Read Toraja-Sa'dan KADADIAN 48 Bible Online

KADADIAN 48 - Toraja-Sa'dan bible

KADADIAN 48

¹Undinnato napokadami tau lako Yusuf kumua: Iatu ambe’mi masaki. Nasolan duami Yusuf tu anakna, Manasye na Efraim.

²Napokadami tau lako Yakub kumua: Iatu anakmi Yusuf sae ussitiroangkomi. Naparukumi Israel tu kalena, anna unno’ko’ dao kamammaranna.

³Nama’kada tu Yakub lako Yusuf nakua: Iatu Puang Matua tu Umpoissan angge maritik mangka sombo lako kaleku dio Lus, lili’ tana Kanaan sia Napassakkena’.

⁴Nakua ma’kada lako kaleku: La Kupopembati’ko sia la Kupopemba’ka’ko sia la Kupagaronto’nako ba’tu pira-pira bangsa sia tana iate la Kuba’gian bati’ undimmu napomana’ tontong sae lakona.

⁵Totemo iatu anakmu sola duai tu Efraim sola Manasye, tu dadi inde tondok Mesir kumane sae inde Mesir, anakku to pada Ruben na Simeon.

⁶Apa iatu bati’mu tu muappa’ undi na iate tau da’dua, anakmu iko to, la umposanga sanganna siulu’na lan taan mana’.

⁷Iatongku sae dio mai Padan mate diomi kaleku tu Rahel lan tana Kanaan dio tangnga lalan, tonna la madomi’mo rampo lako Efrata, kupeliangmi inde to dio lalan lu lako Efrata, iamo Betlehem.

⁸Ta’kala natiromi Israel tu anakna Yusuf anna ma’kada nakua: Mindara tau te?

⁹Nakuami tu Yusuf lako ambe’na: Iamora anakku te, tu Nakamaseanna’ Puang Matua inde mai. Ma’kadami nakua: Solanni mai sola duai angku passakkei.

¹⁰Iatu matanna Israel patomali maraunmo belanna kamatuanna, naurunganni tae’mo namano’ra. Napopentireke’mi lako sola duai anna udungi sia naraka’.

¹¹Nakuami tu Israel lako Yusuf: Tae’ bangmo angku sangai la kutiroopoko, apa Napatiroan pole’omo’ Puang Matua tu bati’mu!

¹²Napasoro’mi Yusuf sola duai dio mai guntu’na anna tukku sae rokko padang tu lindona.

¹³Naalami Yusuf sola duai, iatu Efraim lima kananna untoei dio kairinna Israel, na iatu Manasye lima kairinna untoei dio kananna Israel anna popentireke’i sola duai lako.

¹⁴Nae’te’mi Israel tu lima kananna naremme’i tu ulunna Efraim moi na ia tampak, na iatu ulunna Manasye naremme’ lima kairinna; tonna pogau’i napasitambenan tu limanna moi na Manasye tu pa’bunga’.

¹⁵Napassakkemi Israel tu Yusuf, nakua: Iatu Puang Matua tu Naniimo lolang to doloku Abraham na Ishak tu oloNa, iamo Kapenomban ungkambi’na’ randuk dio mai dadingku sae lako te allo totemo,

¹⁶iato Malaeka’ urrampananna’ dio mai sanda kadake Ia dukamora umpamasakkei sola duai tu pia, anna disa’bu’ tu sangangku dio te tau iate sia sanganna to doloku Abraham sola Ishak, sia anna memba’ka’ kalle-kallean te tau sola duai lan kuli’na padang!

¹⁷Iatonna tiroi Yusuf tu ambe’na lima kananna napadao to’ ulunna Efraim, tae’mi namelo nasanga penaanna, anna toei tu limanna ambe’na la napalele dao mai to’ ulunna Efraim lako to’ ulunna Manasye.

¹⁸Ma’kadami tu Yusuf lako ambe’na nakua: Da nasusi to, ambe’, belanna ia iate tu pa’bunga’, iatu lima kananmi mipadao ulunna.

¹⁹Apa noka tu ambe’na sia nakua: Kuissan sia, e anakku, kuissan sia; la mendadi duka ia misa’ bangsa sia la kapua duka, apa ia duka tu adinna la mandu kapua na ia sia iatu bati’na la mendadi misa’ bangsa tepu.

²⁰Napassakkemi sola duai to allo iato, nakua: Sangammi la nasa’bu’ to Israel sipalakuan kamauparan nakua: Puang Matuamora umpasusikomi Efraim sia susi Manasye! Napalosong Yakub tu Efraim na Manasye!

²¹Mangkato ma’kadami tu Israel lako Yusuf nakua: Mandappi’mo tu lampakku, apa Puang Matua la urrondongkomi sia Ia duka la ussolangkomi sule tama tondok to dolomi.

²²Kubenmoko sanglontok padang umborong, iamo mulosongi to na iatu mai taana mintu’ siulu’mu, iamotu kurampa la’bo’ku sia panaku dio mai to Amori.