Read Toraja-Sa'dan KADADIAN 49 Bible Online

KADADIAN 49 - Toraja-Sa'dan bible

KADADIAN 49

¹Undinnato natambaimi Yakub tu mintu’ anakna nakua: Sirampunkomi la kupokadangkomi tu apa la urrampoikomi undinna.

²Ma’misakomi ammi patanan talingammi, e to nadadian Yakub, patananni talinga tu kadanna Israel, mendadiammi.

³E Ruben ikomo bunga’ matangku, kamawatangangku sia bunga’ kamatotorangku, tu tompo’ kamala’biranna sia kamawatanganna.

⁴Ta’dulu’ bang susi uai mandirri’ tae’mo na iko tu la tompo’, belanna mulosa’ tu randan dali’na mendadiammu, sia muruttakkimo, mukendekki tu dali’ patindoangku.

⁵Iatu Simeon sola Lewi to massiulu’ iatu pa’dangna oongan mebala’-bala’.

⁶Tae’ natamai deatangku tu bisaranna, sia tang sipatu penaangku tu kombonganna. Belanna re’dek ara’na umpatei tau, sia ta’dulu’ ungkattuang sapi laki.

⁷Tampak ropu tu kasengkeanna, belanna napukan ara’na, sia kare’dekanna ara’na, belanna masa’ga’. La kupopentialla’ lan lu mintu’ bati’na Yakub sia la kupasisarak-sarak lan lu to Israel.

⁸Na iatu iko, e! Yehuda, la napudiko, mintu’ siulu’mu, iatu limammu unti’tin sokkongna mintu’ ualimmu, sia mintu’ to nadadian ambe’mu la tunduk lako kalemu.

⁹Iatu Yehuda butung anak singa; ke mangkamoko mangrampa, e anakku, kendekmoko langngan sule. Kumuku sia mamma’ susi singa, sia susi singa birang: mindara la untundanni!

¹⁰Iatu tekken kapayungan tae’ anna la tileluk dio mai Yehuda, sia iatu ta’ba kaparentan tae’ natiberu dio mai to’ lentekna. Sae lako saena tu Silo, na lako kalena nanii mengkaola mintu’ bangsa.

¹¹Iatu keledai manguranna nasangkin dio to’ garonto’ anggoro’ sia iatu anak keledai birangna nasangkin dio to’ garonto’ anggoro’ mandu melo. Anna busukki tamangkalena tama to’ uai anggoro’, sia iatu bayu lamba’na tama to’ rara anggoro’.

¹²Iatu matanna mandu mararang anna uai anggoro’ sia iatu isinna mandu mabusa anna bumbungan.

¹³Iatu Zebulon la torro dio biring tasik, dio biring tasik nanii kappala’, sia umpopollo’ Sidon.

¹⁴Iatu Isakhar butung misa’ keledai mawatang, tu la mamma’ lan alla’na da’dua bontong.

¹⁵Ianna tiromi tu kamanamanan melo lan tondok, sia marampa’ tu padang, napatadomi tu palempengna la mamaa, anna mengkanorong sia ma’dua’ lako tau.

¹⁶Iatu Dan la urrengnge’ sukunna, pada tu misa’ suku senga’na Israel.

¹⁷Iatu Dan susi ula’ dio batatta, susi ula’ rakke’ dio lalan. Tu untotokki kambutu’ darang, naurungan tobang sumpandan tu to ussakei.

¹⁸Umpeagina’ kamakarimmanan tu bu’tu dio mai Kalemi, o PUANG!

¹⁹Na iatu Gad la nalaoi ba’tu pirang tuntunan uali, apa undinna la naula’sule!

²⁰Iatu Asyer la malompo tu barokona, ia umpabu’tu kande mammi’, tu kande kandean datu.

²¹Iatu Naftali butung misa’ donga birang malinta’, tu umpalolong minna’ kada.

²²Iatu Yusuf butung misa’ kayu parabua, misa’ kayu parabua tuo dio randan kalimbuang, na iatu mai tangkena mendolok ulleanni tembo’ malangka’.

²³Lendu’ naranding-randingna to ma’pana sia natumbui pana sia nalaoi.

²⁴Apa iatu panana tontong duka matoto’, sia iatu takia’na sia limanna matimpan duka, tete dio limanNa To patunduan matoto’na Yakub, tete dio To pakambi’na tu To napobuntu batu Israel;

²⁵Kapenombanna mendadiammu, tu la untunduiko, Kapenomban Umpoissan angge maritik, tu la umpamasakkeko rongko’ dao mai langi’ sia rongko’ kalimbuang lu diong mai posi’na padang, sia rongko’ lolo tau na tedong.

²⁶Iatu pa’passakkena mendadiammu undaoanni mintu’ rongko’ nabaa mintu’ buntu sipuli padang, sanda maelo nabaa tanete sangkarapoi tana; tu la unta’pai botto ulunna Yusuf, sia la toppo’ dao passaronganna tu to dipilei langsa’ dio mai mintu’ sile’to lolona!

²⁷Iatu Benyamin susi guruk ma’kase’bu-se’bu! Ianna melambi’ ungkande bu’tu rangka’na, ianna makaroen untaa-taa pealanna.

²⁸Iamorate tu sangpulo dua rapunna Israel sia iamorate tu napokada ambe’na tu diona torro ke’de’na tonna pada umpassakkei sitinaya rongko’ simisa’-misa’na.

²⁹Mangkato napasanammi tau iato mai, nakua: Iatu aku te la dipasisolana’ rapungku, peliangna’ dio inanna nene’ku lan lo’ko tu dio padangna Efron, to Het,

³⁰iamotu lan lo’ko dio padang Makhpela sitingoan Mamre dio tana Kanaan, tu naalli Abraham, lako Efron to Het la dipoliang mana’.

³¹Indemoto dinii umpeliangi tu Abraham sola Sara, bainena; inde dukato dinii umpeliangi tu Ishak sola Ribka sia inde duka sia to kunii umpeliang Lea.

³²Iatu padang iato sola lo’ko’ lan, mangkamo dialli lako bati’na to Het.

³³Iatonna mangkamo tu Yakub umpakare’nai tu mai anakna, nabenan duami tu lentekna sule langngan inan mamma’na nasisarak angin dipudukna anna dipatama batu dilobang dipasola rapunna.