Read Toraja-Sa'dan 2 SAMUEL 13 Bible Online

2 SAMUEL 13 - Toraja-Sa'dan bible

2 SAMUEL 13

¹Mangkato dadimi tu iannate; iatu Absalom, anakna Daud, den adinna misa’ baine, me’lok pantarisanna, disanga Tamar; nakamoraimi Amnon, anakna muane Daud.

²Napomasussa Amnon tu kamasinnanna, naurunganni masaki, napobua’ Tamar, adinna, belanna anak darapa, iamoto anna masussa lan timbanganna Amnon la umpa’kadai.

³Apa iatu Amnon den sangmanena misa’, disanga Yonadab, anakna Simea, kakanna Daud; iatu Yonadab misa’ tau tarru’ malute.

⁴Ma’kadami lako Amnon, nakua: Ma’apai anna melambi’oi samadodong-dodongnako, datu lolo; tae’raka mula umpokadanna’? Mebalimi Amnon lako nakua: Masinnana’ lako Tamar, anak daranna Absalom, siulu’ku.

⁵Nakuami Yonadab lako: Melo ke mamma’ko dao patindoammu, muangga’i ma’masaki-saki; na iake saei ambe’mu unto’longiko la mukua lako: Suapi tu adingku Tamar sae dio mai umpakandena’ sia napasakkaranna’ kande dio oloku, angku tiroi sia anna pasuakna’.

⁶Mamma’mi tu Amnon ma’masaki-saki. Iatonna saemo datu unto’longi, nakuami Amnon lako datu: Suapi tu adingku Tamar mai nagaragampa’ deppa ba’tu pira-pira dio tingayoku, anna ia umpasuakna’.

⁷Nasuami Daud tu tau male umpokadanni Tamar lako tongkonan layuk, nakua: La maleko lako banuanna kakammu Amnon, ammu pasakkaranni kande.

⁸Malemi tu Tamar lako banuanna Amnon, kakanna, na iatu kakanna mamma’ dao patindoanna; naalai Tamar tu ta’pung dirandangi, nagerokki, nagaragai deppa dio tingayona, namane unggorengi.

⁹Naangka’imi tu pamuntu, napatassu’i tu deppa dio tingayona, apa manoka ungkandei. Nakuami Amnon: Suai tu mintu’ tau mallai dio mai tingayoku. Mallai nasangmi tu mintu’ tau dio mai tingayona.

¹⁰Nakuami Amnon lako Tamar: La mubaa tu kande iato tama bilik, ammu pasuakna’. Naalami Tamar tu deppa nagaragai, nabanni Amnon, kakanna, tama bilik.

¹¹Iatonna tadoanni, natoemi Amnon, anna ma’kada lako, nakua: Maleko mai, adingku, tasangampa’.

¹²Apa nabali nakua: Tae’ nasusito, e kakangku; da mupalaoi siri’ku, belanna tae’ nasielle’ tu penggauran susito dio lu to Israel; da napogau’i kakangku tu penggauran tang massipa’ iate.

¹³Belanna iate aku te, umba la kunii male umbaa siri’ku? Ondongpi kakangku kalena duka la dadi susi misa’ to tang massipa’ dio lu to Israel. Melo ke mupokadanni datu tu diongna penaammu, manassa tae’ nala undampai datu, ke mupobainena’.

¹⁴Apa manoka tu Amnon umperangii tu kadanna, sia belanna mandu matoto’ ia, napalaoi siri’na, anna toro’-bukui.

¹⁵Iatonna mangkato mandu liumi nakagi’gi’ Amnon, ondongpi undinna mandu liu tu kamagi’giranna lako na iatu kamoraianna dolona. Nakuami Amnon lako: Ke’de’moko, mumale!

¹⁶Ma’kadami Tamar lako diona tu kakadakean kapua iate, nakua: Iate kamusuangku male mandu kadake na iatu penggauran senga’ tu mangka mupogau’ lako kaleku. Apa tae’ namorai umperangii,

¹⁷sangadinna natambai tu taunna, tu ungkamayai, anna ma’kada, nakua: Patoyangi te baine iate dio mai kaleku sia salli’i ba’ba lako salian.

¹⁸Iatu Tamar ma’pakean maa’, belanna susimo ada’na tu mintu’ anakna baine datu, ke anak darapi, ma’pake bayu lando. Nasolammi to ma’kamayana Amnon lako salian, anna sali’i ba’ba lako.

¹⁹Napalangannimi barra’-barra’ Tamar tu ullunna sia naserek-serek tu bayu maa’na tu napake, anna pa’lullungi tu limanna, anna marassan sia male marassan sia unnurruk-urruk tumangi’.

²⁰Nakuami Absalom, kakanna lako: Narumburokoka Amnon, kakammu? Melo, ke rapa’i bangmi tu iannato, adingku. Iamo siulu’mu, da mutarru’ umpalan bangi penaammu tu ianna te. Malemi tu Tamar anna torro lan banuanna Absalom, kakanna susi misa’ to unnali’ kalena.

²¹Iatonna rangimi datu Daud te mintu’na te, re’dekmi tu ara’na.

²²Apa tae’mo napa’kadai Absalom tu Amnon la melona la kadakena, sangadinna nanannan randang Absalom tu Amnon, belanna napalao siri’na tu Tamar, adinna.

²³Den pissan tonna ganna’mo duang taun, denmi to ma’gonting bulu dombana Absalom dio Baal-Hazor, sikandappi’ Efraim, iamoto anna toratui Absalom tu mintu’ anakna datu.

²⁴Saemi tu Absalom mennolo lako datu, anna ma’kada nakua: Iate taummi den to ma’gonting bulu dombana; kupalaku anta male sola sia iatu mintu’ to mase’ponna puangku.

²⁵Apa nakua datu lako Absalom: Da nasusito, e anakku, da kilao nasang, kipamagasako manii. Nanaran-naranmi tu datu, apa inang manoka lao, sangadinna napassakke manna.

²⁶Nakuami Absalom: Iake tae’i mila lao, ia bangomo tu Amnon, kakangku kisolan male sola nasang. Nakuami datu lako: Apara gai’na la male?

²⁷Apa nanaran-naran Absalom tu datu, naurunganni naeloran tu Amnon male sola mintu’ anakna datu.

²⁸Nasuami Absalom tu taunna susite: Manta-manta meloi, iake parannu-rannumi penaanna Amnon napobua’ anggoro’, angku kuai lako kalemi: patei tu Amnon, manassa la mipatei; da mimataku’, belanna aku ussuakomi. Iamoto la umpabatta’komi penaammi sia baranikomi.

²⁹Napogau’mi taunna Absalom lako Amnon susitu nasuanni Absalom. Ta’kala ke’de’mi tu mintu’ anakna datu, anna mallai, pada ussakei bagala’na.

³⁰Dio bangsia lu lalan tu tau iato mai, narampomo tu kareba lako Daud, nakua: Napatei nasang Absalom tu mintu’ anakna datu; moi misa’ tae’mo torro.

³¹Ke’de’mi tu datu anna serek-serekki tu pakeanna, anna male mamma’ rokko padang, namintu’ tu taunna bendan serek-serek pakeanna.

³²Mebalimi Yonadab, anakna Simea, kakanna datu, nakua: Da misangai kumua mintu’ tu anakmi mangka dipatei, sangadinna Amnon manna misa-misa tu mate, belanna iatu iannato ma’din ditiro dio lindona Absalom randuk dio mai allo dinii umpalaoi siri’na tu Tamar, adinna.

³³Iamoto da napalan penaa bangi puangku datu tu iannato, kumua mate nasang tu anakmi, belanna Amnon manna tu mate.

³⁴Ta’kala mallaimi tu Absalom. Iatu to mangura ma’kampa tonna bangunanni tu matanna, natiromi tu tau buda unnola dio lalan dio boko’na, tu mempali’ dio sa’de buntu.

³⁵Nakuami Yonadab lako datu: Tiromi tu mintu’ anakna puangku sae; tongannamo susitu kadanna taummi ina’.

³⁶Ra’pa’ manna tu kadanna, ta’kala saemi tu mintu’ anakna datu, anna sianglean tumangi’; susi duka tu datu sia mintu’ taunna sianglean tumangi’.

³⁷Iatu Absalom mallaimo, ann male umpellambi’i Talmai, anakna Amihur, datu Gesur. Apa tontong ia napomasussa Daud kiallo-kiallo tu anakna.

³⁸Iatu Absalom tonna mallai lako Gesur torro dio tallung taun.

³⁹Bonnongmi tu penaanna Daud diona kamamaliranna lako Absalom, belanna umpakatanamo penaanna tu diona kamateanna Amnon.