Read Toraja-Sa'dan 2 SAMUEL 2 Bible Online

2 SAMUEL 2 - Toraja-Sa'dan bible

2 SAMUEL 2

¹Mangkato mekutanami tu Daud lako PUANG, nakua: Ma’dinra’ka ke’de’ inde te lako sala umbanna tondok Yehuda? Mebalimi PUANG lako, Nakua: Ke’de’moko. Nakuami Daud: Tondok umbara tu sipatu la kunii male? Nakuami PUANG: Lako Hebron.

²Mangkato ke’de’mi tu Daud lako sola tu bainena da’dua, iamotu Ahinoam, to Yizreel sia Abigail, tu pura bainena Nabal, to Karmel.

³Sia nasua Daud tu mintu’ tau nasolan male, pantan sibaa repokna, anna torro lan lu mintu’ tondok lan lili’na Hebron.

⁴Saemi tu to Yehuda anna tokkoi tu Daud dio la dadi datunna suku Yehuda. Napokadammi tau Daud kumua: To Yabesh dio Gilead tu ullamun Saul.

⁵Mesuami Daud lako to Yabesh dio Gilead, nakua lako: Naparongko’morokomi PUANG, belanna kamaturu-turuan tu mipogau’ lako puangmi, iamotu Saul, tu mangkamo milamun.

⁶Totemo na PUANGmora umpakitangkomi kamamasean sia kamarurusan sia aku duka la umpakitangkomi kameloan pada tu mipogau’na, belanna mangkamo mipogau’ tu iannato.

⁷Totemo pamatoto’komi kalemi sia pa’pekitananni tu kapiamuaneammi, moi anna matemo tu Saul, puangmi; ondongpi mangkamo’ natokko rapu Yehuda la undatui.

⁸Apa iatu Abner, anakna Ner, kamandang surodadunna Saul, naala tu Ishboset, anakna Saul, nabaai lamban lian Mahanaim,

⁹naangka’i datunna mintu’ lili’na Gilead sia Asyuri sia lako mintu’ lili’na Yizreel sia to Efraim sia to Benyamin, iamotu mintu’ to Israel.

¹⁰Iatu Ishboset, anakna Saul, tonna ditokko undatui to Israel patangpulomo taunna, ma’parentami duangtaun. Ia manna tu suku Yehuda unturu’ Daud.

¹¹Iatu mintu’ attu kama’parentanna Daud dio Hebron undatui suku Yehuda pitung taun annan bulanna.

¹²Den pissan tassu’mi tu Abner, anakna Ner, sola surodadunna Ishboset, anakna Saul, dio mai Mahanaim lako Gibeon.

¹³Tassu’ dukaomi tu Yoab, anakna Zeruya sola surodadunna Daud, anna sitammu dio limbong Gibeon; pada torromi tu tau iato mai, misa’ rampe lakona na misa’ rampe indena mai limbong iato.

¹⁴Nakuami Abner lako Yoab: Melo totemo, ke bendanni ba’tu pira-pira pia muane anna siea dio olota. Mebalimi Yoab: Melo.

¹⁵Bendanmi tu tau iato mai, anna tassu’ lako tingayo, anna diia’, iamotu dio mai Benyamin sangpulo dua tau bannang dio Ishboset, anakna Saul, na sangpulo dua tau dio mai mintu’ surodadunna Daud.

¹⁶Pada natoemi tu ulunna balinna, anna pada umperru’busanni tu pa’dangna tama la’pekna balinna, naurungan pada songka nasang. Iamoto nasangai tau tu inan iato Helkat-Hazurim, tu sikandappi’ Gibeon.

¹⁷Tonna allo iato mandu masarrangmi tu kasirarian, anna talo tu Abner sia to Israel dio olona mintu’ taunna Daud.

¹⁸Dio duka ren tu tallu muane, anakna Zeruya, iamotu Yoab, Abisai na Asael; iatu Asael malinta’ susi donga dio lu padang.

¹⁹Naula’mi Asael tu Abner, sia tang sepang kairi ba’tu kanan dio mai boko’na Abner.

²⁰Messailemi tu Abner, anna ma’kada nakua: Ikoraka Asael te? Mebalimi nakua: Akumo.

²¹Nakuami Abner lako: Sepang kananko ba’tu kairi, tingkanni misa’ tu to mangura sia rampai tu mintu’ apa dio kalena. Apa manoka tu Asael mallai dio mai boko’na.

²²Nakua pole’omi Abner lako Asael: Mallaiko dio mai boko’ku. Apara gai’mu la kusambakki ammu songka rokko padang? Undinna umba la kukua untiroi tu lindona Yoab, kakammu?

²³Apa manoka mallai dio mai kalena, anna rokki Abner tampak dokena tu tambukna, natarru’i tu boko’na; songkami inde to anna mate inde bangsiamoto. Mintu’ tu to lendu’ dio mai inan nanii Asael mate, tadang inde to.

²⁴Apa naula’ Yoab sola Abisai tu Abner. Iatonna lambunmo allo, rampomi tu tau iato mai lako tanete Ama rampe matallona Giah, tu ma’palulako padang pangallaran Gibeon.

²⁵Sirampunmi tu to Benyamin dio boko’na Abner anna dadi sangtuntunan nabendan dao misa’ botto tanete.

²⁶Metambami Abner lako Yoab, nakua: Sipaturaka tu pa’dang la kumande tae’ upu’na? Tae’raka muissanni kumua la mapai’ tu katampakanna? Sangapaporoko tang la ussuai sule tu to buda unnula’ siulu’na?

²⁷Mebalimi Yoab nakua: La lelukraka tuoNa Puang Matua, iake mupokada doloi, manassa melambi’pa ina’ natibalik tu to buda unnula’ siulu’na!

²⁸Umpannonimi napiri tanduk tu Yoab anna tadang tu to buda, sia tae’mo naula’i tu to Israel sia tae’ dukamo natarru’ sirari.

²⁹Naolaimi Abner sola mintu’ taunna tu Araba-Yordan iato, situ’turan bongi, anna lambanni Yordan, sia lumingkapa sangpolo allo namane rampo lako Mahanaim.

³⁰Sulemi tu Yoab unnula’ Abner, narampunni tu mintu’ tau; iatu mintu’ taunna Daud pa’de sangpulo kasera, senga’ ia tu Asael.

³¹Apa iatu to Benyamin nabela’ pa’dang mintu’ taunna Daud, anna dipatei tu taunna Abner talluratu’ annan pulona.

³²Naangka’mi tu Asael anna lamunni lan lamunanna ambe’na dio Betlehem. Lumingkami tu Yoab sola mintu’ taunna situ’turan bongi, tibangka’mo masiang tonna rampo lako Hebron.