Read Toraja-Sa'dan 2 SAMUEL 19 Bible Online

2 SAMUEL 19 - Toraja-Sa'dan bible

2 SAMUEL 19

¹Napokadami tau lako Yoab, nakua: Tontong bang tu datu umbatingi sia umpomasussai tu Absalom.

²Naurungan iatu kapataloan allo iato butung-butung to misa’ pa’pote dibolong lako to buda, belanna narangimo to buda tu kadanna tau nakua: Bonnong penaanna tu datu diona anakna.

³Iamoto, anna allo iato mintu’ surodadu tama buni kota, susito masiri’ mallai dio mai kasirarian.

⁴Umbungku’mi ulunna tu datu sia unnangle-angle, nakua: O anakku Absalom, Absalom, Absalom, anakku, anakku!

⁵Ta’kala saemi tu Yoab mennolo lako datu lan banua, anna ma’kada nakua: Mipakasiri’ tu mintu’ surodadummi tu untoe sunga’mi sia sunga’na mintu’ anakmi muane sia anakmi baine sia sunga’na mintu’ bainemi sia gundi’mi,

⁶apa mikamasei tu to ungkabiri’komi sia mikabiri’ tu to ungkamaseikomi. Belanna allo iate mipakanaan kumua iatu mintu’ kamandang sia surodadu moi misa’ tae’ patunna lako kalemi, ondongpi totemo kuissan, kumua, iakenna la tuopa tu Absalom, angki mate nasangmo kami te allo iate, manassa maneri tongan tu iannato dio pentiromi.

⁷Totemo la ke’de’komi ammi male lako salian sia ma’kada susitu naporai surodadummi. Belanna sumpamo’ tete dio PUANG, iake tae’i mitassu’, manassa moi misa’ tau tae’mo tu la torro sola puangku bongi iate; na kamatilakan iate la mandu pole’pa kapuanna lako puangku na iatu mintu’ kamatilakan, tu urrampoinnamo puangku randuk dio mai mangurammi sae lako te totemo te.

⁸Ke’de’mi tu datu anna male unnisung tama babangan kota. Napokadami tau lako surodadu, nakua: Malemo tu datu unnisung tama babangan. Saemi tu mintu’ surodadu mennolo lako datu. Apa iatu to Israel pantan mallai lako tendana.

⁹Site’genmi tu to buda sola nasangi dio lu mintu’ suku Israel, nakua: Mangkamoki’ narampanan datu dio mai limanna mintu’ ualinta sia nalendokammoki’ dio mai limanna to Filistin, natotemo mallai tu datu lan mai tondok nasau’ Absalom.

¹⁰Iatu Absalom, tu tatokko dadi datunta matemo lan kapararian. Totemo ma’apari ammi torropa tang untarimai sule tu datu.

¹¹Attu iato nasuami datu Daud tu Zadok na Abyatar, to minaa nakua: Pokadanni mintu’ pekaamberan Yehuda, kumua: Ma’apai anna kamu la ma’kaundianna untarima datu sule tama tongkonan layukna, — belanna iatu kadanna mintu’ to Israel rampomo lako datu sia lako mintu’ to lan tongkonan layukna datu — .

¹²Iatu kamu sola nasang siulu’ku sia sangrara sangbukungku, ma’apai anna kamu la ma’kaundianna untarima datu.

¹³Sia lako Amasa la mikua susite: Tang sangrara sangbukuraki’ka? Nasanggangimora’ Puang Matua sia la Narangnganni pole’pa, ke tae’i na iko dadi kamandang lompo dio oloku tontong sae lakona la ussonda Yoab.

¹⁴Susimo kanapopa’mirringannato tu penaanna mintu’ to Yehuda susimora to misa’ tau sia mesua tu tau iato mai lako datu nakua: Kipalaku ammi sule sola mintu’ taummi.

¹⁵Ta’kala sulemi tu datu anna rampo lako Yordan. Saemi tu mintu’ to Yehuda lako Gilgal untammui datu, la unnanta’i ullamban Yordan.

¹⁶Iatu Simei, anakna Gera, to Benyamin dio mai Bahurim madoi’ sae mengkaola sola mintu’ to Yehuda untammui datu Daud.

¹⁷Sia den duka sangsa’bu tau dio mai Benyamin nasolan, sia Ziba, taunna bati’na Saul sola mintu’ anakna muane sangpulo lima sia kaunanna duangpulo; anna rampo lako Yordan sambali’na lu datu.

¹⁸Lambanmi tu tau iato mai dio kalambanan, anna palambanni sambali’ mai tu mintu’ to lan tongkonan layukna datu sia napogau’ tu apa naala penaanna datu. Na iatu Simei, anakna Gera tukku menomba dio olona datu, tonna mane la lamban Yordan tu datu,

¹⁹anna ma’kada lako datu, nakua: Da dikka’ mipapassannina’ tu kakadakeangku sia da mikilalai tu salaku, tu kupogau’ tonna tassu’ tu puangku datu lan mai Yerusalem. Damo dikka’ napalan penaai puangku.

²⁰Belanna naissan melo kaunanmi, kumua kasalammo’, iamoto angku sae dolo na iatu mintu’ to lan banuanna Yusuf allo iate untammui puangku datu.

²¹Attu iato ma’kadami tu Abisai, anakna Zeruya, nakua: Ma’apari natang la dipateira tu Simei, belanna untampakki ropu to Natokko PUANG!

²²Apa nakua Daud: La siapariki’, e anakna Zeruya? Belanna allo iate dadikomi to umbalina’. Ma’apai anna la den misa’ tau dipatei allo iate dio lu to Israel. Belanna inang kuissan, kumua allo iate dadi pole’mo’ datu lako mintu’ to Israel.

²³Nakuami datu lako Simei: Tae’ mula dipatei. Umpalaomi sumpa tu datu lako.

²⁴Sae dukami Mefiboset, anakna datu Saul, untammui datu; tae’ nabasei lentekna sia tae’ nakaridi’ danggo’na sia tae’ nabusukki pakeanna randuk dio mai allo kamallaianna datu sae lako kasulean marampa’na.

²⁵Iatonna saemo untammui datu dio Yerusalem, ma’kadami datu lako nakua: Ma’apai ammu tang undi unnula’na’, Mefiboset?

²⁶Mebalimi nakua: O puangku datu napakenana’ taungku, belanna kutangnga’ lan penaangku, kumua: Moraina’ la dilapikan keledai, angku sakei male sola datu. Belanna inang to kupi’na’ dikka’.

²⁷Ondongpi narappo’ salana’ lako kalena puangku, apa puangku butung to misa’ malaeka’Na Puang Matua; pogau’mi tu apa misanga la melo.

²⁸Moi anna mintu’ rapunna ambe’ku ussangai, kumua to la napatei nasang puangku datu, natarima dukamo’ puangku tama bilanganna to kumande sola puangku. Apapara la kutuntun sia kupokada lako datu?

²⁹Apa ma’kada tu datu lako, nakua: Apapara gai’mu umpebudai kada? Susite tu kadangku: Pa’duai Ziba tu mintu’ pa’lak iato.

³⁰Nakuami tu Mefiboset lako datu, nakua: Da’ito naala nasangi, podo sule marampa’ siamo tu puangku datu tama tongkonan layukna.

³¹Ia duka tu Barzilai, to Gilead mengkalao dao mai Rogelim anna ullamban Yordan sola datu, la ussolan datu sae lian sangbalianna Yordan.

³²Iatu Barzilai tarru’ matuamo, iamo misa’ tau tu karuamo pulona taunna dadinna, ungkaritutui datu tonna torro tu datu dio Mahanaim, belanna iamo misa’ to sugi’ lallang.

³³Ma’kadami datu lako Barzilai, nakua: Melo ke mituru’na’ tamale sola, anta torro sola dio Yerusalem angku karitutuikomi.

³⁴Nakuami Barzilai lako datu: Sangapapira tu taun kadadiangku, angku la malera unturu’ datu lako Yerusalem?

³⁵Totemo karuamo’ pulona taunna, umbapa la kukua umpasisengaranni tu kadake anna melo? Umbapa la kukua umpemammi’i marasanna tu apa la kukande sia kuiru’? Umbapa la kukua urrangi tu gamaranna to menani muane sia baine? Apaopa gai’na la kupamagasa tu puangku, datu?

³⁶La lao mannara’ unnanta’ puangku sanglengko dilalan sambali’ Yordan sia ma’apai anna la umpakkan susiri puangku lako kaleku to?

³⁷Elorammo’ sule, angku mate lan tondokku sikandappi’ panglamunanna indo’ ambe’ku. Apa inde sia tu taummi Kimham, da’ito anna undi sola puangku, ammi tiroanni tu apa misanga melo.

³⁸Nakuami datu: Melo ke Kimham kusolanni tu, angku pogau’i lako kalena tu misanganna melo, anna apa tu melona tu mipalaku, manassa kupogau’ lako kalemi.

³⁹Iatonna mangka nasangmo tu mintu’ tau ullambanni Yordan sia mangka dukamo lamban tu datu, naudungmi datu tu Barzilai sia napalakuan kamarendengan, anna mane sule lako tondokna.

⁴⁰Tarru’mi tu datu lako Gilgal naundi tu Kimham urrundu’i tu datu. Namintu’ to Yehuda sia sesena to Israel mangkamo umpalamban datu.

⁴¹Ta’kala sae nasangmi tu mintu’ to Israel mennolo lako datu anna ma’kada nakua: Ma’apai tu mai siulu’ki, iamotu to Yehuda, anna umboko puangki sia unnanta’komi sia mintu’ to lan tongkonan layukmi sia mintu’ taunna Daud ullamban salu Yordan sola.

⁴²Mebalimi to Yehuda lako to Israel, nakua: Belanna iatu datu sangrara sangbukukan. Ma’apai miposengkei tu diona te? Napakanderakannika datu? Denraka saroki tu iannato?

⁴³Apa mebali tu to Israel lako to Yehuda, nakua: Pessangpulo losongki lako datu sia lako duka Daud na kamu. Ma’apari mitunairakanni? Tang sipaturakannika la umposara’i dolo tu kaumpasuleanna datungki? Apa iatu kadanna mintu’ to Yehuda mandu pasau’ na mintu’ to Israel.