Read Toraja-Sa'dan KADADIAN 46 Bible Online

KADADIAN 46 - Toraja-Sa'dan bible

KADADIAN 46

¹Ke’de’mi tu Israel sibaa tu mintu’ apa naampui, narampo lako Bersyeba; anna pemalaran ba’tu pira-pira pemala’ lako Kapenombanna Ishak, ambe’na.

²Iatonna bongi ma’kadami tu Puang Matua lako Israel lan patiro mendeata Nakua: E Yakub, Yakub. Ma’kadami Yakub nakua: Inde siana’, Puang!

³Ma’kadami Nakua: Akumo tu Puang Matua, Kapenombanna ambe’mu, da mumataku’ lao lako Mesir, belanna dio la Kunii umpadadiko misa’ bangsa kapua.

⁴Aku la musolan rokko Mesir sia manassa la Kupasule poleko diong mai, sia iatu Yusuf iamo la ussamboi matammu.

⁵Susito ke’de’mi tu Yakub dio mai Bersyeba. Nasolan anakna Israel tu Yakub, ambe’na sia iatu mai anakna sia iatu mai bainena ma’kareta tu napa’peanni Firaun la umbaai tu tau iato mai.

⁶Sia nabaa duka tu mintu’ patuoanna sia mintu’ barang apanna tu napasidurukmo lan tana Kanaan, narampo lako Mesir, iamotu Yakub sia mintu’ bati’na nasolan duka.

⁷Iamotu mintu’na anakna muane sia ampona muane nasolan, sia iatu mai anakna baine sia ampona baine tu nadadian anakna muane, sia mintu’ tu bati’na nasolan duka lako Mesir.

⁸Inde sia tu sanganna tu mai anakna Israel tu male rokko Mesir, Yakub sola mintu’ anakna muane: Iatu pa’bunga’na Yakub iamotu Ruben;

⁹iatu anakna Ruben tu muane iamo: Henokh, Palu, Hezron na Karmi;

¹⁰iatu anakna Simeon tu muane iamo: Yemuel, Yamin, Ohad, Yakhin na Zohar na iapa tu Saul tu nadadian baine to Kanaan;

¹¹na anakna Lewi tu muane iamo: Gerson, Kehat, na Merari;

¹²na anakna Yehuda tu muane iamo: Er, Onan, Syela, Peres na Zerah; apa iatu Er sola Onan mangka mate dio tana Kanaan; na anakna Peres tu muane iamo: Hezron na Hamul;

¹³na anakna Isakhar tu muane iamo: Tola, Pua, Ayub na Simron;

¹⁴na anakna Zebulon tu muane iamo: Sered, Elon na Yahleel.

¹⁵Mintu’nai te muane nadadian Lea, tu napadadian Yakub dio Padan-Aram sia Dinapa, anakna baine. Mintu’ tu anakna muane sia baine tallungpulo ntallu sola nasangi.

¹⁶Iatu anakna Gad tu muane iamo: Zifyon, Hagi, Syuni, Ezbon, Eri, Arodi na Areli;

¹⁷na anakna Asyer tu muane iamo: Yimna, Yiswa na Beria, na Serah anak daranna; na anakna Beria iamo: Heber na Malkiel.

¹⁸Iamote tu muane tu mai anakna Zilpa, tu napa’ben Laban lako Lea, anakna, iamo mintu’i sangpulo annan tau napadadianni tu Yakub.

¹⁹Iatu muane nadadian Rahel, bainena Yakub, iamo: Yusuf na Benyamin.

²⁰Iatu lakona Yusuf dadi dio tana Mesir tu Manasye sola Efraim, tu napadadianni Asnat, anakna Potifera, to minaa dio On.

²¹Iatu anakna Benyamin tu muane iamo: Bela, Bekher, Asbel, Gera, Naaman, Ehi, Rosh, Mupim, Hupim na Ared.

²²Mintu’i te iamo muane anakna Rahel, tu napadadian Yakub, mintu’i sangpulo a’pa’ tau.

²³Iatu anakna Dan muane iamo: Husim.

²⁴Iatu anakna Naftali tu muane iamo: Yahzeel, Guni, Yezer na Syilem.

²⁵Iamote tu muane, tu mai anakna Bilha, tu napa’ben Laban lako Rahel, anakna, iamo mintu’i pitu tau napadadianni tu Yakub.

²⁶Mintu’i tu bati’na Yakub tu sae dio Mesir, tu sun dikalena boko’ tu mai bainena anakna, annan pulona nnannan tau sola nasangi.

²⁷Iatu anakna Yusuf tu muane tu dadi dio Mesir da’dua tau; namintu’ to lan banuanna Yakub tu sae dio Mesir pitungpulo tau sola nasangi.

²⁸Nasuami Yakub tu Yehuda male dolo lako Yusuf la umpokadanni Yusuf kumua diomo Gosyen tu Yakub. Rampomi to mai tau dio tana Gosyen.

²⁹Napasakka’mi Yusuf tu karetana, namale lako Gosyen lao untammui Israel, ambe’na. Iatonna sitammumo naraka’mi Yusuf tu barokona sia tumangi’, mendoyang ba’tu sangapa dio barokona.

³⁰Nakuami Israel lako Yusuf: Totemo moi matemo’ to, tu kutiro siamo tu lindomu, kumua tuo siapoko!

³¹Ma’kadami tu Yusuf lako mintu’ siulu’na sia lako to lan banuanna ambe’na: La malena’ umpaissananni Firaun sia la umpokadanni kumua mintu’ siulu’ku sia mintu’ to lan banuanna ambe’ku dio tana Kanaan, rampomo lako kaleku.

³²Iatu tau sola nasangi manglaa domba, belanna biasamo umpatuo patuoan sia nabaa duka tu dombana sia bembe’na sia sapinna sia mintu’ tu apa naampui.

³³Iake natambaikomi Firaun, anna kutanaikomi kumua: apara tu pandakarammi?

³⁴La mebalikomi susite: Iate kami sola nasang biasakan umpatuo patuoan randuk dio mai bitti’ki sae lako totemo, la kami la to doloki. La susito, ammi dieloran torro lan tana Gosyen, belanna iatu to umpatuo domba nakagalli to Mesir.