Read Toraja-Sa'dan KADADIAN 50 Bible Online

KADADIAN 50 - Toraja-Sa'dan bible

KADADIAN 50

¹Bambangmi tu Yusuf rokko to’ lindona ambe’na anna batingi sia naudung.

²Nasuami Yusuf tu mintu’ taunna tu ma’dampinna umbangki’i batang rabukna ambe’na; napalakoimi pebangki’ mintu’ to ma’dampi tu batang rabukna Israel.

³Patangpulo allona nanii ungkasara’i, belanna susimoto namane sundun tu mintu’ allona to dibangki’. Na mintu’ to Mesir ma’barata pitungpulo allona.

⁴Iatonna tilendokmo tu kapa’baratan, ma’kadami tu Yusuf lako to lan tongkonan layukna Firaun nakua: Iake mitiroan siana’, parampoanni Firaun te kadangku:

⁵Mangkamo’ napopassumpa ambe’ku nakua: Tiromo’ la matemo’ te, da mutang umpatamana’ liangku tu mangka kupa’ dio tana Kanaan, na totemo eloranna’ male langngan, angku peliangi tu ambe’ku, kumane sule.

⁶Ma’kadami tu Firaun nakua: Langnganmoko mupeliangi tu ambe’mu susitu kanasuammumo massumpa.

⁷Susito malemi tu Yusuf langngan la umpeliang ambe’na na mintu’ to naala parea Firaun male langngan sola, iamotu mintu’ parea mase’pon lan tongkonan layukna sia mintu’ pekaamberan lan tondok Mesir.

⁸Sia mintu’ to lan banuanna Yusuf sia mintu’ siulu’na Yusuf sia mintu’ to lan banuanna ambe’na, ia mannamo tu anak bitti’na sia mintu’ dombana sia bembe’na sia sapinna tu napatorro lan tondok Gosyen.

⁹Ke’de’mi langngan naturu’ ba’tu sangapa kareta sia to ma’pakkanarang, lendu’ budanna tu to ma’baananni.

¹⁰Rampomi sola nasangi lako Panglulluran gandung dirompo pundanga lamban lianna salu Yordan na inde to nanii siorronan umbating, napa’baratammi Yusuf pitung allo tu ambe’na.

¹¹Iatonna tiroi to Kanaan umpa’tondokki padang iato tu kapa’baratan dio Panglulluran gandung dirompo pundanga, nakuami ma’kada: Iamote tu kapa’baratan to Mesir. Iamoto nasangai Abel-Misraim lamban lianna Yordan.

¹²Napogau’mi anakna Israel lako ambe’na susitu mangka napasananni.

¹³Nabaami anakna tu batang rabukna lako tana Kanaan anna peliangi dio lan lo’ko’ dio padang Makhpela sitingoan Mamre tu naalli Abraham lako Efron to Het dipoliang mana’.

¹⁴Iatonna mangkamo umpeliangi tu ambe’na sulemi tu Yusuf rokko Mesir sola mintu’ siulu’na sia mintu’ to nasolan langngan umpeliang ambe’na.

¹⁵Iatonna tiromi siulu’na Yusuf iatu ambe’na matemo, sipa’kadami kumua: Umbai nakabiri’miki’ Yusuf sia napakkanni tu mintu’ kakadakean mangka tagauranni!

¹⁶Iamoto nasuai tu tau umpokadanni Yusuf kumua: Iatonna tae’pa namate tu ambe’mi, mangka mepasan nakua:

¹⁷Susite la mipokada lako Yusuf: Pagarri’i tu kapatodo-tintinganna mintu’ siulu’mi sia kasalanna, belanna mangkamo bulituk lako kalemi! Apa totemo pagarri’mi tu salana taunNa Kapenombanna ambe’mi! Tumangi’mi tu Yusuf tonna pokadanni lako te.

¹⁸Undinna sae dukami tu mintu’ siulu’na tukku mennolo dio olona anna ma’kada nakua: Iate kami sola nasang kaunanmimokan!

¹⁹Ma’kadami tu Yusuf lako nakua: Da mimataku’, sondanara’ka Puang Matua?

²⁰Tonganna kumua midakarammo’ kadake, apa Nadakaran kameloan Puang Matua la umpabu’tui tu susinna te totemo, tu la umpatuo misa’ bangsa kapua.

²¹Na totemo da mimataku’, belanna la kukaduttu’komi sola mintu’ anakmi. Susimoto tu napakatananni Yusuf sia naparapasanni tu penaanna.

²²Torromi tu Yusuf lan tana Mesir sola mintu’ to lan banuanna ambe’na; iatu Yusuf saratu’ sangpulo taunna tuo.

²³Natiropa Yusuf tu bati’na Efraim sae lako anakna tu mai bati’ ma’tallung papa’na; sia iatonna dadimo tu mai anakna Makhir, anakna Manasye dadi rokko to’ rianna Yusuf.

²⁴Ma’kadami Yusuf lako mintu’ siulu’na nakua: La matemo’, apa manassa la Nakamaseikomi Puang Matua sia Natassu’ikomi sun lan mai tondok iate anna solangkomi langngan to tana Naallu’ lako Abraham, Ishak na Yakub Napandanni sumpa.

²⁵Nasuami Yusuf sumpa tu bati’na Israel nakua: Manassa la Nakamaseikomi Puang Matua, attu iato da mitang umbaai sun tu batang rabukku!

²⁶Matemi tu Yusuf tonna saratu’ sangpulomo taun dadinna, nabangki’mi tau anna dipatama patti dio tana Mesir.