁷Ma’kadami Yusuf nakua: Toyang ia dio mai kaleku la umpogau’i tu susinnato, sangadinna iatu to dinii ungkabu’tui tu irusan, iamo la kupokaunan, apa iate kamu sola nasang, ke’de’ marampa’mokomi male langngan ambe’mi.

¹⁸Saemi tu Yehuda umpetireke’i Yusuf nama’kada nakua: O puangku, simanna’ la umpokada sangbuku kada narangii talingammi, sia da nare’dek tu ara’mi lako kaunanmi, belanna samammi bangsia Firaun.

¹⁹Mangkamokomi umpekutananni lako kaunanmi kumua: Den siaparaka tu ambe’mi ba’tu siulu’mi?

²⁰Kikuami ma’kada lako kalemi: Den siapa tu ambe’ki matuamo, sia misa’ tu anakna muane, anak tampak, tu dadi te matuannamo, iatu kakanna matemo, misa-misamora tu sangindo’, lendu’ napakaboro’na ambe’na.

²¹Mikuammokanni kumua: solanni sae angku tiroi.

²²Ma’kadamokan lako kalemi kumua: Umbai tae’ nabelai tu to mangura iato untampei tu ambe’na, belanna ke natampei, manassa matemo tu ambe’na.

²³Apa ma’kadakomi lako kaleki kumua: Iake tae’i misae sola adimmi tu bongsunna damo mitiro lindoku.

²⁴Iatongku sae langngan kaunanmi, ambe’ku kupokadami lako tu mintu’ kadammi.

²⁵Nakuami tu ambe’ki: Sulekomi ammi alliangki’ kande sidi’.

²⁶Mebalimokan kumua: Tae’ kila male rokko. Sangadinna ke kisolanni tu adingki, male siakanni; belanna tae’ kima’din umpennoloi polei tu puang iato, sangadinna ke kisolanni tu adingki.

²⁷Nakuami tu kaunanmi, ambe’ku lako kaleki: Miissan kumua iatu baineku da’dua muane napadadianna’.

²⁸Iatu misa’ natampemo’, kusanga manassa mangkamo nabesse-besse olo’-olo’ masuru, belanna tae’mo kutiroi sae lako totemo.

²⁹Iake la miala poleoi te pia anna matumba-matumba, manassa mipatama liang tu ubanku natumang kamapa’diranna penaangku.

³⁰Iamoto iake saekan lako kaunanmi, ambe’ku, napa’de te to mangura kisolan, belanna iatu penaanna tiala lako te to mangura,

³¹tae’ nasalai, ke natiroi pa’de te to mangura, manassa la mate, na iate kami la umpatamakan liang ubanna kaunanmi, ambe’ki natumang kamapa’diranna penaanna.

³²Pissanmi to mangkamo kutanggungi te to mangura dio tingayona ambe’ku, kukua: iake tae’i angku solanni sule lako kalemi, manassa aku urrengnge’i tu kasalan iato tontong sae lakona.

³³Totemo da’ito na akumo torro inde mipokaunan ussondai te to mangura, eloranni te to mangura male sola mintu’ siulu’na langngan.

³⁴Belanna umba la kukua sule langngan ambe’ku, ke pa’dei te to mangura kusolan? Kutiroi manii tu kamasussan urrampoi ambe’ku.