Read Toraja-Sa'dan KADADIAN 7 Bible Online

KADADIAN 7 - Toraja-Sa'dan bible

KADADIAN 7

¹Undinnato ma’kadami PUANG lako Nuh Nakua: Tamamoko lembang sola mintu’ to lan banuammu, belanna ikomo tu Kutiro malambu’ dio oloKu tu mintu’na tau attu iate.

²Dio mai mintu’ olo’-olo’ tang dipemalianna la muala sipitu rundun bali, misa’ laki na misa’ birang, apa dio mai mintu’ olo’-olo’ dipemalianna da’duari, misa’ laki na misa’ birang.

³Sia dio mai manuk-manuk dao lu langi’ sipitu rundun bali misa’ londong na misa’ birang, la umpatumale’ bati’ lan mintu’na lino.

⁴Belanna pitung allopa angKu pasae uran tama lino patangpulo allona patangpulo bonginna, na mintu’ angge menono’ tu mangka Kupadadi la Kusabu’i lan mai lino.

⁵Napogau’mi Nuh tu mintu’ apa Napasan PUANG lako kalena.

⁶Iatu Nuh annanratu’mo taunna dadinna tonna sae tama lino tu uai saba’.

⁷Iatu Nuh sola repokna, sia iatu mai bainena anakna mentamami lembang umpallaian kalena dio mai uai saba’.

⁸Dio mai mintu’na olo’-olo’ tang dipemalianna sia dipemalianna sia mintu’ manuk-manuk sia mintu’ olo’-olo’ mendonglo’ dao kuli’na padang,

⁹sae rundun bali, ke sangrupaoi, lako Nuh mentama lembang, misa’ lakinna misa’ birangna, susitu kadanNa Puang Matua lako Nuh.

¹⁰Tonna lendu’mo pitung allo, saemi tu uai saba’ tama lino.

¹¹Iamo tonna annanratu’mo taunna dadinna tu Nuh, tonna bulan ma’penduan, allo ma’pessangpulo pitunna, allo ia dukato mintu’ kalimbuang lan posi’na tana kumala’dak anna mintu’ mata kalimbuang dao langi’ tibungka’ duka.

¹²Saemi tu uran kamban tama lino patangpulo allona patangpulo bonginna.

¹³Allo ia dukamoto anna tama lembang tu Nuh na Sem, Ham na Yafet, anakna Nuh sia bainena Nuh anna bainena anakna sola tallui.

¹⁴Iatu tau iato mai sola mintu’ olo’-olo’ marira situru’ a’ganna sia mintu’ patuoan situru’ a’ganna sia mintu’ olo’-olo’ mendonglo’ lan lino situru’ a’ganna sia mintu’ manuk-manuk situru’ a’ganna, mintu’ manuk-manuk pantan laen pani’na.

¹⁵Dio mai mintu’na pa’padadi kepenaa sia menono’ sae rundun bali tama lembang lako Nuh.

¹⁶Iatu mintu’nato sae situang laki situang birang dio mai mintu’ pa’padadi susitu Napokadanna Puang Matua lako Nuh. Namane untutu’i PUANG tu lembang.

¹⁷Iatu uai saba’ patangpulo allona lan lino, anna sakendek-kendekna tu uai, anna aanganni tu lembang diong mai padang.

¹⁸Sakapua-puanami tu uai sia sakendek-kendeknamo lan lino, anna unnaang-aang tu lembang dao uai.

¹⁹Iatu uai sakapua-puana lan lino, naurunganni mintu’ buntu malangka’ nasambo langi’ naleanni.

²⁰Sangpulo limapa sikunna langngan tu uai, tonna leannimi tu mintu’ buntu.

²¹Namintu’ pa’padadi tu menono’ lan lino ka’tu sunga’na, la mintu’na manuk-manuk la mintu’na patuoan, la mintu’ olo’-olo’ marira sia mintu’ olo’-olo’ mendonglo’ lan lino sia mintu’ dukato lino.

²²Mintu’ pa’padadi dao kapadanganna tu denna penaa napotuo lan illongna mate.

²³Susimo lalanna dinii ummangsanni tu angge menono’ lan te lino, la tolino, la patuoan sia mintu’ olo’-olo’ mendonglo’ sia mintu’ manuk-manuk dao lu langi’; mintu’nato dimangsanni lan mai lino, Nuh manna tu tuo sola mintu’ to nasolan lan lembang.

²⁴Saratu’ limangpulo allona tu uai ponno lan lino.