Read Toraja-Sa'dan KADADIAN 47 Bible Online

KADADIAN 47 - Toraja-Sa'dan bible

KADADIAN 47

¹Saemi tu Yusuf umpokadanni Firaun nakua: Iatu ambe’ku sia mintu’ siulu’ku na mintu’ dombana bembe’na sia sapinna na mintu’ tu apa naampui saemo dio mai tana Kanaan; dio sia tana Gosyen.

²Naalami lima tu mintu’ siulu’na napopangolo lako Firaun.

³Ma’kadami tu Firaun lako siulu’na Yusuf nakua: Apara tu pandakarammi? Nakuami tu tau iato mai lako Firaun: Iatu kami sola nasang to manglaa dombakan sia bembe’ la kami la to doloki.

⁴Sia nakua polepa tu tau iato mai lako Firaun: Iate kami saekanni la mentiruran lan te tondok, belanna tae’ tu inan la kinii umpakande dombaki sia bembe’ki, apa masang tu ra’pak padang dio tana Kanaan; totemo elorangkanni torro dio tana Gosyen.

⁵Ma’kadami tu Firaun lako Yusuf nakua: Iatu ambe’mu sola siulu’mu saemo lako kalemu,

⁶iate tana Mesir tiballa’ dio tingayomu; suai tu ambe’mu sia siulu’mu anna torro dio padang mandu malompo, kuanni natorro dio tana Gosyen. Iake muissanni kumua denni tu tau iato mai malute, suai umpangului to manglaa patuoangku.

⁷Nasolanni Yusuf tu Yakub, ambe’na, anna popangoloi lako Firaun; napassakkemi Yakub tu Firaun.

⁸Nakuami tu Firaun lako Yakub: Pirang taunmora dadimmi?

⁹Mebalimi tu Yakub lako Firaun: Iatu taun kamempueangku saratu’ tallungpulomo taunna. Sidi’mora naponno nasang kamasussan tu katuoangku, tae’ napada katuoanna to doloku tonna mempue.

¹⁰Napassakkemi Yakub tu Firaun anna messiman sun dio mai olona Firaun.

¹¹Nadulluammi inan Yusuf tu ambe’na sia mintu’ siulu’na, nabenni padang lan tana Mesir, padang mandu malompo, dio tana Rameses, susitu napokadanna Firaun.

¹²Napakaduttu’i kande Yusuf tu ambe’na sia mintu’ siulu’na sia mintu’ to lan banuanna ambe’na sia lako pia’-pia’na.

¹³Tae’mi kande lan mintu’ lili’na tana Mesir belanna masang tongan tu ra’pak padang, naurunganni mandasa tu mintu’ pa’tondokan lan tana Mesir sia dio tana Kanaan, napobua’ ra’pak padang.

¹⁴Anna popa’misai Yusuf tu mintu’ doi’ lan tana Mesir sia lan tana Kanaan, tu doi’ pamaya’ gandung tu naalli tau iato mai, nabaai tama tongkonan layukna Firaun tu mintu’ doi’ iato.

¹⁵Iatonna makalima’ nasangmo tu doi’ lan tana Mesir sia lan tana Kanaan, saemi tu mintu’ to Mesir mennolo dio Yusuf nama’kada nakua: O puang, benkanni dikka’ kande, matumbai angki la mate dio olomi, belanna makalima’ nasangmo tu doi’!

¹⁶Mebalimi Yusuf: Baai tu patuoammi, angku benkomi gandung, sondana tu patuoammi, ke tae’mi tu doi’.

¹⁷Nabaami tau iato mai tu patuoanna lako Yusuf anna benni kande Yusuf tu tau iato mai sonda darang sia sonda domba sia bembe’ sia sapi sia keledai; napadenanni kande tu tau iato mai to taun iato diona mintu’ patuoanna.

¹⁸Iatonna puramo tu taun iato, tonna taun pole, saemi tu tau iato mai lako kalena ma’kada nakua: Tae’mo angki la umbuniangkomi, tu tae’mo doi’ sia mintu’ patuoangki sia iatu mintu’ kilaainna mipoapa dukamo, moi misa’ tae’mo mitiro, sangadinnamira batang kaleki sia litakki sola nasang.

¹⁹Matumbari ammi la untiro-tirokanni mate, la kami, la litakki; allii kande tu batang kaleki sia litakki anna poapai Firaun tu kaleki sola litakki; sia benkanni banne angki tuo sola nasang da kimate, sia da natalo tu litakki.

²⁰Susimoto nanii Yusuf unnallianni Firaun tu mintu’ tana Mesir, belanna pantan nabaluk to Mesir tu litakna, apa masang tongan tu ra’pak padang urrampoi tau iato mai: Susimito tu padang anna poapai Firaun.

²¹Susimoto napokaunanmi tu mintu’na pa’tondokan randuk dio mai tampakna tana Mesir sae lako tampak sangbalinna pole.

²²Ia mannamo tu litakna mintu’ to minaa tu tang naalli, belanna unnappa’ taana dio mai Firaun, sia ia nakande tu taana, tu nabenni Firaun; iamoto anna tae’ nabalukanni tu litakna.

²³Attu iato ma’kadami Yusuf lako to ma’tondok nakua: Totemo mangka kuallian Firaun tu batang kalemi sia litakmi; tiromi: indemo tu banne ammi ambo’i tu pa’lakmi.

²⁴Iatu burana la mipennoloan lako Firaun tu taa limanna, anna iatu patang taanna la mibannean pa’lakmi sia la mikande sola mintu’ to lan banuammi sia la nakande mintu’ anakmi.

²⁵Ma’kadami tu tau nakua: Mipatuomokan, puang; katuru-turuipakan, puang, napokaunanmorakan Firaun sola nasang.

²⁶Napantokmi Yusuf lan mintu’ lili’na tana Mesir tu atoran sae lako totemo, kumua taa limanna napotaa Firaun, sangadinna ia manna tu litakna mintu’ to minaa tu tae’ na la umpoapai Firaun.

²⁷Torromi tu Israel dio tana Mesir, lan padang Gosyen, napoapai tu apa lan sia membati’ sia memba’ka’ kalle-kallean.

²⁸Iatu Yakub sangpulo pitu taunna torro dio tana Mesir, naurunganni mendadi saratu’ patangpulo mpitu taunna tuo.

²⁹Iatonna la madomi’ mate tu Israel, natambaimi tu Yusuf, anna ma’kada lako, nakua: Iake mupakaboro’na’, padiongi to’ garonto’ pupungku tu limammu sia pogau’ko kameloan sia kamarurusan lako kaleku, sia da mupeliang indena’ Mesir.

³⁰Sangadinna peliangna’ sola to doloku, la musolanna’ sun lan mai tana Mesir sia patamana’ liangna tau iato mai. Mebalimi tu Yusuf nakua: La kupogau’ susitu kadammi.

³¹Nakuami: Palaoko sumpa lako kaleku. Massumpami lako. Tukkumi tu Israel dio to’ pennuluanna.