Read Toraja-Sa'dan KADADIAN 8 Bible Online

KADADIAN 8 - Toraja-Sa'dan bible

KADADIAN 8

¹Nasusito Nakilalaimi Puang Matua tu Nuh sia mintu’ olo’-olo’ marira sia mintu’ patuoan tu nasolan lan lembang; Napopangiri’i Puang Matua tu angin lan lino, namere tu uai.

²Namintu’ kalimbuang lan posi’na tana sia mintu’ mata kalimbuang dao langi’ titutu’, sia iatu uran kamban dao mai langi’ mari’.

³Iatu uai lolong pela’mi sule lan mai lino; na iatonna ganna’mo saratu’ limangpulo allona randukmi mere.

⁴Iatonna bulan ma’pempitu sia allo ma’pessangpulo pitu bulan iato, sampemi tu lembang iato dao buntu Ararat.

⁵Iatu uai tontong samere-merena sae lako bulan sangpulo: iatonna bulan sangpulo allo bunga’na bulan iato, payanmi tu mintu’ botto tanete.

⁶Undinna tonna patangpulomo allona, nabungka’mi Nuh tu pentiroan lembang, tu mangka nagaraga.

⁷Narampananmi tu misa’ kaduaya male anna mentia’ messulesulean sae lako marangkena tu lino.

⁸Undinnato narampananmi tu misa’ bu’ku’, la nanii untiroi kumua ba’tu la mere liumi tu uai lan mai lino.

⁹Apa iatu bu’ku’ tae’ inan la nanii ta’pa; sulemi lako Nuh lan lembang, belanna budapa tu uai lan mintu’ lino. Nakorongi Nuh, napatamai lembang sule.

¹⁰Ma’peagi pole’mi tu Nuh pitung allo, namane urrampanan pole’i tu bu’ku’ iato lan mai lembang.

¹¹Suleomi tu bu’ku’ iato tonna makaroen. Denmi dio tillokna tu sanglamba’ daun sa’pek natotokki dio mai garonto’ saitun, iamoto anna issanni Nuh kumua meremo tu uai lan mai lino.

¹²Ma’peagiomi pitung allo pole’, undinna narampananomi tu bu’ku’ iato, apa tae’mo anna sule lako Nuh.

¹³Tonna taun annan ratu’na mmisa, bulan ma’pamula, tonna allo bunga’na bulan iato, meremi tu uai lan mai lino; natimbakmi Nuh tu papa lembang, natiroi kumua tonganna marangkemo tu lino.

¹⁴Iatonna bulan ma’penduan allo ma’duangpulo mpitu mamarami tu kapadanganna.

¹⁵Ma’kadami tu Puang Matua lako Nuh Nakua:

¹⁶Tassu’moko lan mai lembang, la iko, la repokmu sia iatu mai bainena anakmu.

¹⁷Sia la mupatassu’ duka tu mintu’ olo’-olo’ tu musolan, tu mintu’na pa’padadi, iamotu manuk-manuk sia patuoan sia mintu’ olo’-olo’ mendonglo’ lan lino, anna tumale’ sia membati’ kalle-kallean lan lino sia samemba’ka’-ba’ka’na lan lino.

¹⁸Ta’kala tassu’mi tu Nuh sia mintu’ tu repokna sia iatu mai bainena anakna.

¹⁹Namintu’ olo’-olo’ marira sia mintu’ mendonglo’na sia mintu’ manuk-manuk sia mintu’ tu sikedoanna lan lino, pantan umporupa rupanna, tassu’ lan mai lembang.

²⁰Nagaragami Nuh tu misa’ inan pemalaran nanii memala’ lako PUANG, anna alai dio mai mintu’ patuoan tang dipemalianna sia manuk-manuk tang dipemalianna anna pemalaran pantunu pu’pu’ dao inan pemalaran iato.

²¹Kendekmi busarungngu’na langan PUANG, anNa ma’kada lan penaanNa, kumua: Tae’mo angKu la untampakki ropu tu lino diona tolino, belanna tempon dio mai bitti’na kelok tu karangan inaanna, sia tae’mo angKu sabu’i pole’i tu angge menono’, susitu mangkanna Kupogau’.

²²Iake tontongpi den tu lino, tae’mo anna la ka’tu tu pangamboran sia peparean, madingin na malassu, pealloan na palauran, allo na bongi!