Read Toraja-Sa'dan KADADIAN 6 Bible Online

KADADIAN 6 - Toraja-Sa'dan bible

KADADIAN 6

¹Iatonna sakerangngan-rangngannamo tu bilanganna tolino lan telino sia budamo pia baine nadadian,

²natiromi anak Puang Matua tu baine bati’ tolino, kumua melo tu pantarisanna, anna pobainei minda-minda tu naala penaanna.

³Ma’kadami tu PUANG: Iatu PenaangKu tae’ na la tontong bang lan kale tolino, belanna patengkan sia inang pa’kalean siamo; la saratu’ duangpulomora taunna tempona tu tolino!

⁴Attu iato den tu tau lan lino kalando kapua naundinnato, tonna rampeimi anak Puang Matua tu baine bati’ tolino, napadadiammi bati’: iamote tu lalong sia kalelean tu sanganna tonna lino dolo.

⁵Natiro PUANG tu kakadakeanna tolino lendu’ tongan kapuana, sia tontong bang kelok tu karangan inaanna;

⁶menassanmi tu PUANG, belanna mangka umpadadi tolino untongkonni kuli’na padang sia iamoto tu umpatu’pe penaanNa.

⁷Ma’kadami tu PUANG kumua: la Kusabu’i lan mai lino tu tolino mangka Kupadadi, la tolino la patuoan sia olo’-olo’ mendonglo’, sia manuk-manuk dao lu langi’ belanna menassanMo’ mangka ungkombongi tu mintu’iannato.

⁸Apa iatu Nuh dikamasei dio mai oloNa PUANG.

⁹Iamote tu ulelean diona Nuh. Iatu Nuh misa’ to malambu’ penaanna sia tae’ sayuanna dio mintu’na tau attu iato, na iatu Nuh la’ka’ bang lako Puang Matua.

¹⁰Undadiammi tallu pia muane tu Nuh, iamo Sem, Ham na Yafet.

¹¹Na iatu lino kadake liumo dio oloNa Puang Matua sia ponnomo kamasa’garan te lino.

¹²Natiromi Puang Matua te lino, tonganna kadake liumo, belanna mintu’ kepenaanna umbala’-bala’mo lalanna lan te lino.

¹³Iamoto anNa ma’kada tu Puang Matua lako Nuh kumua: Nalambi’mo tu ma’katampakanna mintu’ tolino situru’ pangra’ta’Ku, belanna ia te lino naponnoimo kamasa’garan. Tonganna la Kusabu’i tu tau iato mai sola te lino!

¹⁴Garagako misa’ lembang kayu gopiri; la musapa’-sapa’ sia la mupi’da’ tu lanna lu sia salianna.

¹⁵La mugaraga susite: iatu lambe’na talluratu’ siku, na iatu babana limangpulo siku na likunna tallungpulo siku.

¹⁶La mupapai tu lembang, iatu (rinding) lembang dipasae langngan anggenna sangsiku dao mai papa sia ba’ba lembang iato la mupadio sa’dena, la mugaraga tu sapa’ diongna lu sia ma’penduanna na ma’pentallunna.

¹⁷Tonganna la kupasae tu uai saba’ lan te lino la ussabu’i mintu’ angge menaa nasambo langi’ sia mintu’na apa lan lino la sisarak angin dipudukna.

¹⁸Apa iatu ikona, la Kutananangko basseKu; la mentamako lembang iato, iko sola repokmu sia iatu mai bainena anakmu sola iko.

¹⁹Iatu mintu’ kepenaanna iamotu mintu’ angge menono’ sida’dua, misa’ laki na misa’ birang la mupatama lembang la dikarimmanni tu sunga’na sola iko.

²⁰Iatu mintu’ manuk-manuk situru’ a’ganna na mintu’ patuoan situru’ a’ganna na mintu’ olo’-olo’ mendonglo’ dao kuli’na padang situru’ a’ganna sida’dua ke sangrupaoi la sae lako kalemu.

²¹Na iatu iko, alai tu mintu’ kande ma’dinna dikande, rampunni, ammi potuoi sia mintu’i sola nasang.

²²Napogau’mi Nuh tu mintu’ apa Napasan Puang Matua lako kalena, susimoto napogau’.