Read Toraja-Sa'dan KADADIAN 45 Bible Online

KADADIAN 45 - Toraja-Sa'dan bible

KADADIAN 45

¹Susimito iatu Yusuf tang natanan-tananmo tu ara’na dio tingayona mintu’ to dio ren nasolan nametamba nakua: Suai tassu’ tu mintu’ tau indete! Tae’ bangmi tau nasolan Yusuf tonna pa’petandan kalena lako mintu’ siulu’na.

²Ma’urrukammi tumangi’ naurunganni narangi mintu’ to Mesir sia mintu’ to lan tongkonan layukna Firaun.

³Nakuami tu Yusuf lako siulu’na: Akumo Yusuf! Tuo siaparaka tu ambe’ku? Tae’mi napebalii siulu’na, belanna tiramban tongan untiroi.

⁴Nakuami tu Yusuf lako siulu’na: Inde-indekomi saemi nareke’, nakuami: Akumo Yusuf, adimmi, tu mibaluk sae inde Mesir.

⁵Apa totemo da mimasussa ba’tu tilalak tu ara’mi, tu mangkamo’ mibaluk sae indete, belanna Nasuana’ Puang Matua dolo la umpatuokomi.

⁶Belanna totemo mane duang taun tu ra’pak padang lan te tondok, limang taun bangpa, nalan to limang taun tae’ tau la ma’tengko ba’tu mepare.

⁷Nasuana’ Puang Matua dolo, kumua ammi patorro siapi lan te lino, sia umpamakarimman ba’tu sangapa budanmi ammi marendeng.

⁸Iamoto tangia kamu umbaana’ sae indete, sangadinna Puang Matua sia Napadadina’ sulle ambe’ lako Firaun sia umpoissan mintu’ lanna tongkonan layukna datu sia umparenta mintu’ tana Mesir.

⁹Madomi’komi male langngan ambe’ku, pokadai lako: Susite tu kadanna anakmi, Yusuf: Napadadina’ to ma’parenta Puang Matua lan mintu’ tana Mesir, iamoto saekomi, da mima’dempa-dempa.

¹⁰Ammi torro dio padang Gosyen sikandappi’ aku, kamu, ambe’, na mintu’ anakmi sia ampomi sia dombami sia bembe’mi sia sapimmi sia mintu’na apa miampui.

¹¹Indemoto la kunii ungkaduttu’komi, belanna la denpa limang taun tu ra’pak padang, da mikapu’duran sola to lan banuammi sia mintu’ tu miampuinna.

¹²Manassa matammi kalena sola nasang ta’pa sia matanna adingku Benyamin, kumua pudukku bangsiamo ma’kada-kada lako kalemi.

¹³Iamoto pokadanni ambe’ku tu mintu’ kamala’birangku inde tana Mesir sia mintu’ tu apa nata’pai matammi, mimadomi’ ussolanni dao mai tu ambe’ku.

¹⁴Naraka’mi Yusuf tu barokona Benyamin natumangi’ sia tumangi’ duka tu Benyamin anna raka’i tu barokona Yusuf.

¹⁵Sia naudung Yusuf tu mintu’ siulu’na anna tumangi’; mangkato maneri umbuang kada lako, tu siulu’na.

¹⁶Kaissanammi tu kareba iato tama tongkonan layukna datu, kumua sae tu mintu’ siulu’na Yusuf; iatu kareba iato naposende Firaun sola mintu’ to naala parea.

¹⁷Ma’kadami tu Firaun lako Yusuf nakua: Pokadanni siulu’mi susite: Pogau’i te: passampei tu mintu’ keledaimmi ammi male lako tana Kanaan.

¹⁸Ammi solanni dio mai tu ambe’mi sia mintu’ to lan banuammi sae inde, angku kamaseikomi apa melo lan tana Mesir sia la mikande tu lompona te padang.

¹⁹Totemo dipokadangkomi: Pogau’i te, alanni anakmi sia bainemi tu ba’tu pira-pira kareta lan tondok Mesir sia la misolan duka dio mai tu ambe’mi sae inde.

²⁰Sia da mikatirinnai tu pareanan banuammi, belanna iatu apa mandu melo lan mintu’ tondok Mesir la mipoapa!

²¹Napogau’mi anakna Israel susito; nabenmi Yusuf ba’tu pira-pira kareta lako susitu kadanna Firaun sia naben pole kinallo lalanna.

²²Napapakeimi pakean rundun sisangpasang, na iatu Benyamin diben talluratu’ sikele’[3] na limang pasang pakean.

²³Na lako ambe’na inde sia tu napa’peanni: sangpulo keledai laki unteke’ apa masuli’ allinna dio mai tana Mesir sia sangpulo keledai birang unteke’ gandung sia roti sia ma’rupa-rupa kande la napokinallo ambe’na.

²⁴Nasuami tu siulu’na ke’de’ anna male, sia napakare’na nakua: da misigaga lako lalan.

²⁵Ke’de’mi tu tau iato mai dio mai tana Mesir narampo lako tana Kanaan, lako Yakub, ambe’na.

²⁶Napokadami tau iato mai lako nakua: Iatu Yusuf tuo siapa, ia poleopi umparenta mintu’ tana Mesir! Tilalakmi tu ara’na Yakub, belanna tae’ napatonganni tu kadanna tau iato mai.

²⁷Apa iatonna parampomi lako tu mintu’ kadanna Yusuf sia natiro tu mintu’ kareta tu napa’peanni Yusuf kumua la umbaai lako Mesir, matanami tu penaanna Yakub, ambe’na.

²⁸Nakuami tu Israel: Ganna’moto, iatu anakku Yusuf tuo siapa, la laona’ sitiro kumane mate!