Read Toraja-Sa'dan KADADIAN 9 Bible Online

KADADIAN 9 - Toraja-Sa'dan bible

KADADIAN 9

¹Napassakkemi Puang Matua tu Nuh sola tu mai anakna, anNa ma’kada lako Nakua: Membati’komi sia memba’ka’komi sia ponnoi tu lino.

²La mataku’ sia tiramban lako kalemi tu mintu’ olo’-olo’ lan lino sia mintu’ manuk-manuk dao langi’; anggenna mendonglo’na lan lino sia mintu’ bale lan tasik, mintu’nato Kusorong tama limammi.

³Mintu’na olo’-olo’ menono’, tu kepenaanna, iamo la kandemi, mintu’na Kuben nasangkomi, susi dukato tu mintu’ tananan maluna.

⁴Apa iatu duku’ sola sumanga’na iamotu rarana da mikandei.

⁵Tonganna tongan kumua iatu rarami la Kupembalaran, la Kupembalaran lako mintu’ olo’-olo’ sia lako duka tolino, lako mintu’ tolino la Kupembalaran rarana padanna tolino: la Kupembalaran tu sunga’na tolino.

⁶Minda-minda umpatibollo rara tolino, la napatibollo duka tolino tu rarana, belanna mangkamo Nakombong Puang Matua tu tolino Napasusi rupanNa.

⁷Apa iatu kamu la membati’komi sia ma’lelen batik lan lino sia memba’ka’komi lan!

⁸Ma’kadami Puang Matua lako Nuh sia lako tu mai anakna nasolan Nakua:

⁹Tonganna Akumo tu untanan basseKu lako kalemi sia lako lanto mimi’mi,

¹⁰sia mintu’ angge menono’ tu misolan, tu mai manuk-manuk na mintu’ patuoan sia mintu’ olo’-olo’ marira lan lino tu misolan, tu mintu’ olo’-olo’ lan lino tassu’ lan mai lembang.

¹¹Iamote tu basseKu Kutanan lako kalemi kumua, iatu mintu’ menaanna inang tae’mo anna la ussabu’i uai saba’ sia la tae’mo uai saba’ la ussanggangi lino.

¹²Ma’kada tu Puang Matua kumua: Iamote tu tanda tasikna basseKu, tu Kutanan lan tangngata patomali sia angge menaa tu misolanna landa’ lako disituran-turanni.

¹³Kupalanmo gaun tu tindak sariraKu, iamo la tanda tasikna basseKu lako lino.

¹⁴IangKu popa’lemunni tu gaun, napayan tu tindak sarira lan gaun,

¹⁵manassa Kukilalai tu basseKu mangka Kutanan lan tangngata patomali sia angge menaa tu menono’na, kumua inang tae’mo anna la saba’ tu uai la ussabu’i tu mintu’ angge menono’.

¹⁶Iake lanni gaun tu tindak sarira iamo Kutiro la Kunii ungkilalai basse matontongan, tu ditanan lan tangngaNa Puang Matua anna mintu’ menaanna tu menono’ lan lino.

¹⁷Ma’kadami tu Puang Matua lako Nuh kumua: Iamote tu basse mangka Kutanan Kusibassei mintu’ kepenaanna lan lino.

¹⁸Iatu mai anakna Nuh tu sun lan mai lembang, iamo Sem, Ham sia Yafet, anna iatu Ham iamotu ambe’na Kanaan.

¹⁹Iamora te tau sola tallui tu anakna Nuh sia tau iamora te mai tu nanii sun tau anna tumale’ lan mintu’ kuli’na padang.

²⁰Iatu Nuh lumbang dipadang anna randuk untanan anggoro’ sanginan pa’lak.

²¹Nairu’mi Nuh tu uai anggoro’ anna malango, mamma’mi tang ma’tamangkale lan tendana.

²²Natiromi Ham, ambe’na Kanaan tu kama’kambelanganna ambe’na anna lao umpokadanni siulu’na dio salian sola duai.

²³Naalami Sem sola Yafet tu sambu’ misa’ anna bassei dao mai palempengna, namemboko’ lumingka ussamboi tu kama’kambelanganna ambe’na, anna mentiro senga’, natae’ natiroi tu kama’kambelanganna ambe’na.

²⁴Ta’kala namangingaran tu Nuh naissanni tu gau’na anak bongsunna lako kalena.

²⁵Nakuami: Tampak ropu tu Kanaan; nake napokaunan tai manukki mintu’ siulu’na.

²⁶Sia nakuapa ma’kada tu Nuh: Mintu’na kapa’pudian lu langngan PUANG, tu Kapenombanna Sem, na iatu Kanaan la napokaunan!

²⁷Puang Matua la umpatumale’i tu Yafet anna torroi tu mai tendana Sem, na iatu Kanaan la napokaunan!

²⁸Talluratu’pa llimangpulo taunna tuo tu Nuh mangkanna sae tu uai saba’.

²⁹Iatu Nuh kasera ratu’na llimangpulo taunna, namane mate.