Read Toraja-Sa'dan 2 SAMUEL 5 Bible Online

2 SAMUEL 5 - Toraja-Sa'dan bible

2 SAMUEL 5

¹Sae nasangmi tu mintu’ sukunna to Israel mennolo lako Daud dio Hebron, anna ma’kada nakua: Kami te sola nasang manassa sangrara sangbukuki’.

²Ondongpi masaimo, tonna datuipakan Saul, puang dukamo tu umpalutama-lulanni-mai tu to Israel, sia lu lako duka kalemi tu kadanNa PUANG: Iko la ungkambi’i tu taungKu Israel sia iko dukamo la dadi datunna mintu’ to Israel.

³Susi dukato tu mintu’ pekaamberan to Israel sae mennolo lako datu dio Hebron, anna sibasse datu Daud tu tau iato mai dio Hebron dio oloNa PUANG; mangkato natokkomi tu Daud dadi datunna to Israel.

⁴Iatu Daud tonna dadi datu tallungpulomo taunna, anna ma’parenta patangpulo taunna.

⁵Dio Hebron nanii pitungtaun annan bulanna undatui to Yehuda na dio Yerusalem tallungpulo ntallu taunna undatui mintu’ to Israel sia to Yehuda.

⁶Ke’de’mi tu datu sola mintu’ surodadunna lako Yerusalem, la urrarii to Yebus, tu torro lan tondok iato. Ma’kadami tu tau iato mai lako Daud nakua: Tae’ mima’din tama mai, mane to buta sia to kupi’ unnula’ikomi, battuananna: tae’ nama’din Daud tama mai.

⁷Apa natalo Daud tu tambakuku Sion, iamo tondokna Daud.

⁸Allo iato nakuami Daud: Minda-minda la untalo to Yebus, manassa male tama unnola pambo’bok sitarru’ diolai umbaa uai; apa iatu to kupi’ sia to buta, mandu nakagi’gi’ penaanna Daud. Iamoto nakuai tau: Iatu to buta sia to kupi’ tae’ nama’din tama.

⁹Torromi Daud lan kota ditambakuku iato, anna sangai tondok Daud; napalilingimi Daud rinding tembo’ randuk dio mai Milo ma’palutama.

¹⁰Samasai-sainna sakerangngan-rangngannami tu kamala’biranna Daud, belanna PUANG, Kapenombanna mintu’ ma’dandan maritik, urrondongi.

¹¹Iatu Hiram, datu Tirus, ussua pesuanna lako Daud umbaa kayu arasi’ sia ba’tu pira-pira pande kayu sia to ma’pa’ batu, anna pabendanan Daud misa’ tongkonan layuk.

¹²Susito naissanni Daud, kumua Napamanda’mo PUANG undatui to Israel sia Napamala’bi’ tu kadatuanna belanna taunNa, iamotu to Israel.

¹³Iatonna saemo dio mai Hebron, naalaomi Daud tu ba’tu pira-pira gundi’ sia baine dio mai Yerusalem, napadadianomi Daud ba’tu pira-pira muane sia baine.

¹⁴Iamote tu sanganna mintu’ anak dipadadianni dio Yerusalem: Syamua, Sobab, Natan, Salomo.

¹⁵Yibhar, Elisua, Nefeg, Yafia,

¹⁶Elisama, Elyada sia Elifelet.

¹⁷Iatonna rangimi to Filistin tu kareba diona Daud ditokko undatui to Israel, ke’de’mi tu mintu’ to Filistin la undaka’ Daud; iatonna rangimi Daud tu diona to, malemi lako kota ditambakuku.

¹⁸Saemi tu to Filistin anna sikarangan dio rante Refaim.

¹⁹Mekutanami Daud lako PUANG, nakua: La sirarira’ka tu to Filistin? La Misorongraka tama limangku? Ma’kadami tu PUANG lako Daud, Nakua: Ke’de’moko, belanna manassa la Kusorong tu to Filistin tama limammu.

²⁰Saemi Daud lako Baal-Perasim, nataloi tu tau iato mai inde to, anna ma’kada nakua: Naruang tangnga PUANG tu ualingku dio oloku susito uai ma’tu’ba’. Iamoto nasangai tau tu inan iato Baal-Perasim.

²¹Natampemi tau iato mai tu mintu’ rapang-rapang dipodeatanna, anna alai Daud sola mintu’ taunna.

²²Undinnato sae pole’omi tu to Filistin, anna sikarangan diong rante Refaim.

²³Napekutanammi Daud lako PUANG, anNa ma’kada tu Puang Nakua: Da mulaoi dio mai tingayo, tigirikko ammu tamai boko’i, muurunganni ullaoi dio mai to’ garonto’ baka.[1]

²⁴Iake murangii tu tengka dao lolok baka, la madongi’ko, belanna attu iato tassu’mo tu PUANG undoloangko la untaloi tu surodadu to Filistin.

²⁵Napogau’mi Daud susitu pepasanNa PUANG lako kalena; natalomi tu mintu’ to Filistin randuk dio mai Geba ma’palulako Gezer.