Read Toraja-Sa'dan 2 SAMUEL 6 Bible Online

2 SAMUEL 6 - Toraja-Sa'dan bible

2 SAMUEL 6

¹Undinnato narampun pole’omi Daud tu mintu’ to ditonno’ dio mai to Israel, tallungpulo sa’bu.

²Mangkato ke’de’mi tu Daud sola tu mintu’ to nasolan dio mai Baale-Yehuda, la umbaai inde to diong mai tu pattinNa Puang Matua, tu dinii ussa’bu’ sanga iato, iamotu sanganNa PUANGna mintu’ ma’dandan maritik, tu unnisung dao karubion.

³Nabaami tu pattinNa Puang Matua napadaoi misa’ kareta ba’ru; naala lan mai banuanna Abinadab dao tanete, namale Uza sola Ahyo, anakna muane Abinadab, umbaai.

⁴Dolomi lumingka tu Ahyo dio patti.

⁵Iatu Daud sola mintu’ to Israel ma’marua’-rua’ dio oloNa PUANG, umpannoni ma’rupa-rupa (oni-onian) kayu sapuko, iamotu katapi, dandi, ganda’-ganda’, giring-giring sia taa’-taa’.

⁶Iatonna rampomo tu tau iato lako to’ panglulluranna Nakhon, ta’kala nadoloanni Uza tu pattinNa Puang Matua, natoemi, belanna tilende’ tu sapinna.

⁷Re’dekmi tu ara’Na PUANG lako Uza, anNa pongkoi Puang Matua inde to, belanna katangmengkilalanna; matemi inde to dio sikandappi’ pattinNa Puang Matua.

⁸Tirambanmi tu Daud, belanna nasanggang maro’ PUANG susito tu Uza; nasangaimi tau tu inan iato Peres-Uza sae lako allo iate.

⁹Attu iato mataku’mi tu Daud lako PUANG, naurunganni ma’kada nakua: Umba nakua nala rampoo tu pattinNa PUANG lako kaleku!

¹⁰Iamoto tang napasiolami Daud tu pattinNa PUANG dibaa tama kotana Daud, namesua Daud umpalendu’i lako to’ banuanna Obed-Edom, to Gat.

¹¹Torromi lan banuanna Obed-Edom, to Gat, tu pattinNa PUANG tallungbulan, Napamasakke-sakkemi PUANG tu Obed-Edom sola mintu’ to lan banuanna.

¹²Iatonna pokadami tau lako datu Daud, kumua: Napamasakke-sakke PUANG tu to lan banuanna Obed-Edom sia mintu’ tu apa dio kalena belanna pattinNa Puang Matua, malemi Daud unnalai tu pattinNa Puang Matua lan mai banuanna Obed-Edom, anna baai langngan kotana Daud situang kaparannuan anna ma’marua’-rua’.

¹³Iatonna mentengkamo pennannan tu to umbulle pattinNa PUANG, napemalarammi tu misa’ sapi sia misa’ anak sapi maloppok.

¹⁴Tumbang-tumbangmi tu Daud dio oloNa PUANG sia ma’bayu lenang busa.

¹⁵Susimoto tu Daud sola mintu’ to Israel umbaai langngan tu pattinNa PUANG unnarrak-arrak sia umpannoni napiri tanduk.

¹⁶Iatonna rampomo tu pattinNa PUANG tama kotana Daud, ta’kala mentiromi tu Mikhal, anakna Saul, dao mai pentiroan banuanna. Iatonna tiromi tu datu Daud tumbang-tumbang sia unnondo dio oloNa PUANG, nasayumi lan penaanna.

¹⁷Iatonna baami tau tama tu pattinNa PUANG, napadiomi inanna lan tenda tu napabendananni Daud, napemalaranni Daud tu pemala’ ditunu pu’pu’ sia pemala’ kasalamaran dio oloNa PUANG.

¹⁸Iatonna upu’mo tu Daud umpemalaran pemala’ ditunu pu’pu’ sia pemala’ kasalamaran, napassakkemi tu mintu’ tau tete dio sanganNa PUANGna mintu’ ma’dandan maritik.

¹⁹Nataaimi tu mintu’ tau, iamotu mintu’ kasirampunanna to Israel, la muane la baine, pantanni roti, sisangbatu sia duku’ sisangira’ sia deppa bua anggoro’ simisa’, anna pantan sule tu tau iato mai lako banuanna.

²⁰Iatonna sule tu Daud la umpassakke to lan tongkonan layukna, tassu’mi tu Mikhal, anakna Saul sitammu Daud, anna ma’kada nakua: Lendu’ ia dipakala’bi’na tu datu to Israel allo iate, nalossokan tu pakeanna allo iate dio tingayona mintu’ kaunan baine tu napokaunan to mase’ponna datu, butung misa’ to tang unnangga’ kalena sia tang masiri’ ullossokan pakeanna!

²¹Ma’kadami Daud lako Mikhal, nakua: Dio oloNa PUANG, tu untonno’na’ ussonda ambe’mu sia mintu’ bati’na, Napadadimo’ arungna mintu’ taunNa PUANG, iamotu to Israel, iamoto angku ma’marua’-rua’ dio oloNa PUANG.

²²Ondongpi manduna’ la umpamadiongan kaleku anna iate sia la kutiro madiongan tu kaleku; na iatu kaunan baine tu mupokada, tau ia dukamoto mai tu la kunii unnappa’ kamala’biran.

²³Iatu Mikhal, anakna Saul, tang sitiro lolo tau sae lako matena.